••LALAKE••
Ang Bitoon Libra nga makaluha sa batang lalake. Nagpaila nga ang bata, gipahiangayan ni Bathala sa kakugihan ug uban pang buluwanong mga hiyas. Kining bataa sukad sa gamay pa mudani sa mainitong pagpangga sa iyang ginikanan tungod sa pagkahilumon ug pagka matinahuron sa iyang mga magulang ug edad. Dili magmug-ot kon imong suguon, kanunay ang saya sa iyang panagway.
Sa batan-on pa, magdamgo siya sa pagsuroy sa lagyong dapit.Ang iyang amahan ug inahan supak nga mahilayo siya. Apan sa ngadto ngadto sila malukmay sa iyang bugnawong hangyo nga tugotan lang siya sa paglangyaw. Sa lagyong kayutaan iyang hipalgan ang dakung katigayunan. Makahupot siyag bahandi, makapatindog ug dakung pinuy-anan.
Putong nga pagkatawo. Tagsa ray sulti. Kon dili sugton sa babaye sa unang hangyo, dili na usab siya magtagad. Kon maoy mahigigma, i-unong ang tibuok niyang kinabuhi. Magapamahit sa iyang dila kon limbongan.
Abuton siya sa dakung sakit sa panuigon 7, 13 ug ika 37. Kon kusog ang iyang naturaliza ug kinasing-kasing ang iyang pag-ampo sa Diyos. Siya muabot sa kagulangon 68 ka tuig.
••BABAYE••
Ang batang babaye nga natawo dungan sa pagsidlak sa Bitoon Libra. Mahuyo ug sulundon ang pamatasan. Hinayun manulti-sulti, puno sa kaluoy ang iyang kasingkasing. Mahigigmaon sa kasaya ug lingawlingaw. Hinugupan siya sa daghang maghahalad. Maayong mubalibad sa mga ulitawo nga wala niya higugmaa.
Mahimong sapiang magpapatigayon. Apan, kinahanglan nga sa gamay pa siya e-ampo na sa iyang ginikanan. Pahinungdan sa bug-os nga paghalad sa Dios. Sanglit nahisulat sa iyang palad nga dali siyang maligas ning madanlog nga kalibutan kon maminyo. Tudluan siya sa paghimog dibosyon sa diyutay aron inig kadaku na niya. Siya na mangaliya kang Bathala nga ipalayo siya sa kadaut.
Masabug siya sa pagbati sa sakit sa kasingkasing, sa baga ug sa ginhawaan. Mosangko siya sa ika 67 ka tuig kon kaloy-an siya tungod sa iyang debosyon.
••KAAYOHAN UG KADAUTAN NING ADLAWA••
Kining adlawa dautan kon maghalad sa babaye kay lagmit singkahan ug yam-iran ang tuyo. Apan maayo nga isugod sa bisan unsang buluhaton. Maayong ipamalit sa mga baligya kay sayon ang pag ginansiya. Kon magtipig sa kwarta, hunit nga malugwa pa. Gawas kon kinahanglanon na gayud kaayo.
BINABASA MO ANG
KARAANG NAPTA
SpiritualNamugna ang NAPTA aron paghatag kanimo'g kalingawan ning malaayong baktas sa kalibutan basin pa magaan-gaan ang mga buluhaton nga imong ginadala ug matumbuyan sa katawa ug kalipay ang mga kasakit sa imong kasingkasing. Ang dakung matuod mao nga kita...
