KARAANG NAPTA

LEO

••LALAKE••

Ang batang lalake nga molusad sa kalibutan atol sa pagsilang sa Bitoon Leon. Magabaton sa kabangis sa mananap nga Leon. Apan, gipahiangayan usab siya sa kalumo sa karniro. But-an nga manlihok lihok, siya dali nga tuohan sa mga tawo. Ang mga inilang pangulo sa dakung balay patigayon sa kalibutan natawo ning Bitoona. Maayong mupahimutang sa ilang kapikas ug kahuyo. Kining bata hamilig kasingkasing ug putlig kinaiya. Gusto sa dumogdumog. Mahigugmaon sa bignubigni. Apan maloloy-on sa mga mahuyang ug tigulang.

Kusganon ug hataas ang lupad sa hunahuna. Madamguhon sa pagkab-ut sa kadungganan, bahandi ug himaya. Takus siya e ampo sa iyang gunikanan. Ang kainit, kabalaanon ug kakusog sa iyang paglantaw sa unahan malagmit motaral kaniya sa kapildihan.

Kon mahigugma sa usa ka babaye, pintas nga mopalusot sa iyang tinguha. Walay butang na dili niya buhaton aron madaug ang iyang gugma. Apan, dali rang mohupas ang iyang gugma tungod sa pagkadaghang babaye nga iyang ulitawhan. Humok siyang sugton, iya lang dayong kalimtan ang iyang saad. Ang makaayo kaniya mao nga wala siya'y tinguha sa pagpukan sa dungog sa babaye.

Ayaw siya supak supaka pag-ayo kon maglantugi kamo. Uban-ubani sa hinay ang iyang hunuhuna. Alam-alaman mo siya. Kon imo siyang supakon, mosilaub dayun ang iyang kasuko. Dili maminaw'g katarungan. Matagamtaman niya ang kinabuhi sa bahandianon. Walay tumbas ang iyang kakugi. Talagsaon ang iyang pagkamaayong mutipig sa iyang pinangitaan. Gumikan sa pagkamaloloy-on, sagad mahurot ang iyang bahandi.

Piligroso kaniya ang dagat. Mag-agi siya sa upat ka dakung sakit. Ang labing bangis nga balatian motungha kon moabot na siya sa kagulangon nga 40 ka tuig. Kon kaloy-an siya sa Dios mosangko siya sa kahimayaan sa 74 ka panuigon.

••BABAYE••

Ang batang babaye nga motungha sa kalibutan dungan sa paggula sa Bitoon Leon. Sangkap sa katahum sa panagway, aduna pud siya'y katam-is na kagawian. May diyutay siyang pagkalaken-on ug kini maila sa iyang pagkalagsik mambubuhat.

Ubay-ubay ang mga kasingkasing nga maghapa sa iyang tiilan aron pagpakilimos sa iyang kaluoy. Silang tanan sa walay pagpili, itang hatagan sa gugma ug sa katapusan iya usab nga balibaran sa minatarung. Kon mahiuyon siya sa batasan sa lalake. Iyang hatagan sa iyang kasingkasing ubos. Sa saad nga mahalon gayud sa maong lalake. Kon makamatikud sa dautang tinguha. Siya mobiya sa walay popahibalo uli sa maayong kabobot-on.

Mahimong usa ka asawa nga mabinati-on. Dili palaaway sa iyang silingan. Hinonoa, siya manghatag ug sud-an, prutas ug uban pa. Gusto siyang magluto sa lamang sud-an ug kalipay niya nga mahitilawan sa iyang mga higala ang lami sa iyang buhat. Bulahan ang iyang mga anak kay siya makahupot sa dakung katigayunan. Makapatukod ug mga habog ug mahal nga balay. Makapalit ug mga mahal nga alahas.

Malagmit siya taptan sa sakit sa baba sa atay ug sa sulog sa dugo. Ang matim-os nga paghalad sa Diyos pinaagi sa pulong ug buhat, ang iyang paglikay sa mga kasal-anan, maoy makabulig kaniya sa pag abot sa panuigon nga 74.

••KAAYOHAN UG KADAUTAN NING ADLAWA••

Kining adlawa maayong ilusad sa bag-ong sakyanan,maayong ipamalit yg mga baligya, itukod sa balay, ibuhi sa puhunan sa pagpatigayon ug uban pa.

Apan dautan nga ipanaw sa dagat kay kusog ang hangin ug dagku ang balud.