8
أسمع كلام الصوت الي ينبه فيك ديما، أسمع كلام شعورك لما ينقبض اتجاهشيء لما يقول لك تراجع ماتتكبرش، ولما يقولك ابعد ماتقربش ولما يقوللك تكلم ماتسكتش، أسمع ضميرك لأنه ديما على صح.
شقة غريبة وجو غريب وهمجية ودبش معزق وقرف، خوف واشمئزاز من المكان وجو مش مريح، يارب عدي هالليلة على خير، ساعة وراء ساعة والقلب يدق مع دقات العقارب وانتظار مش معروف شن نهايته
غفت هيلانة في المربوعة ، على الأقل هو المكان الوحيد الي نظيف وبعيد عن كركبة عمر
دقات الباب نوضتها، دقة هستيرية وصوت يضبح على اسمها، حلم ولاجديات كأن الصوت داخل حلمها الهستيري بس لما فتحت عيونها اكتشفت إن الصوت حقيقي
-هيلانة أفتحي أنا أحمد، تي ياخالد مش قتلك اقعد في السيارة شن ركبك
خالد: حول، هيلانة أفتحي أنا خالد أفتحي بسرعة
فتحت هيلانة الباب باستغراب
خالد: لمي دبشك وهيا بسرعة
هيلانة: وليش
خالد: بعدين نفهمك كل شيء بالله عليك هيا
هيلانة: شن في
أحمد: عمر انقتل في عركة ووجودك هنا خطر مرات يجوا لشقته يحرقوها في أي وقت
- شنوووو شن تقول أنت، كيييف عمر كان معي كييييف يموووت لا يا خالد تكذب صح لا لازم يرد يكمل لي لازم يقول لي وين خويا ياااااخالد
خالد: هيلانة أهدي بالله عليك لمي دبشك وهيا هيلانة
أحمد خش للشقة : وين شنطتك وين حاطتيها، خش للمربوعة لقاها خذاها وطلع
أحمد: عندك شيء ثاني؟
هيلانة هزت راسها بالنفي بعدها تذكرت فونها خشت وهي تبكي جاباته وطلعت معاهم وسكروا وراهم باب الشقة
نزلت هي وأحمد سند خالد ونزلوا للسيارة
خالد: سادك بكا
- حكالي عرم حاجات وماكملش كلامه، كلمه واحد اسمه سليمان وطلع ياخالد
أحمد: خلاص أهدي نوصلوا للحوش ساهل
كملت هيلانة الطريق كله بكا لين وصلوا لحوشهم، لقت عماتها وإيمان مرات عمها في الحوش وقالبين الدنيا عزا والجيران ملتمين
خالد:ردي بالك على روحك
- ضروري نحكي أنا وياك
خالد: حنحكوا بس خلي الناس يروحوا، خشي توا
خشت هيلانة
نورة: من أول ماخشيتِ عيلتنا والمصايب فوق روسنا
صابرين: نورة كنك أنتِ وحدي الله ، تعالي ياهيلانة
خذت صابرين هيلانة وخششتها لدارها
صابرين: كيف مات عمك
- مانندريش على شيء، كنت معه وطلع وسيبني كلمه واحد اسمه سليمان وقالله صايرتله عركة وطلع، قعدت نرجى فيه تأخر ، لين جوني خالد وأحمد
صابرين: مهما دار يتم خونا، نار نحس فيها على عيلتناالي تطرطشت
- أنا صح عندي خو
صابرين: شنوووو
- عمر قبل مايموت قالها لي، باتي كاين متزوج أخت ياسمينة
صابرين: أها كاين متزوجها بس تطلقت ومعش شفناها ولا نندروا عليها وقتها سافرت ياسمينة تعالج على الحمل وخدت معها أختها تعاونها ومعش روحت لين ياسمينة جابت خالد أصلا باتك طلقها طول والطلاق مايجوزش لو هي حامل
سكتت هيلانة ومابتش تكمل كلامها وتأكدت إن الي في عقلها صح، زاد همها هموم ونفسيتها تدمرت بكل
- حاسة روحي تعبااانة نبي نرقد
صابرين:شن حكالك عمر أخرى
- ماكملليش
صابرين:ماترقديش، صبي استقبلي الناس عمك هذا
- كلهم حيقولوا وجهها شين على العيلة ، ما نبغاش نطلع.
صابرين: مانبغاش هه، صبي صبي الله يربحك ساد الهم الي الواحد فيه
طلعت صابرين وسيبت هيلانة في الدار دموعها على خدها شوية ورن تليفون هيلانة رقم غريب
هيلانة: ألو....
_______________
شهد: عمتي نديروا عشاء ولا شن
صابرين: لا عشاء لاشيء ، ديرن قهوة ودزي أحمد على فطير ولا بريوش ، وبكرة توا نطيبوا ولا نجيبوا من شي مطبخ
جمانة: الي يحق عمتي نورة وهي تبكي ماتقول هي الي كانت كلمة بكلمة هي وياه
صابرين: ماك ديما عركة مع أحمد لو يصيرله شيء تتحملي؟
جمانة: لا طبعا
صابرين: حتى لو باتك علم حيبكي عليه، هذا الأخ عمره ماينكره
رهام: وعادي هكي حيسكتوا على موته
رواسي: شن بيديروا يعني عارفتينا أنت مش شورنا المشاكل
صابرين: كل واحد يتحمل جزاء أفعاله، وجعنا بس كانت معروفة نهايته شنو من الي يدير فيه
شهد: هيا بنات تعالن مدن قهوة علي ماجاب أحمد حاجة الشاهي
رواسي: هيلانة وين
صابرين: تعبانة بكل في دارها
جمانة: توا نمشي نشوفها
