#sanaa tranquille# اخيرا ولدات مريم..بنية..آية من الجمال.. ولكن مع الفقر والحاجة وعدم القدرة على حمل المسؤولية قررات انها تعطيها لشي ناس اللي غيقدرو يتهلاو فيها و يقريوها احسن قراية.. لقات مريم شي ناس ميسورين ومعطاهمش الله الاولاد..وعطاتهم البنية بلا ميرف ليها جفن..او تحن فيها.. عطاتها حيت كانت عارفة راسها..مغتقدرش تقد بيها..قالت اللهم نخليها تلقا واليدين اللي يهزوها فوق ريوسهم.. المهم المرا اللي خدات البنية قالت ل مريم..غناخدها بشرط.. مريم: شرطي ألالة ماشي مشكل.. المرا: عمرك تجي عندي وتقوليلي باغا نشوفها او باغا بنتي.. مريم:(تتبكي) غنقسح قلبي ومغنجيش.. انا الماضي باغا ننساه ونبدا حياة جديدة ويلا بقات معايا بنتي معمرني غنسى الماضي.. المهم مريم تقطع ليها قلبها على كبدتها ولكن مكانش عندها حل اخر ..باست الصغيورة و عنقات المرا وقالت ليها عافاك سميها ملاك.. قالت ليها المرا واخا غنسميها ملاك.. مشات مريم فحالها والناس ركبو طنوبيلتهم ومشاو لمدينتهم حيت كانو ساكنين فمدينة خرا.. مريم لقات صعوبة كبيرة باش تنسى بنتها ملاك..صورتها وغواتها مفارقوش مخيلتها..بكات وغوتات تاعيات بقات سادة عليها مدة طوييييلة وفالاخير قررات تخرج تقلب على خدمة باش تنسى اللي وقع ليها..شي مرات كانت تتسنى انها تفيق من هاد الكابوس اللي عاشت فيه مدة عام..ولكن لقات راسها هادي هي الحقيقة..وهدا مكتاب الله عليها..وكان أملها فالله كبير انو يعوضها خير على كل مافات.. المهم قلبات على خدمة تاطابو رجليها..ولكن مالقاتش..وهي تقوليها امينة.. امينة: مريم ختي مديريش فبالك..هانتي غنديرو انا وياك قضية..انا غنتسلف شي مليون من عند واحد السيد تيجينا من العائلة وغنتقداو منها حوايج..پيجامات سراول...وغنديوهم للسواق ونبيعو ونشريو..وشي نفصلوه ونخيطوه..وهايا غادة تانجمعو شوية الفلوس ونردو للسيد فلوسو..هو را يصبر علينا.. مريم: واخا اختي صافي لهلا يخطيك.. المهم داكشي اللي كان..تسلفو وتقداو حوايج..ومشاو للسوق..وقف معاهم واحد السيد تاخداو بلاصة فالسوق.. وفرشو وبداو يبيعو وكرمهم الله فداك النهار..باعو مزيان .. بقاو مريم وامينة هكاك حتى ولاو عندهم واحد الدخل يعيشو منو الحمد لله.. واحد النهار جا عندهم واحد السيد بغا يتقدا شي بيجامة و سروال للواليدة ديالو..وكان باين باللي عجباتو مريم.. حيت واخا ديك الغلطة اللي دارت كانت مريم عندها سمعة زوينة فالسوق.. المهم الراجل تقدا وبقا تيحاول يجبد الهضرة مع مريم..وهي تدور فيه فاش حسات بيه تيلمح ليها بإعجابو.. مريم: الله يخليك أسيدي قضيتي غرض..خلينا نشوفو خدمتنا.. الراجل: ختي انا والله تا سيمانة وانا تابعك وسولت عليك كلشي شكرك و قاللي راها بنت الناس..انا را باغي الحلال لا غير..أش قلتي!؟؟ مريم:(بملامح مصدومة..تفكرات غلطة عمرها..)أ..أ..أ..مغرفتش اش غنقوليك.. الراجل: شنو سماك الله بعدا؟ مريم: مريم..ونتا؟ الراجل: حسن..سميتي حسن.. مريم : متشرفين. . حسن: انا مشيت غنخلي ليك الوقت تفكري..السوق الجاي غنجي نشوف جوابك.... .يتبع..#sanaa tranquille
