واختار قلبي لهجة عراقية وتتوفر فصحى على منتدى روايتي قلوب احلام

الفصل الاول

السلام عليكم موعدنا مع قصة جديدة اتمنى قريتوا القصة القبلها واستمتعتوا بيها

لا تنسوا التصويت مهم كلش كلش

#واختار قلبي

كتابة رؤى صباح مهدي

الفصل الأول

الكل جان كاعد بالكهوة .. موسم طوبة وشباب المنطقة كلمن وصحبانة متجمعين جماعات جماعات على الكرويتات وعلى الميوزة يباوعون وصوت الصياح تارس الشارع بالضبط مثل دخان النركيلة اللي طلبوها بعض الشباب كنوع من التباهي ..

وطبعا مثل كل المباريات الناس انقسمت كلمن يشجع فريق ويذم بالفريق الخصم ويصير بيناتهم لغوة وشتايم وبعدين يرجعون يتابعون... وهكذا..

وهم اكيد ورة كل مباراة لازم نسمع طلقين تلاثة احتفالا بالفوز بلا أي اعتبار للناس النايمة او للأطفال اللي بالشارع .

على واحد من الطاولات جان كاعد ازهر.. شاب معروف بمزاجة المتقلب وعصبية وتكبرة. شايف روحة على الفاضي وجامع داير مدايرة شباب همجيين مثلة بالضبط.. سواء فاز الفريق اللي يشجعه او خسر لازم يتخبل ازهر ولازم يتعارك بالحالتين.

مدلل ماما وبابا وميرفضون اله أي طلب. ومفضليه على خواته الاثنين ريم ووفاء. وصار انسان مغرور كلش بفضل دلال امه الزايد.

على طاولة مقابيلة جان كاعد جمال. جيران ازهر من زمان والعائلتين يعتبرون أصدقاء عكس ولدهم. جمال عشقة وغرامه كرة القدم. من طفولته وهو يحب يلعبها وانضم لفرق محلية هواي وجان الكابتن بوقت المراهقة ومن شوية كبر صار مدرب ويعرف هواي حيل ويعلمها لفريق الصغار اللي يدربهم.

طبعا جمال لان عندة خبرة بكرة القدم جان كاعد يفسر ويحلل ويتوقع تحركات اللاعبين بالمباراة وكل الشباب يصفكولة كلما كال شي وطلع صحيح. وهالشي عصب ازهر كلش اكيد.

فجاءة سوة الفريق اللي جمال يشجعه هدف وصاح جمال فرحان بالهدف واصحابة باركولة تخميناته الصحيحة ويشتمون مشجعي الفريق الاخر واللي هو فريق ازهر. بعدين خمن جمال بعد تخمينات من المباراة فصاح ازهر بجمال:

"كافي جمال مسوي نفسك خبير ترة كل اللغوة اللي تحجيها نعرفها "

ماجاوب جمال غير بس بابتسامه. هو عندة ثقة بنفسه وبنفس الوقت ميريد يخلق مشاكل وية ازهر مالها داعي. وأخيرا وليس اخرا.. ريم. اخت ازهر جان جمال كلش معجب بيها فمراد يسوي مشاكل وية أهلها. بس سكوت جمال اللي المفترض يهدأ ازهر سوة العكس. تخبل ازهر وصاح بجمال بانفعال:

"على كل حال جمال .. ضربات الترجيح كلها لصالحنا بعد هدف التعادل اوكي"

هز جمال راسه بس حتى يسكت ازهر. وانتهت المباراة مثلما توقعها ازهر هالمرة وفاز فريق ازهر بالنهاية وخسر فريق جمال.