قصة بعنوان: غلطة عمري
للكاتبة: Sanaa tranquille
مريم:أمينة ختي عتقيني عافاك...عتقيتي..نتي اللي عندي..
أمينة: ياكلاباس امريم..مالك جاية عندي فهاد الليل اش واقع..مفهمت والو..
مريم:(تلاحت على أمينة وبدات تبكي) صافي مشيت فيها مشيت..
أمينة: شرحي لي راني مافاهمة والو..
مريم: أنا..أنا..حاملة..
أمينة: (تتندب) أوييييييييلي أالمسخوطة..ياك قلتها ليك..االحمارة داك خالد غيخرج عليك..شنو غديري دابا؟!!
مريم: معرفتش والله..والمصيبة..مللي قلتها لخالد وهو غابر..تنعيطلو ومكيجاوبش..
أمينة: ناري يا المسخوطة..هادي الاخرة ليك مع باك محمد والله غادي يقتلك..المهم تسناي نلبس جلابيتي..نمشيو نقلبو على خالد..
لبسات أمينة جلابيتها ومشات هي ومريم تيدورو فالزناقي ويقلبو على خالد..مول الفعلة..حتى لقاو سمير صاحبو فواحد القهوة..
أمينة: هاهو سمير ..راه راه..جالس فهاد القهوة..100٪ غادي يكون عارف بلاصة خالد. ..يله نعيطولو ونسولوه..
بدات مريم تتشير ليه..حتى شافها وناض عندها..
سمير: أهلا ختي مريم..لاباس ؟ كيدايرة اختي امينة..سمحولي نسولكم ياك مكاين باس..حتى خارجين هاد الوقت..؟؟
مريم: مكاين منخبي عليك أخويا سمير..تنقلب على خالد غبر عليا مبقيت لقيتو ..واش مبانش ليك؟؟
سمير: آه بان لي..البارح واقيلة..وقاللي باللي غنمشي عند عمي للعروبية نجلس عندو شي يامات ..ونجي..
مريم: اه العجب ماقاللي والو..فين كاين هاد عمو راني محتاجة للعنوان ضروري باغاه ضروري..
سمير: (عطاها العنوان) هاهو العنوان اختي..
مريم: واخا الصباح غنمشي عندو..
سمير: واخا ختي..
أمينة: لهلا يخطيك اخويا سمحلينا برزطناك..يله امريم..
مريم: شكرا سمير..تصبح على خير..
سمير: بسلامة عليكم..
مشاو. فحالهم..وامينة قالت:
امينة: مريم ختي يله باتي عندي تالصباح ويحن الله..
مريم: أودي على فين غنبات..راني مغنرجعش للدار حتى نفك حريرتي ..
المهم قصة مريم وخالد كانت بدات من واحد النهار طلعات للطوبيس و مشا ليها البزطام فالطوبيس وفاش بغات تخلص لقات البزطام مكاينش..وناض خالد قال للي تيتخلص..انا غنخلص عليها اخويا..
ومن تماك بدا اعجاب مريم بخالد لشهامتو..فهاد الموقف اللي دار معاها..
وبقاو تيتبادلو الكلمات..وفالاخير تبادلو النوامر..وبقاو تيهضرو مدة فالتلفون حتى تطورات علاقتهم ..
مريم..مها ميتة فاش كانت صغيرة..يعني ماعاقلة عليها كاع..وباها تزوج. بوحدة خرجات منها الزيت البلدية..معطاتهاش الحنان ..ولا عوضاتها على مها اللي فقدات بالعكس..كانت قاسحة عليها بزاف ..ومللي يجي باها ترد مريم اللي ظالمة وتتمسكن عليه باش يتيق بيها باللي بنتو قبيحة ومتتحتارمش مرات باها.داكشي اللي كان تيخلي باها يزيد يكمل عليها ويكون قسح عليها من مراتو..هادشي أثر عليها بزاف فطفولتها. ..ماعاشتش طفولة زوينة..وخرجات من القراية من السادس ابتدائي. ..باش تقابل خوتها اللي ولد باها ..
المهم فاش وصلات ل 18 عام بدات تتمشي لواحد النادي تتعلم الخياطة ..
هي فاش تلاقات ب خالد في الطوبيس وولات تتلاقى معاه فاش كانت تتمشي للنادي..وحيت مريم تربات فظروف قاهرة خلاتها متلقاش أم توعيها ولا أب يخاف عليها ويحن عليها..كانت تتشوف ف خالد الاب والاخ والحنان..وهو لعب على هاد النقطة باش يوصل لحاجتو..
يتبع....#sanaa tranquille#
