روايــة #أصحاب_ونسايب
الــحَـــلـــقـة الــثَــامنــة عــشَـــرْ 🌸
عمر تعفلق و فنص فيه : و انت شن دخلك فيها شن تحب !!
القرسون انصدم : عفوا !!!
عمر : لا عفوا لا شكرًا !! شن مش مالي عينك باش ماتسألنيش اني ؟؟؟؟
ريحان انحرجت : عمر خيرك ؟؟
عمر وقف : هي نوضي
القرسون يشوف و مصدوم : اني فاش غلطت
ريحان وقفت : عمر !!
عمر جبدها من يدها و طلع
ريحان : عمر !!! ... بالشوية خيرك
عمر متعفلق و ساكت
ريحان وقفت و فكت يدها : أي ايدي
عمر وقف و شبحلها : اسف تقويت عليك
ريحان : خيرك ؟ الولد فاش غلط ؟
عمر : مايتحشمش الحيوان ماحترمنيش حتى اني اللي مقعمز
ريحان : شن دار ؟؟؟
عمر : واقف يبصبصلك و يبتسم
ريحان قعدت تشوفله بعدين ضحكت : ههههههههه
عمر سكت
ريحان : مش مستاهل الموضوع انك تفسد علينا التقعميزة
عمر : اركبي نمشو لمكان تاني
ريحان : لالا خلاص بنروح ، وانت برا للمحل وقت عليك
عمر : حانعوضهالك بإذن الله
ريحان : لالا فوت كأن ماصار شي عادي
عمر ابتسم : كان هذا نخلوها ع الفايبر
ريحان : شن هي ؟
عمر : الهدرزة 😉
ريحان انحرجت : به 😊
عمر : باهي امالا اركبي مانعطلكش
ريحان و هي راكبة للسيارة : باي
عمر يشوفلها : سلام
( طلعت ريحان بالسيارة .. و بعدها ركب عمر لسيارته و طلع )
ريحان ف السيارة تضحك : جو عليه
فتحت الراديو و علت الصوت 🎶🎧
______________
فرح دوشت و جت لوفاء ف المطبخ : وفاء شن عندك بتديري ؟
وفاء شبحتلها : شي كسودي .. كيف بندير كيكة
فرح : يعني مش طالعة ؟
وفاء : ف الشك ، محمد اليوم كله يخدم مازال مش مروح
فرح : شن رايك نطلعو بروحنا ؟
وفاء تفكر : مش عارفة ، بالك خوك ايدير الجو
فرح : تو اني نكلمه
وفاء : به شوفيه
فتحت فرح تليفونها تتصل بمحمد ...
محمد رد : ايوا
فرح : اه محمد ، اسمع بعد شوية طالعة اني و وفاء
محمد : لالا بروحكم مفيش
فرح : تي حتى بدلنا
وفاء تضحك 😂
محمد : وين ان شاء الله !
فرح : تغييرت جو
محمد : و خيركم ماتشاوروش ؟ ولا بالعاني تحطي فيا ف موقف ؟
فرح ضحكت : خود بخاطري اني ضيفة
محمد : ساعة بس و ماتباعدوش
فرح : حاضر
محمد : و ردو بالكم من سند راهو يريح
فرح : ماتخافش
محمد : هي تشاو
فرح : باي ... و سكرت الخط
وفاء : شن قالك !
فرح : شدت .. و قال ماتعطلوش
وفاء : يسس 👍 ، هيا امالا بسرعة
______________________
وليد مقعمز ف المحل ..
بعد شوية خشت رنا معاها بنت عمها أريج
رنا و أريج : السلام عليكم
وليد متلفت : و عليكم السلام
رنا ابتسمت و قربت منه : كيف الحال
وليد شبحلها : رنا ! الحمد لله كيف حالك انتي
رنا : كويسة تمام
أريج : رنا ! ترا تعالي شوية
رنا قربت منها توشوش : غر نوصلو مبردك
أريج : اني مستعجلة بناخد شورت لولدي و بنطلع
رنا : خودي اللي تبيه تو يساعدك
أريج : منين تعرفيه ؟
رنا : ولد جيرانا
أريج ضحكت : و اني نقول علاش تزني عليا نجو للمحل هذا
رنا فنصت فيها : اسكتي تو يسمعك
أريج تشوف ف الشورتات : به غر شدي ولدي راهو يطلع
رنا : به .. و تلفتت تتفرج على وليد ؛ و هو مش لاهي بيها
( ولد أريج خش لحجرة القياس و بدي يخبط ف الباب )
وليد استغرب : هذا شني ؟؟
أريج شدت وجهها : نهاري احرف
رنا ضحكت : تو نمشيله
وليد شافلها و تلفت للتلفزيون
رنا جت و شاداته ف يدها
أريج : اقرصيه خلي ينطمر هني
رنا : شوفي التيشرت هدا محلاه
أريج تشوف فيه
رنا تلفتت لوليد : وليد ! ترا شوية
وليد جاها : اتدورو على حاجة معينة ؟
رنا مبتسمة : ايه ، نبو زي التيشرت هذا غر اكبر بمقاس
( وليد يدور )
أريج توشوش ف رنا : تي ماعنديش حقه شن اديري
( وليد سمعها )
رنا توشوش : اسكتي
أريج سكتت و تسحن ف روحها
وليد طلعه : تفضلي
رنا : شكرًا
أريج ساكتة و منحرجة
رنا شدت ولد أريج تقيسله فيه
وليد ولّا لمكانه
أريج : امالا انتي اشريه تو نوريك
رنا تضحك : اهو جاه والله يهبل
أريج تشوف فيه : صح حلو
رنا : هيا ناخدوه و فوتي الشورت
أريج : لالا بناخد الشورت بس .. و مشت بتخلص
رنا لحقتها ب التيشرت
أريج : كم الحساب ؟
رنا حطت التيشرت : و معاه هذا
وليد : 65
أريج استغربت : حتى التيشرت ؟
وليد : الشورت بس ، التيشرت اعتبريه هدية
رنا ضحكت : شكرًا
أريج انحرجت : لالا صحيت
وليد ابتسم : الهدية ماتردتش
أريج سكتت
وليد مدلها الشكارة : ايبيدهم بِ الهني
أريج منحرجة : شكرًا بارك الله فيك
وليد : و فيك بارك الله
رنا : لو التيشرت ماطلعش ع الشورت اللي واخدينه ليه عادي نبدلوه ؟؟
وليد : قصدك مش للشورت هدا هو ؟
رنا تلخبطت : لالا مش ليه
وليد : عادي به ماعندكش مشكلة
رنا ضحكت : شكرًا هلبا وليد
وليد : عفوا
