عشقني استاذي بقلم زينب علي الناشربارق العراقي

البارت السادس عشر

عشقني استاذي
بقلم زينب علي_za_96
الناشربارق العراقي
البارت السادس عشر

زينب:-گعدت على ضوه الشمس اللي دخل من شباك الغرفه وصار بعيني.
باوعت على الساعه لگيتها ب ٨ إلا خمسه الصبح وأنه شبعانه نوم مع أنه چنت سهرانه بس يمكن لأن نمت مرتاحه بذيچ الليله والراحه من أهلي لأن تفهموني وتصرفو وياي بشكل كلش طبيعي وعاملوني أحسن معامله وعرفو أنه ما مقصره ولا غلطانه بشي ف گمت غسلت وجهي وبدلت ونزلت للمطبخ سويت ريوگ لأهلي.
گعدت أول شي ماما من النوم...

أم زينب :-صباح الخير

زينب :-صباح النور ماما

أم زينب :-خير ماما شنو اللي خلاچ تگعدين من الصبح بيچ
شي مأذيچ شي

زينب :- لا ماما ماكو شي بس گعدت شبعانه نوم ف گلت أنزل أسويلكم ريوگ

أم زينب :- ليش ي يمه تتعبين روحچ.
أنتي ارتاحي أحنه نسوي كلشي لا تمدين أيدچ و تجيسين شي أبد ما أريدچ تتعبين

زينب :- لا ماما شنو هذا الحچي.
أنه أريد أشتغل بالبيت شوي باللي أگدرله مو ألا هواي شغل

أم زينب :- بكيفچ بنيتي بس لا تضغطين على نفسچ بالشغل ريحي شوي

زينب :- صار ماما.
بعدها گعد الكل من النوم صادف يومها سبت وماكو دوام ف التمينا كلنا على الريوگ ضحك وسوالف وأنه أباوعلهم شلون مندمجين سوه وأبتسم.
مر اليوم كلش عادي ساعدت ماما والبنات بشغل البيت ولعبت علاوي أبن أخويه وسولفت وي رواء و كوثر وهدى.
بالليل راحن كوثر وهدى لبيت عيالهن بقينا گاعدين أنه وأهلي بالصاله للساعه ب ١٢ وربع بعدين گمت حتى أنام...

زينب :- أنه أترخص راح أروح أنام

أبو زينب :- براحتچ بابا

أم زينب :- تغطي زين بنيتي

زينب :- صار ماما.
تصبحون على خير

الكل :- أجمعين وأنتي من أهله

زينب :-رحت لغرفتي بدلت ملابسي وتمددت على الچربايه بس ما گدرت أنام.
أخذت موبايلي وفتحته لگيت كومه رسائل من زهراء و ريهام ف رديت على رسائلهن.
زهراء چانت ساده النت بس ريهام متصله وبس وصلتها الرساله ردت عليه...

ريهام :- صدگ چذب وينچ یمعوده والله بالي يمچ

زينب :- أسفه ريهام بس والله ما گدرت أراسلچ

ریهام :- خير زنوبه شنو صاير وياچ أحچیلي أكو أحد مضوجچ

زينب :- بهاي الأثناء فتحت زهراء نت ودزتلي رساله...

زهراء :- هلو زنوبه شلونچ يروحي مشتاقتلچ

زينب :- بعد عمري أنه الأشوق.
أنه عايشه أنتي شلونچ

زهراء :- بالي كله يمچ والله

زينب :- يسلم بالچ.
بس لحظه أنتظريني زهوره هسه أحاچيچ
زهراء :- براحتچ حبي +

زينب :- رحت للمحادثه الجماعيه اللي بيها أنه و ريهام و زهراء وگلتلهن...
تعالن هنا نحچي بنات

ريهام :- هلو خبله زهراء

زهراء :- هلوات جگمه ريهام

ريهام :- أنچبي أم الوصخ

زهراء :- ما غيرچ الوصخه الخايسه

زينب :- هن يحچن هيچ وأنه أضحك عليهن من گلبي لأن گلوبهن بيضه ما بيها أي خبث وحسد.
گلتلهن...
بنات أريد أگلچن شي

ريهام و زهراء :- گولي

زينب :- حيدر البارحه طلگني

ريهام :- زينب تحچين صدگ

زهراء :- گولي غيرها حبابه گولي أشاقه

زينب :- هذا الصدگ.
البارحه طلگني ورجعت على بيت أهلي

ريهام :- وشگال لآهلچ لیش طلگچ

زينب :- گاللهم أنه حللت وگالولي ما يصير عندي أطفال وهي تحاليلها كلها زينه وفوگ الزينه وأنه ما أريد أظلمها وما ألها أي ذنب تنحرم من الأمومه

ريهام :- حرمت عليه عيشته أن شاء الله وحرمت عليه الجنه بجاه الحسن

زهراء :- زين أهلچ شگالو وشنو رد فعلهم وشسوولچ

زينب :- أهلي ما حملوني مسؤوليه اي شي وهم اللي هدوني وما يقبلون أي أحد يحچي وياي ويذب عليه اللوم وعاملوني أحسن معامله وأمي ما تقبل حتى شغل بالبيت أشتغل.
الله لا يحرمني منهم على هاي الوگفه اللي وگفوها وياي وما عافوني

ريهام و زهراء :- الحمد لله

زينب :- أحمده دائما وأبدا لأن ما خلاني أنذل وأنظلم من تطلگت و وگف وياي بمحنتي

ريهام :- لا تفكرين بشي يعمري وكلشي صار وياچ أنسي صار ماضي وأن شاء الله الجاي للأحسن

زهراء :- الله يحبچ زنوبه لأن خلاچ تعرفين حيدر وما خلاچ تبقين وياه على عمى عيونچ وبالأخير تتندمين لأن أستمريتي وياه.
وأنه متأگده راح يعوضچ بالأحسن.
أنسي كلشي حبي هي هاي الدنيا يروح نعال ويجي نعال أحلى منه 😂

زينب و ريهام :- ههههههههههه 😂😂😂

زينب :- شكرا لأن رفعتي معنوياتي

زهراء :- جسر للطيبين وللحلوين هم 😍

ريهام :- يعني قصدچ جسر ألي مو لو مو مو

زهراء :- أنه گلت للطيبين وللحلوين أنتي شدخلچ.
بس لا عبالچ آنتي حلوه

ريهام :- حلوه ونص

زهراء :- ذبانه بحلگچ ترگص 1

زينب :- هههههههههه 😂😂😂
كافي ولچن بطني گامت توجعني من الضحك

ريهام :- تدوم الضحكه يروحي.
أي هيچ ضحكي وضربي كلشي عرض الحايط

زهراء :- من فدوه للضحكه حبي.
خلي كلشي وراچ ومن هل ساعه أبدي حياة جديده

زينب :- أن شاء الله حبيباتي.
يلا أخرتچن روحن نامن وراچن دوام الصبح
تصبحن على خير

زهراء و ريهام :- وأنتي من أهله.

زينب :- بعد ما حچيت وي البنات أرتاحيت حيل.
الله لا يحرمني منهن لأن هن الوحيدات اللي يعرفن شلون يخلني أضحك من گلبي.
گلتلهن روحن نامن لآن باچر وراچن دوام الصبح بس أنه ما گلتلهن ما راح أداوم باچر ولا يمكن راح أداوم لأن ما أعرف شلون أواجه زملائي إذا عرفو أنه تطلگت ولا أعرف شراح ينحچي عليه هم