KARAANG NAPTA

SCORPIO

••LALAKE••

Ang batang lalake nga motungha sa kalibutan sa pagsilang sa Bitoon Scorpion. Kinganlan nga alaut. Sanglit nahisulat sa iyang palad nga sudlan niya hapit ang tanang kahilayan ug kasal-anan sa yuta. Kinahanglan nga magbantay kaniya pag-ayo ang iyang ginikanan. I-ampo siya sa Diyos aron motipas ang iyang dalan gikan sa kahilayan ngadto sa katarung. Kutob sa makapuling buhat nga iyang buhaton kinahanglan puohaon sa ginikanan.

Tag-as ug sulti, siya magpaila nga siya ang hari sa tanan. Abug lamang daw ang ubang tawo alang kaniya. Magpatakag yabit sa mga pulong huwabon ug makasamad sa kasingkasing sa laing tawo. Maayong mupatusotuso. Andakan. Ang kaigmat sa iyang utok gamiton lamang sa sugal ug pamabaye. Sa gamay pa magpadayag na sa salawayong paagi sa pagpangawat. Ilhon nga pangulo sa mga bata nga mahilabtunon sa butang sa laing tawo.

Kon tunay ang pag-ampo sa iyang ginikanan sa atong Manunubos. Ingon man kon manlibasug kining bataa sa pagbuhat sa dautang kinaiya. Siya mahimong tawo nga dungganon ug inila. Ang iyang kahait sa salabutan maoy hinagiban batok sa kaburong. Makab-ut niya ang hataas nga kaalam. Siya ikatudlo nga pagtulon-an sa mga ginikanan nga maibog sa iyang kabuotan ug kakuguhan. Kaaway niya ang mga buhat nga hiwi ug salbahis. Siya ang mangulo sa pagkumbati sa kahilayan. Hilumon apan konao nay musulti, paminawon sa uban tungod sa katin-aw ug kaundanon sa iyang pamulong. Makahupot siya sa dakung katungdanan sa mga balay patigayon kun buluhatan sa kagamhanan.

Kon siya dili mapitol sa ginikanan mahimo siyang bangis nga ulitawo. Kinsang bugtong tuyoao da ang pagbuong sa kadungganan sa kababayen-an. Apan kon dunggon sa Diyos ang pag-ampo sa iyang inahan. Siya ilog-ilogan sa kadalagahan, kay ambungan man siya ug dili mapasipad-on sa kaputli sa babaye.

Malagmit siya hihulgan o hidat-ugan sa mga mabug-at. Busa siya maglikay aron siya maluwas sa kalit na kamatayon. Modangat siya sa ika 67 ka tuig na panuigon.

••BABAYE••

Ang batang babaye nga matawo atol sa pagsidlak sa Bitoon Scorpion. Siya magasabak nga daan sa hamiling kaugmaon. Bulahan ang iyang matam-is nga kagawian. Sanglit daghan ang iyang kahigalahan nga maoy makabulig kaniya sa pagkaplag sa dakung katigayunan. Abunda sa kusog ang iyang kaugatan. Lagsik manlihok-lihok o manulti-sulti. Isog ang iyang nawong. Walay kaambong ang iyang panagway. Apan, maanghop ang iyang kasingkasing. Isipon siyang mutya sa iyang mga silingan ug higala. Matinabangon sa anaa sa kalisud ug kapaitan. Dili niya igsapayan ang salapi sa ngalan sa panaghigala.

Pipila ra kaulitawo ang madani pagpahayag sa gugma kaniya. Apan kining mga tawhana tinamud sa katilingban. Maayo'g pamarug ug katahaan. Kining babayhana dili maantigong muluib. Kon mahimong asawa. Siya dili gusto sa hilas-hilas sa atubangan sa kadaghanan. Masuko kon paraygan sa iyang bana sa atubangan sa mga tawo. Solundong asawa ug makugihong amahan.

Makatilaw siya sa daghang samad nga magagikan sa nagkalainlaing hinungdan. Kon makusog ang iyang naturaliza, mopuyo siya dinhi sa silong sa langit sulod sa 77 ka tuig.

••KAAYOHAN UG KADAUTAN NING ADLAWA••

Maayong bugnawon ang hunahuna ug kasingkasing ning adlawa aron mahilayo sa kadaut. Daghang buno ang mahitabo atol ning adlawa kay managlalisay ang magbinayluay sa isigkahunahuna. Kon pagtuo mosabug, maginit ug mahimong away ang ilang mga lalis. Kon dunay maayong higayon alang kanimo ning adlawa pahimudsi dayun. Ayaw palabya. Kon imong palabyon, lisud na nimong igkita pagusab ang maong kaayuhan.

Sama sa kidlat ang pagturok sa hunahuna sa tawo ang mga higayon ning adlawa mokilab lang upod. Busa kon anaay butang higanansiyahan, palita dayun kay makakapin ka. Kon tanyagan kag katungdanan dawata diha diha dayun. Laumi nga mabulahan ka.

Bantayi ang inyong mga butang o hayupan kay kon mawala lisud ng hikit-an bisan unsaon ug pangita. Dautan kining adlawa alang sa kayanon. Sanglit kusog ang balud sa dagat ug kusog ang huros sa hangin. Mahitabo nga mangilid o malunod ning adlawa.