KARAANG NAPTA

VIRGO

••LALAKE••

Ang batang lalake nga mahimugso dungan sa pagsubang sa Bitoon Virgo. Mahimong tinamud sa katilingban. Kaaway sa mga butang hilas. Siya malipay kon ang iyang mga silingan, magasubay sa kalinis ug katarung sa ilang pagpuyo sa kalibutan. Dili gusto sa mga tapok tapok. Apan diya numero unong matinabangon sa magahangyo sa iyang kaluoy. Barugan ang iyang pulong ug igmat ang iyang salabutan. Kon makahigayon sa pagtunob sa tag-as nga tunghaan. Siya mosidlak ibabaw sa iyang mga kauban. Kutob sa iyang hibasahan tagsa ray dili niya masaulo.

Kumpas ng mamulong. Ang manggula sa iyang baba pulos undanon nga makadani sa kataha ug kaintap sa tanang mamati kaniya. Maayong mobugno sa kalisdanan. Mopahiyum sa taliwala sa kaparutan sa iyang mga tinguha. Samtang buhi pa siya malagmit makab-ut niya kutob sa iyang tinguhaon gumikan kay dili siya molunga sa paggamit sa iyang kusog ug utok.

Huyang siya alang sa babaye. Daghan siyang pinaangkan. Apan ang iyang mga anak sa gawas iyang angkunon ug hatagan ug kwarta. Abuton siya sa makalilisang sakit inig 30 niya. Kon kaluy-an siya ni Bathala, mopahimulos siya sa iya kinabuhi hangtud 85 nga panuigon.

••BABAYE••

Ang batang babaye nga matawo dungan sa pagsilang sa Bitoon Virgo. Ulipon sa hudyaka ug awit. Sa gamay pa daan iyang nang mapakita ang iyang pagka maayong tingog. Kalingawan sa iyang ginikanan ug mga silingan tungod sa iyang pagka maayong mulaylay. Pintok usab nga manulti sulti nga kahimut-an sa tanan. Mahihigmaon sa mga pundok pundok. Dili masakna bahin sa pagpamiesta o pagtambong sa mga hikay hikay. Ang sapot nga suwagi ang buhok nga maoy iyang kinaham.

Daghan ang magpaluhod ug magpakilimos sa iyang gugma. Apan ang iyang pagkahimilimaoy makalangan sa iyang kaminyuon. Daghan ang mga hiyas nga iyang gikinahanglan sa lalake nga iyang mabana. Mahimo siyang mapinanggaon nga asawa ug inahan. Maabi-abihon sa iyang mga higala ug kababayan. Lain lain ang mga sakit nga mohulga sa iyang kinabuhi. Apan gumikan sa iyang hugot nga pag-ampo kang Bathala siya maluwas ug makatagamtam sa kagulangon nga 77.