1
عائلة!
كلمة عادية ولها معنى كبير،أب أم أخ أخت وبمجرد واحد يغيب تغيب الدنيا في عيونك، باهي لو غاب عنك كل شيء وفجأة لقيت روحك لا أب ولا أم ولا أخ ولا عائلة مكان غريب بس ماتعرفش غيره، وفجأة تلقى روحك مجبور تعيش مع عالم يقول إنه عائلتك، بين الطيبة والشر والراحة والخوف والكبت والحكي والحقد والحب
- معش تقوللها هيلانة، اسمها هيلين
-بكرة ترد بلادها ويضحكوا على اسمها
- ومن قالك حنردوا للخرابة هذه، فرنسا هي بلادها وهنا مكاننا يا عبدو
- عبدو مش دايملك ولا دايم لهيلانة ياسارة
- غير الموضوع عشان أنت النقاش معك عقيم
كل هذا كان يمر في ذاكرة هيلين زي ماتحب تناديها أمها وهيلانة زي مايحب يناديها عبدو بوها، كل من شاف هيلانة وبوها وأمها تعجب، كان السؤال يبان في عيونهم، أب قزم وأم مصابة بالبهاق والبنت في قمة الجمال !
كان لازم تواجه المجتمع ولأنها ديما تعودت على المواجهة قررت تواجه حقيقة موت بوها وأمها في حادث انفجار إرهابي وتكمل باقي حياتها في فرنسا بروحها
يوم اثنين ثلاثة، لين تعبت من الوحدة وكان لازم تلقى حد يونسها في وحدتها، أقارب جيران أصحاب، بس حبها للعزلة بسبب خوف بوها وأمها عليها خلاها تستصعب العيش في سلام مع مجتمع لطالما كان الأب يقنع فيها بإن مش مجتمعها ويحث فيها تمارس تقاليد وعادات بلادها وأم ماصدقت افتكت من البلاد هذه وطلعت منها وعاشت عيشة أخرى خلتها تحاول تنفي انتماء بنتها لأصلها
-السلام عليكم عمي
-وعليك السلام تفضلي من معاي
- عمي أنا هيلين
- من هيلين
-هيلانة يا عمي بنت خوك عبد المجيد
- مرحب يابنتي كيف حالك معش عرفت نوصل فيك بكل من موتة المرحوم والمرحومة
- عمي حسن أنا تعبت من هنا بروحي أنا يبي يجي يعيش معكم
- ياريت يابنيتي تعالي ونا نستقبلك في المطار، ولا نقولك خالد ولدي حنقدمله على تأشيرة ويجي وياخذك من غادي بس غير يتمن أوراقه ، أرجيه ياهيلانة ماتجيش بروحك.
تغيير جذري لكل شيء لعائلة كاملة تعودت على التماسك من أيام الجد الي شرى قطعة أرض كبيرة وأول ماتشببوا عيالها بدا يبني لكل واحد فيهم حوش وعشان يتقي شر الغيرة كان كل الحواشين نفس البناء ونفس الأثاث ونفس التكاليف، ومات الجد وجوا الأحفاد وكبروا وقعد عبدو القزم المنبوذ في عائلته وماحد يتعامل معه يجري على ورثه من بوه ويتشاجر مع خوته الثلاثة على نصيبه في الميراث بحكم إن بوه مات وهو صغير ومابنالش حوش زي خوته
مل عبدو من الوضع واشتغل في رزق بوه لين لم فلوس وسافر فرنسا وبعد استقراره تعرف في مقهى يشتغل فيه على سارة المغربية الي كانت العنصرية مسببتلها أزمة في حياتها بسبب لونها المختلف بين أبيض شديد البياض وقمحي كأي بشرة عربية، كانت مؤمنة بسبب شكلها بمقولة ظل رجل ولا ظل حيطة، وشافت إن عبدو حتى وهو قزم أفضل من مافيش وتزوجوا وجت هيلانة الي توا عمرها 24 سنة.
___________________
ياسمينة "زوجة عم هيلانة" : سمعت بهيلانة
إيمان"مرات عمها الثاني" : بنت عبدو؟ كنها
ياسمينة: جاية بيعدي خالد ولدي يجيبها
-جديات، أمتى ؟
- لين يحصل أوراقه، حسن قاللها ماتجيش بروحك ندزلك خالد
- يابتي وهذه كيف بنخشوا فيها ؟ فرنسية مسكرة
- بالشوية نجيبوها تحت طوعنا
- يصير خير وخلاص، يارواسي"بنت إيمان" هيا القهوة خلينا نشربوها ونصبوا نصلوا
- هيا يا أمي حاضر
شهد"بنت حسن": سمعت بحبة الهيل جاية
رواسي: ههههه عنجدك من حبة الهيل؟
شهد: هيلانة بنت عمك
- عمي عبدو ؟؟؟
-أها
- الله عليك جو
- جو صار هههه بيعدي يجيبها خالد
- نعععععم وليش إن شاء الله مش ساد فرحت إنه سيب خطيبته
- جاتك هيلانة، خشيت ايميلها طح سعدها طررررف
- وين وريني
أرجي نديروا القهوة ونطلعوا للجنان نوريك.
__________________
ها شن قلت؟
خالد: تم ياباتي ماعندكش مشكلة توا نكلم صاحبي بلكي يلقالي شركة سياحة تطلعلي تأشيرة في أقرب فرصة
- تمام الله يريحك، تمشي تجيبها وتجي تعيش هنا بيننا، خوي عبدو فقري خاطي الجنسية مامعقبلها شيء، تجي هنا تحت عيني خير ماتديرلنا العار
- لا ياباتي شكلها محترمة، هي صح لبسها وشكلها جو اوروب بس والله شكلها محترمة
- وأنت وين ريتها
- أها لا غير كم مرة نخش نقصقص عليها ودزيتلها طلب مابتش تقبله
- تي وهذا كله تعرف ايميلها وماتقولليش
- أنت ماسألتش ياباتي، لو نيتك تدور عليها صح را قلت حتى قدامنا
- المهم توا نعتمد عليك خلاص؟
- كون هاني
______________________
