26
كلام ورا كلام وحروف متركبة في بعضها تصنع صدمات وعقلك قاعد يقولك لا مستحيل تكون هكي، لا مستحيل تكون مغفل للدرجة هذه، يعني كل هذا بدل ما كنت تاخذ حقك من الي ظلمك كنت تساعد فيه بيش يزيد يتمكن من شره وظلمه؟ هيلانة كيف قدرت تدير هكي فيك؟ كيف قدرت تستغفلك هكي؟ كيف حبيتها ياقلبي ؟ كيف بكيت لما كانت بتموت وكيف قلبك وجعك لما عرفت إنها أختك ومش من حقك تحبها وكيف توا قاعد تبررلها وتحاول تطلعها مظلومة؟ كيف حتسامحها ياقلبي؟
هيلين: خالد والله العظيم غصب عني درت هكي، ماكنت نحساب إني حنأذيك
خالد: اششششش ساد كذب تي حتى دوتك تسقمت وتميت تدوي بطلاقة، كل شيء فيك نحس فيه كذب، وأنت ورأس أمي ماني مسيبك ياسيلين لين ناخذ حقي منك ثالث مثلث
سيلين: عصام يرن
خالد: ردي عليه
سيلين:لا نخاف
خالد: هاتي نا نرد عليه ، ألو
عصام:أيوا من معاي وين صاحبة التليفون
خالد:صاحبة التليفون عندي ياعصام، يعني يعجبني إنك تقتل القتيل وتمشي في جنازته، يعني أنتم مخططين لكل شيء من زمان وجاي تنصب علي اانت وياها، المهم سيلين عندي وفلوسك، بعد تحصلهن تعاللي بيش نعطيك الباقي هذا لو حصلتهن، وبيننا المحاكم ياتتنازل ياكل كلام هيلين وسيلين سجلته ووراسك مانقلبها إلا عليك
عصام: تهدد في ياواطي، تي أعلى مافي خيلك أركبه ومصيري عارف مكانكم ومقتولين واحد واحد
خالد: توا نشوفوا من يصفق في الأخير
سكر خالد التليفون وخذاه من سيلين
خالد: نا بنطلع ونجي
هيلين: خالد ماتسيبنيش هنا معاها
خالد: يعجبني دور البراءة ، ماهو أنتن الاثنين واحد
هيلين: خالد بالله عليك
بحت فيها خالد من فوق لتحت وطلع وسيبهن مع بعضهن
سيلين: هه خزي على الدنيا وخلاص
هيلين: كله منك حسبي الله ونعم الوكيل
سيلين: ع أساس ضربتك على يدك نا
هيلين: خاطري نشوف نهايتكم كيف بس ، شن درتلك بيش تؤذيني هكي، شن درتلك بيش تعيشيني في ظلام وهلوسة
سيلين: ردي من وين ماجيت ياهيلين أمي غادي مع. باتك عبدو وحترعاك
هيلين: أمي تخلت عني زمان
سيلين: كنت عارفةإن المغربية مش أمك
هيلين: ماكنتش نعلم بشيء لين أنت حكيتيلي
سيلين: كذابةكنت عارفة بس توهمي في نفسك إنك مش عارفة، كنت عارفة بس كنت تتمني لو عبدو مات وتقنعيفي روحك بهكي لين صدقت أوهامك
هيلين: ماقدرتش نتحمل شوفته وهو بالشكل هذا
سيلين: عزقتيه في المستشفى وجيت هنا
هيلين:كنت نبي نهرب من كل شيء، حتى كوابيسي كنت نشوف فيه ميت ، وأحيانا نشوف فيه يستنجد بي
سيلين:وكذبت على خالد وصدقك
هيلين:كذبت عشانك
سيلين:هههه صدقتك أنا تي أنت جاية عشان ناوية تكذبي ياهيلين ولا نسيت إنك قلتيله إنك هربت من التفجير وسيبت بنتك ، ليش سيبت بنتك ياهيلين؟ نا أقنعته لما واجهته بإنك هربت قبل التفجير بيش مانشوهش صورتك وبيش نسمح صورتك قدامه ، أنت مشيت للتفجير وعارفة إن عمو عبدو ومراته في التفجير ، في أم عارفةإن المكان هذا بيصير فيه تفجير تسيب بنتها، أنت كنت تبي تقطعي كل شيء لك صلة به في فرنسا فما صدقت بقصةالتفجير، بس سبحان الله نصيبك عبدو يعيش مشوه سيبتيهوجيت وقلت إنه مات، ما تلبسيش دور البراءةياتوأمي وأنت أسوأ مني
هيلين: أنا كنت مريضةنفسيا من الي شفته مع كريم وجعيد
سيلين:وشن ذنب وردة والمرأة الي رباتك وعبدو الي بدل كل شيء عشان يسعدك ، واحدة بواحدة أنت قتلت الس كانوا أهلك غادي وأنت راضية ونا سببت في قتلةباتي ونا راضية، الشر مزروع فينا ياتوأمي
