روايــة #أصحاب_ونسايب
الحَــلْـــقــة الـخــآمــسـة 🌸
عمر : باهي اللي مالقانيش مبرد دمه الاحول ماعنديش ليه جواجي
فرح ضحكت : same same
صلاح : تحشم ولد عمك هذا عيب تقول عليه هكي
عمر : يا بوي هو احول به شن تبيني نقول ؟ الذي عيناه متقاربتان !
فرح ضحكت
صلاح فنص فيه و سكت
فايزة : غريبة ماخشش سلم
صلاح : بالك كان مستعجل
فايزة : قداش نعزه و غالي عليا
صلاح : تو ان شاء الله يولي نسيبك و اشبعي منه
(( فرح و عمر شبحو لبعض ))
فايزة ضحكت : ان شاء الله
فرح انصدمت و شرقت 😲
مدتلها فايزة اممية : بسم الله ، كولي بالشوية
فرح تكح : نسيب مني !!!
عمر ساكت ، يراجي ف الطاولة تنقلب
صلاح : نسيبنا ، عمك طالبك ليه من زمان و حني مانلقو خير من ولدنا
فرح تكنطت : و انى مالياش راي ولا شني
فايزة : ماعندك ماتقولي فيه ولد عمك
صلاح : راي شني ؟ بالك بتكسري كلمتي !
فرح ناضت وقفت و حطت ايديها ف نصها : لا بالك انت بتعطيني بالغصب ؟؟
صلاح فنص فيها : بلا قلة آدب
فرح : انى مانحباش و نكرهه من يوم يومي .. ردو بالكم تفرضو عليا رأيكم ف الموضوع هدا بالذات
صلاح : اني ماقلتلكش حبيه
فايزة : غر قعمزي توا وبلا مشاكل ع الغدي بعدين ندوو فيه الموضوع
فرح : ماعادش فيه ما ندوو ، نبي نقرا و نتخرج من الطب ، مانبيش نشوش على روحي بالتفاهات هادي
صلاح : ماتفكريش حتى التفكير انك تقري في الجامعة ، خودي الشهادة الثانوية و راجي نصيبك
( فرح فاتحة فمها من الصدمة )
صلاح : و كان خالد وافق تقري في الجامعة بعد ماياخدك هو حر
فرح تعفلقت هلبا و علت صوتها : معناها كلام خالد صح و انى كذبته !! إنت اكيد تحلم مستحيل يصير اللي تقول فيه ولو على قطع رقبتي ... و ركبت لدارها تجري
عمر شبح لبوه : ها شن رايك في ردها توا؟
صلاح : انت ماليكش دخل و كول وانت ساكت
عمر : بوي فَتّح عقليتك شوية راك متأخر هلبا
فايزة كشخت عليه : عمر ادوي بأدب مع بوك
صلاح ياكل بِ برود : غر خليه خليه ..
عمر : رانا كبرنا و الأمور هادي مفروض تحترم آرائنا فيها ، هي مش بقرة باش تبيعها و تشريها بكيفك
صلاح ياكل و أعصابه باردة : اني نعرف مصلحتها اكتر منكم
عمر : مصلحة شني فهمني هي نبي نفهم اني
صلاح : مانبيش نعطيها لحد براني و يعرف إني كاتبلها ملك تو يطمع فيها ويلهف منها مايبي و يلوحها ، نبي نعطيها لخالد لأن اللي لينا ليهم و خيرنا مايمشي لغيرنا
عمر ضحك بهزوة : يعني انت همك كله في الملك مش هاماتك بنتك و هناها ! ماتعفلقنيش، فرح ماتبيشي و ماتحباش كيف بتغصبها تعيش مع واحد مش طايقاته ؟ ولا تبيها تجيك كل فترة حرجانة ولا تروحلك متطلقة !!
فايزة تسمع و ساكتة
صلاح : لالا مايصير الا الخير
عمر تعفلق و وقف : مايصير الا الخير به تو نشوفوه .. و طلع
فايزة تنهدت : كلامه حق ياصلاح الفايدة في الهني
صلاح : مايعرفوش مصلحتهم زيني
فايزة سكتت
صلاح حط الكاشيك : الحمد لله ، هي نوضي سخنيلي شاهي
(( لا يـنـفـع مــال ولا جــاه كــلــها بـيـوصـل فـيـهـا الـدور .. مـاحـد دفـنــوا مــالـه مـعــاه نــهــايـتـهــا كــفــن و كــافــور ))
___________
