KARAANG NAPTA

ACUARIUS

••LALAKE••

Ang batang lalake nga mahimugso dungan sa pagsubang sa Bitoon Acuario. Makaangkon sa maayong kapalaran bahin sa kahait sa utokan. Undanon ang mga bunga sa iyang pangisip ug batid mogamit niini sa pangatarungan. Maila sa pagkamaayong mohan-ay sa iyang hunahuna sa atubangan sa kadaghanan. Igmat mamulong ug molantugi.

Samtang higugmaon niya ang dapit nga gimat-an niyag kahayag. Ang iyang damgo mao ang paglangyaw ss laing kayutaan diin didto iyang hipalgan ang kalipay ug kaayohan ss iyang pagkatawo. Kon mahitabo man ugaling nga maiya ang kapakyas sa laing kayutaan, mahibalik siya sa iyang lungsod. Ug sa dili madugay iyang makab-ut ang butang mapuslanon nga nahipus sa panaw.

Malumo ang iyang kasingkasing alang niadtong matinahuron kaniya. Apan, usa ka mapintas na kaaway kon pakitaan sa dautang taras. Dili hakog, apan hilabihan modumot kon maoy hakugan.

Gawas nga piligriso kaniya ang paglabang labang sa lawod. Lagmit: siya masamad ug sulod sa iyang kinabuhi motakboy ang daghang balatian. Mag-antus siya sa dakung sakit inig abot sa ika 30 ka tuig sa iyang panuigon. Kon hugot ang iyang pag-ampo sa Diyos maliwas siya ning makalilisang sakit. Wala nay piligrosong balatian ang moabot kaniya ug kon kusog ang iyang naturaliza makapahimulos siya sa kagulangon nga 82 ka tuig.

Mabuligon sa kahuyang sa lungsudnon, ingon sa pangilin. Mahimong amahan sa mga anak nga tugob sa iyang pagpangga ug usa ka solundong bana.

••BABAE••

Ang batang babaye nga molusad sa kalibutan iniggula sa Bitoon Acuario. Katahaan uyamot ug tahuron sa mga tawo. Bugnaw ang buot. Malisud patuhu-on sa wala niya makita. Kinaiya niya ang magpalutang gayud sa matuod nga kamatuoran. Kaaway niya ang pagpanlimbong. Ang iyang nawong garbusahon ug dili usab hilabihan kasayag.

Kon hatagan sa iyang higayon makakab-ot sa tag-as nga kaalam ug makahupot sa mga maayong katungdanan. Ang iyang gugma muturok dili tungod sa kidlap sa buwan. Kon dili tungod sa kaligdong ug pamatasan sa mangulitawo kaniya. Walay kalauman alang kaniya ang lalake nga magminaut.

Gusto mohiling hiling sa mga basahon hangtud hikalimtan usahay ang pagkaon ug igong pagpahulay. Dili makatan-aw'g buhat. Natawo siya alang sa panguri-kuri sa panimalay. Angay likayan niya ang pagpalabi sa buhat o pagtuon kay kun dili, takboyan siya sa sakit nga hayan makada-ut sa iyang lawas.

Mosangko siya sa kagulangon nga 62 ka tuig kon mag-amping lamang siya sa lawas. Kon dili mamatay siya kay mag-agi siya sa sakit hangtud sa 35 ka tuig ang panuigon. Kinihanglan likayan ang pasmo sa kusog. Ibutang sa lugar ang pagpanghilam-os, paghugas ug tiil ug uban pa.

••KAAYOHAN NING ADLAWA••

Ning adlawa, daghang kaayohan nga makuha ang tawo. Moturok ug molambo pag-ayo ang mga tanum nga iatol pagtisok. Panahon i-abli sa mga kaingin sa lasang kay luya ang mga panulay ug taginbanwa. Kon mangisda ka, ubay-ubay ang isda nga makuha. Milagrong mobaot ang disgrasya kon magsakay sa mamala o sa dagat. Ang mananagat masadya ning adlawa kay labaw sa kasarangan ang kuha. Layo sa kadaut ang magbatas sa kawayan ug ang magpuril sa kahoy alang sa haligi sa balay. Maayong ipapad sa nipa ug itumba sa mga haligi-on kay dugay magabok.

Kon ikaw magpapatigayon pahimudsi ang pagpamasin ug ang pagpamalit kay ang mga baligya nga imong pakyawon atol ning adlawa dali nga halinon. Kuninitan sa mga suki. Panahon usab kini sa pagpamalit ug baboy, kabaw, manok o ubang pang hayupan nga mapalit ug mabaligya.

Ang makahupotsa bisan unsang katungdanan ning adlawa matawag nga palaran. Dili duol sa kadaut. Purong-purungan siya sa pagdalayeg kay malampuson ang iyang pagdumala.