واختار قلبي لهجة عراقية وتتوفر فصحى على منتدى روايتي قلوب احلام

الفصل الرابع

لا تنسونه من التصويت فديتكم 

#واختارقلبي

بالعامية

كتابة رؤى صباح مهدي

الفصل الرابع

الأطباء جانو بغرفة جمال يحاولون ينعشون قلبه ويرجعون النبض بس جان قلبه تعبان. يمكن من شاف حال امه انكسر قلبه على حالها وتأذى لدرجة قلبه ما تحمل. الأطباء قرروا ورا ما كدروا يرجعوه ميدخله أي زائر لحد ما تتحسن شوية حالته ويصير اقوة. من وضعه يستقر عود يلة يدخلون امه وأبو مرة ثانية حتى يشوفونه. عاد الحجي قرر هو وام جمال يرجعون للبيت حتى ترتاح مرته لان انهارت تماما بالساعات القليلة الراحت.

ام جمال ظلت تبجي ما قبلت ترجع بس الحجي اصر وطلع حجة ان هو التعبان واخذها غصب ويا للبيت حتى ترتاح شوية تبدل هدومها تاكل ..

ظلوا هي ويا طول الوقت بالبيت ساكتين. محد يحجي ويا الثاني والحجي فارش سجادته ويدعي وهي نفس الشي والهم حطمهم.

بالنسبة لابو جمال جان يفكر مو بس بصحة ابنه بس بالفلوس لان منين راح يجيب فلوس المستشفى ومصاريف العلاج؟ هو رجال على كد حاله وجمال جان يصرف عليهم اغلب المصاريف والتقاعد ميسد شي يعني. فكر يحجي وية بنته هند العايشة بالخارج يستلف منها كم فلس بس غير رأية لان هو عمره ما طالب من بنته ونسيبة شي فاستحى يحجي.

مرته حست بي من صفته بدة يفكر بمصاريف العلاج فراحت للكنتور وطلعت بقجة صغيرة ملفوفة زين وراحت لرجلها. هو كاعد هي خلتها بحضنه . رفع راسه سألها:

"هاي شنو حجية؟"

جاوبت:

"افتحها ... "

فتح القماش وشاف ذهبها كله ولو جان مو هواي بس مع هذا جابته حتى يبيعه ويساعدة بالمصاريف. قال الها ضايج من تصرفها:

"هاي شنو حجية؟ صدك تحجين على اخر العمر اخذ منج فلوس؟ اخذي ذهبج ولا تفكرين بهذا الموضوع"

ابتسمت رغم حزنها بس هي تعرف زوجها وعزة نفسه واللي ورثها لابنه. خلت ايدها على جتفه وقالت :

"لا تتعب قلبي حجي.. هاي الفلوس مو الك.. لابني فلا تعترض اترجاك"

عافته بلا متسمع منه اعتراض وراحت تنام شوية لان عيونها انسدت من كثر التعب والبجي.. واحسن ما تظل صافنه بالحايط وياكل قلبها الهم قررت ترتاح حتى تكدر تجمع طاقتها من تشوف ابنها مرة ثانية ما تنهار..

الحجي باوع على الذهب وهو يعرف كلش زين ماراح يحل المشكلة لان قليل وقديم وللذكرى يريده فخلا على صفحة وقرر يبيع قطعه الأرض اللي يملكها مشاركة وية اخو بغير محافظة. عسى ولعل تغطي مصاريف علاج ابنه لحد ما يصير زين. واصلا لازم يحجي وية اخو حتى يقنعه يبيع لان مشاركة القطعه نص بنص واكيد حتى يلحك يبيعها بسرعه راح يخسر هواي من السعر .