KARAANG NAPTA

ARIES

••LALAKE••

Ang lalake nga bata nga matawo sa inigsubang sa Bitoon Aries. Natingban sa kakugi sa pagdumdum sa iyang mga buluhaton adlaw-adlaw. Kinasingkasing ang iyang pagtrabaho. Sa ingon niini, malinawon ang iyang pagpuyo. Apan, pagbuot sa palad nga dili siya daling mabahandion. Usa ka makahimo niyang dato sa kaulahian.

Sa iyang kabatan-on, siya mangguiolawon. Maulaw mopahayag sa iyang gugma. Kon ang babaye nga makasabut sa iyang gibati, magpakita ug gusto kaniya ug mohatag usab ug dalan ang makabaton sa iyang kaisog sa pagtukas sa iyang baba aron sa paghikyad sa iyang gugmang tim-os. Apan kon ang babaye mopaidlas-idlas, kining lakeha moidlas usab. Bisan unsa pa kadaku sa iyang gugma dili mogukod sa babaye. Kon mangitag higayon nga makasulti siya sa iyang tuyo. Siya mahigugma wala nay liso-liso ang hunahuna. Ang iyang panumpa mosangpot gayud sa atubangan sa pari.

Buotan siya ug matinahuron, malantip ang salabutan. Tigtiaw apan dili buot sa hilabihang tiaw, malagmit masuko. Tawo nga wala makaila ug pagbudhi sa iyang kahigalahan. Siya modapa kanimo ang tibuok niyang kinabuhi manalipod kanimo.

Maayong maglikay sa kabaw ug baka kay signus niya ang sungay sa hayupan. Sa panuigon 22 ihinagbo niya ang mapait na balatian. Kon mag-ampo lang siya ni Bathala ug magtapat sa iyang lihok. Makatagamtam siya sa kagulangon nga 75 ka tuig. Mapinanggaon sa iyang kapikas sa kinabuhi ug maayong moatiman sa kaugmaon sa iyang mga liwat.

••BABAYE••

Ang batang babaye nga mogula sa hayag sa kinabuhi atol sa pagsilang sa Bitoon Aries. Tugob sa kapiskay ang lawas. Ang iyang kamot daw gihimo alang sa trabaho. Sayon tudluan sa mga buluhaton. Kon makapaniid lang siya sa usa lang ka higayon sa usa ka tawo nga magbubuhat. Sa sunod higayon siya mahibalo na dayun nianang buhata. May pagka laken-on siya, malison ang iyang lawas. Wala siya'y madanihon na maanyag sa babaye, may pagkaisog ang iyang panagway ug panulti sulti. Dili kuyapan kon magtan-aw siya sa dugong mag-agas sa samaran kay matig-a ang iyang balatian.

Sa iyang pagkadalaga, ang mga ulitawo dili mo asi-asi pagdotdut kaniya kay pintok ang iyang pinulungan. Tagsa ray sulti motubag dayun. Apan ibabaw niining tanan, aduna siya'y malumong kasingkasing ngs nagtipig sa tinuod nga gugma sama sa ubang babaye. Malipay siyang mamati sa mga amoral ingon man sa pagtubag. Kon imo siyang haranahan, ayaw pagbinuangi sa kanta aron dili ka hibalikasan o higukdan.

Kon maminyo, mahimong maayong asawa basta ayuhon lang sa pagdala sa iyang bana. Kay kon dili, siya numero unong bagutbotan nga asawa. Kinahanglan maglikay siya sa kadautan. Madangat niya ang 75 ka tuig kon mabaskog lang ang iyang naturaliza.

••KAAYOHAN UG KADAUTAN NING ADLAWA••

Ang pagbukas sa tindahan o paugmad. Usa ka buluhatong maayo ning adlawa. Dibuynas, dili lisud halinon ang mga baligya. Panapton o makinarya, mahalin gayud. Pinili kining adlawa alang sa mohupot ug katungdanan sa lungsod o sa mga buhatan sa pagpatigayon.

Ang mais nga ipugas halayo sa butikul o kadaut sa dulon. Ang ubang tanum itisok mahigawas  sa kamatayon. Matambok ang tubo ug dagko ang bunga. Kon mosakay ka sa mga salakyanan sa mamala, walay disgrasya. Kon sa dagat, dautan.

Ayaw pagdula-dula sa korta ug uban pang mahait ang imong namataab kay sabug masamad. Ayaw pagpanghimungot. Kon magbugha sa kahoy, ayoha pagkupot sa sundang o palakol aron dili masamad ang imong tiil ug kamot. Likaye sa pagkatkat sa kahoy nga mahabog kay piligroso nga mahulog ka. Ayaw pamisita sa babayeng tinguhaon kay lagmit ka bombahan ug sulti sa ginikanan.