واختار قلبي لهجة عراقية وتتوفر فصحى على منتدى روايتي قلوب احلام

الفصل التاسع

ارجو التصويت على الفصول 

#واختارقلبي

بالعامية

كتابة رؤى صباح مهدي

الفصل التاسع

باوع عليها وجانت ساكته متحجي.. هي تعرف كلش زين كلامه صحيح فميحتاج تزيد الوضع بالكذب.. حرك كرسية ناحية الباب وقلبه مقبوض دموعه بطارف عينه تريد تطلع بس حابسها بالكوة ميريد ينذل كدام الناس البرة اهلة وأهلها من يشووفون دموعه كدامهم. هي جانت متجمدة بمكانها لحد الان تتخيل هي بحلم.. شلون ارتبطت بهذا الشكل شلون . رجعت تنحب وتبجي تتمنى تموت.. كل اللي جانت تشوفة سواد بسواد بعد ماكو أي امل بحياتها.

ام جمال شافته طلع من الغرفة وهي جانت واكفة تسولف وية ام زاهر على عمة عينها فاول ما شافت ابنها ركضت علي متبسمة جان يكللها:

"خلينا نروح للبيت"

ميحتاج تساله ليش لان كلة جان مبين على وجهه. رجعوا للبيت كانوا جايين من عزة مو عقد.. باجر العرس شلون راح يصير؟

ظل الوقت كله يفكر. كرامته انجرحت بكلامها هواي. يعني شنو تكله اني جان انخطبت لو ما انت تخربها علية. هذا معنى كلامها مالة غير معنى. باوع على ماعون قريب علي. امه خلته بي فواكه برتقال وتفاح وموزة . فكر ينهي حياته وينهي ذلة ومعاناته. فكر بلحظة ويخلص من هاي الدنيا اللي بيها الفقير ميعيش. وهم يخلص ريم من المعاناة بطريقه.

سمع احد يدك باب غرفته وجانت هند تريد تساعدة يبدل ويرتاح على فراشه. مسح دموعه ودخلها للغرفة هند اكيد شافت عيونه حمرة بس ما علقت. ميحتاج تحجي شي يزيد الطين بلة. ساعدته يبدل وانجطل على الفراش وتركته وظل صافن على السقف يفكر يتمنى لو يقدر يلغي العرس بس يعرف كلش زين أبو مستحيل يقبل.

كعد الصبح ميعرف شوكت نام .. جان بيتهم هوسة كلش ترتيبات وتجهيزات للعرس الصغيروني اللي حيصير. امه عزمت شوية ناس من العائلة وشوية من صاحباتها والجيران اللي صداقتها بيهم وثيقة واهل العروسة هم نفس الشي ..

ورة شوية اجة أبو ازهر. دخل هو وأبو جمال الغرفة وسمعوا صوت أبو جمال بنقاش حاد وية أبو ازهر. بعدين تبين الموضوع من دخل جمال الغرفة. وافتهم.. أبو ازهر يريد يتنازلون عن القضية قبل العرس. أبو جمال احتقر الطريقة اللي ديستغلون بيها هذولة الناس ابنه المسكين.. بس جمال من طيبة قلبه راد قدر الإمكان يقرب المسافات و قال:

"ميهمك عمي.. اني وابوية وانت ويانا خلينا نروح سوة للمركز ونتنازل وبمعارفك هناك سرع الموضوع. ماكو داعي صرنا عائلة وحدة وهم نتعارك متسوة عمي"

باوع علي أبو وعيونه مدمعه.. بينة وبين نفسه كال.. ميستاهلوك ابني ..هذولة الناس ميستاهلوك.