شمس بغداد

الفصل الأول { ضياع }

أسمي شمس مواليد 1990
عايشة ب بلجيكا ، متزوجة وعندي
أولاد ،، ومطلقة سابقا

مولدي كان بالعراق بغداد
كنت عايشة وية أمي وابوي

كنت اني الوحيدة ألهم
تقريباً من كان عمري 5 سنوات

ً ب 1995

كنت بالشارع ألعب وية أولاد جيرانة
صار الظهر وأمي ما صاحتلي

اني متعودة كل يوم تصيحلي من
الجو يصير هيج حار

دخلت للبيت ، كان فارغ أمي ما موجودة

طبعاً أمي وابوي كبار حيل بالعمر حسبالك أجدادي ،، ابوي كان طول الوقت بالفراش لان مريض

وأمي هم كانت مريضة بس تتحرك بصعوبة ،، كنت دائماً اشوفهة تعبانة واحاول اساعدهة ،، لأن كبيرة بالعمر ومريضة وعليهة مسؤوليتي اني وابوي

دخلت بيومهة ركضت للمطبخ
كان فارغ حتة غدة ماكو
كلت أكيد أبوي تعب وأمي ألتهت بي

رحت لغرفة النوم

لليوم أذكر من دخلت شفت أبوي نايم وأمي يمه حاظنتة ونايمة

ردت أطلع بس قلت خاف أمي غفت بدون ماتدري وهسة يكعد ابوي يريد الغدة وهيَ ما مكملتة

تقربت منهة صعدت ع الجرباية
بوستهة من خدهة وضليت ابوس بيهة كل مرة اسوي هيج وهيَ تكعد
بس هل مرة ماكعدت

ندهتهة ما جاوبتني ، ضليت أنده
وأهز بيهة بس أبد ما كعدت
قلت أكيد تعبانة ونايمة هسة ابوي يكعدهة

افتريت يم ابوي وندهتة
هم ماكعد ، ياربي شنو اليوم هيج نومهم ثقيل

ضليت انده بيهم اكثر من ساعة
محد كعد ، ضجت لأن مايقبلون يكعدون ويحاجوني

سحبت أمي من حضن ابوي
قلبتهة على ظهرهة
وبصعوبة كدرت أنام بنصهم
صح المكان ظيك بس احب أنام
بنصهم

قلت أكيد العصر تكعد أمي وتكعدني وياهة حتة اتغدة لان ميتة جوع

نمت لليل وكعدت
البيت كان أظلم كلش
قلت جوز اللالة ناصية

حاولت اركز بس ظلمة كلش
تلمست أمي بعدهة نايمة يمي بس باردة ثلج

وأبوي بعدة بمكانة بس أبرد من امي ظليت أبكي بعالي صوتي واصيح عليهة

مامة كومي فدوة كومي الغرفة ظلمة كومي يمة اخاف وحدي يلا كومي يمة

ماكو اي جواب لا من امي ولا من ابوي
حاولت أتلمس حتة أغطيهم
ماكان موجود اي غطة والغرفة حارة حيل

كان بوقتهة صيف
ظليت نايمة بنصهم وأبكي واصرخ عليهم حتة يكعدون

ماحسيت إلاواحد فتح باب الغرفة ودخل بيدة ضوة ، عيوني كانت كلهة دموع ماشفت شكله زين ، بس تقرب وصاحلي