ج.12: #sanaa tranquille# شاف فيها لقاها محطمة وعينيها عامرين بالدموع.. أيوب: ملاك مالك!؟ علاش هاد العوينات الزوينين باكيين؟؟! ملاك: بغيتي تعرف ؟! أيوب: أه بغيت نعرف.. ملاك: اليوم أسيدي اكتاشفت أني ماشي بنت سعاد و رشيد واني بنت واحد المرا حملات من شي حد وتخلات عليا لهاد الناس فاش ولداتني..نزيدك ولا مازل؟؟ نزيدك؟ يعني مرات الاستاذ الجامعي ينت الحرام..صافي دابا فهمتي؟ودابا تقدر تتخلى عليا بكل هدوء.. أيوب: (سكت وبقا يخمم وهو مذهول) ملاك: عرفتك غتسكت.. أيوب: ملاك!! انا تنبغيك وعمرني نتخلا عليك على ود هاد الهضرة الخاوية..وزيدون هادو هوما واليديك اللي رباوك وقراوك..واللي لاحوك الله يسمح ليهم..انا عارف أن الصدمة قاسحة بزاف عليك..ولكن..انا معاك.. ملاك: انا عارفة دابا انك تتحس بالشفقة عليا.. أيوب: لا والله حتى كنبغييييك..والله.. ملاك: المهم انا ممقلقاش من ماما وبابا ولا من اللي ولداتني ولاحتني.. انا غير اتصدممت..وخلاص.. أيوب: عارف اللي كاين..هاد الصدمة قوية بزاف عليك..ولكن اللي خاصك تعرفي اني عمرني نخليك..ودابا خاصك تجلسي مع راسك وتفكري مزيااان اش غديري فهاد شي..واخا..انا غنمشي دابا وفاش نوصل للدار غنتاصل بيك.. ملاك:(تنهدات) ان شاء الله يكون خير.. المهم مشا أيوب وخلا ملاك بوحدها باش تفكر مزيان..فهاد شي اللي مكانش على البال وتعرف أش خاصها تدير باش تواجه مشكلتها.. المهم بقات ملاك تتفكر حتى عيات ونعسات..نعسات بلا عشا بلا والو..حيت حتى الشهية تسدات ليها بهاد الاخبار.. وحيت هي محامية واخا جديدة ولكن فدراستها غتكون صادفات او شافت مشاكل الامهات العازبات اللي كترو بلا قياس وكترو معاهم الذياب اللي تيفترسوهم بدون شفقة ولا رحمة.. وعرفات باللي الألاف ديال البنات تيتعرضو للاغتصاب او تيديرو علاقات غير شرعية وبدعوى الحب..تيمنحو أجسادهم للرجال..حتى كيطيحو فهاد الوحلة ومللي يولدو متيلقاوش حل من غير يعطيو ولادهم للي يربيهم.. ملاك قدرات أن مها الحقيقية غتكون عانات وتصدمات وملقات تاحل من غير تعطي طرف من كبدتها لحد اخر.. والغد ليه غير فاقت ..مشات عنقات ماماها سعاد وقالت ليها نتي ماما وغتبقاي ديما ماما الحبيبة.. سعاد تأثرات وبدات تبكي وتعنق فبنتها..ومشات عند باباها رشيد قالتلو ملاك: بابا..انا متأكدة باللي بابا الحقيقي هو السبب فأن ماما تخلات عليا. وعطاتني ليكم..ومعمرو كان غيبغيني بحال أبابا..ولكن انا خاصني ضروري نعرف منكم كلشي..على ماما.. سعاد: أنا أبنتي معندي حتى مشكل الى باغا تعرفي ماماك..واللي انا عارفاه عنقولو ليك..واخا؟! ملاك: أه قوليلي.. سعاد: ماماك سميتها مريم وباباك خالد هادشي اللي عارفة انا..هي حملات معاه وهو هرب وخلاها واضطرات تولد وتعطيك ..المهم المرا اللي جابتها لي عطاتني عنوانها..ولكن سمعت انها تزوجات ..ومن تما مابقيتش عرفت اخبارها..هاكي العنوان وسيري قلبي عليها..تما واكيد غتلقاي اللي يوريهاليك.. المهم ملاك عاودات هادشي لأيوب وقاليها غنديك مغنخليكش تمشي بوحدك..وغير وصلو..لديك البلاصة.. مشاو لداك العنوان وسولو فيه.. وكانت المفاجأة.. يتبع.. #sanaa tranquille#
