واختار قلبي لهجة عراقية وتتوفر فصحى على منتدى روايتي قلوب احلام

الجزء 12و13

جمعت جزئين لان مينفصلن الاحداث تقريبا متواصلة

صوتوا على الجزئين بليز

#واختار_قلبي

كتابة رؤى صباح مهدي

بالعامية

الفصل 12 و13

فاتت 3 اشهر على سفر هند.. كل يوم ريم تطلع بشغله وتطنكر لو تتعارك. ابسط شي ممكن تطكها بجي وتلف راسها وتنام. هند جانت دائما تذكر جمال بمواعيد ادويته وتجبره ياخذها واذا ما اكل او نسة ياكل تجبره ياكل.. وبسبب ريم زاد يأس جمال وكره الدنيا.. من صدك كرهها والنكد صار ضعف.. حتى ادويته يتقصد يفوتها والاكل مرات يفوت وجبات لان نفس ما عده ياكل. ريم هملته كلش وخلته هو هم يهمل روحة بالزايد.

ما كدر يعاتبها لان بداخلة يحس بيها مجبورة علي وكرامته وية اعاقته منعوا تماما من فتح الموضوع وياها. تمنى من كل قلبه ان هي من ذات نفسها راح تحس او تشفق علي بس هي ولا يمها. كدام أبو وامه يتصرف عادي بس بقلبه جرح جبير كلش. وطبعا ما خافي عليهم الوضع ابد ويدرون ابنهم ديكابر بس مايكدرون يتدخلون لان بنفس الوقت يعرفون تدخلهم يجوز يثير مشكلة جبيرة مثلما صار وية هند.

ريم طكت روحها من الوضع. اخوها لحد الان ما سافر . معاند ميريد يطلع يريد يظل بالبلد وأهله مديقدرون يقنعوا لذلك ريم ملت من الوضع كله وكامت تسمع جمال حجي مو حلو...

جان كاعد بالفراش ومتغطي زين وحرارته كلش عالية. مصخن وانفلونزا وعالكة كلش يمة. عطشان وميكدر يجيب مي... دخلت ريم الغرفة فكال الها:

"ريم تكدرين تجيبيلي مي؟ عطشان كلش"

باوعتله بغضب وكالت:

"ريم الخدامة بالخدمة"

داست بقلبه وطلعت راحت جابت كلاص مي واجتي.. اخذة من ايدها وشكرها ماردت علي . شرب الكلاص كله وبعدة عطشان حرارته نار.. كللها:

"تقدرين تجيبيلي كلاص لاخ قلبي نار"

باعتله بغضب وبصوت ناصي هو سمعه اكيد .. كالت:

"ابتليت اني"

راحت جابت بطل مي واجت حطته يمة على الكومدي. كعدت على القنفة تلعب بتليفونها فهو راد يبلع حباية خافض حرارة دورها بالمجر مالكاها فباوع على ريم وخاف يحجي.. خاف لا تسممه بكلمة كلمتين. سكت. ويستحي يصيح لامه يكللها جيبيلي خافض الحرارة فظل يعاني من الصخونة ..

حط شوية مي من البطل على ايدي وغسل بي وجهه وظل يستغفر الله ومر الوقت بالاستغفار والملل.. اخر شي ريم قالتله:

"اريد اروح لاهلي. مليت من كعدة البيت اريد اشوف امي"

باوع عليها وكللها:

"روحي بس لا تباتين مثل المرة القبلها"

باوعتله بطرف عينها وما جاوبت. بدلت هدومها وطلعت بدون حتى متكول لاهلة ان هي طالعه . جمال ورة شوية فكر.. لازم يعتمد على نفسه مهما كلف الامر. ريم وضحت موقفها منه ومستحيل راح توكف ويا بلا متعايرة او تسمعه كلام وهاي صار اكثر من مرة.. تحامل على نفسه ومرضة وكام بالكوة ضغط على عضلات ايدي حتى يسحب نفسه وجبر روحة يتحمل وفعلا نجح ينقل نفسه على الكرسي وحرك الكرسي لمكان الدوة وبلع حبايتين بعدين راح للحمام اخذ مي وخاولي وظل يسوي كمادات لنفسه وحس هواي صار احسن من قبل..