16
طلع خالد من المحامي مصدوم مش قادر يستوعب شيء، كل شيء فيه منهار منهز، يرطى في تأكيد من المحامي وتحليل لكل شيء قاله، والله أعلم شن حيصير ولا شن حيقول أخرى، قرر خالد يهرب من كل شيء ويختلي بنفسه شوية، مشى للشقة وأول ماخش شاف باب الحمام مفتوح ومعبى بدم هيلانة قعد يشوفله وبعدها انهار وطاح في الوطا كان يعيط بأعلى صوته بس كاتم فمه بيده ، دقايق وهو يطلع في حرقته بعدها صبا قعد يكب في مياه وصابون وبوطاس على الدم بيش يحوله وبعد كمل توضى وخش صلى
وااااو لك كم ياخالد ماسجدت لربك ؟ وين كان ربك لما كنت في عز خيرك وطيشك، يوم تصلي وعشرة لا، مستحيل يكون الي صار انتقام من ربي لأن ربي ماينتقمش ، ربي يختبر صبرك بس، خليك قوي ياخالد خليك قوي وتحمل الي جاك، حيبان كل شيء بس اصبر وتحمل
كان الصوت هذا في باله بعد كمل صلاته وبرم بيصبي لفت انتباهه على الطاولة ورقة صبا فتحها وهو مستبعد يكون جو الأفلام هذا صايرله وإن الورقة هذه من هيلانةقبل ماتموت
بس فتح الورقة ولقاها تقرير طبي بحالة هيلانة ومعاها ورقة صغيرة مكتوبة بالانجليزي
خالد أنا تعبت الشخصية السيئة أصبحت طاغية علي ، لازم نقتلها بيش نريحك ونريح روحي، هذا تقرير من طبيبي النفسي في فرنسا يثبت إني نعاني من مرض نفسي، سامحني أكيد حتنصدم لما تقرا الشيء هذا، حطيتلك في الشنطة كل شيء يوضحلك الحقيقة بس مايخليكش تكرهني، أنا آسفة ، أنا نحبك ، أنا مش أختك ياخالد، ابحث عن رشا وخليها تحكيك كل شيء واطلس مع ياسمينة وأسمع منها وأنسى قصة جعيد وابحث عن عدوك الحقيقي
هيلين.
_______________
شهد: أمي شنو هذا حشرات بكل
ياسمينة: تحملن
جمانة:المكان ضيق وحمام واحد ونحن وعيت عمي والله واجد
ياسمينة: شن تبنني ندير يعني
شهد: أمي ممكن تفهمينا
ياسمينة: شن نفهمكن
شهد: شن قصة رشا وأنت وعمامي وخالد
ياسمينة: رشا خشت في مكان حساس لوت دراعي منه، ماتوقعتهش تكون غبية في انتقامها للدرجة هذه
جمانة: كيف احكيلنا كويس ياأمي
ياسمينة: الي صار صار توا
جمانة: ماهو ماتجيش تكون كل الاتهامات شورك وأنت ساكتة
ياسمينة ولو دويت يعني شن بيصير
شهد: أقل شيء نقدروا ندافعوا عليك
ياسمينة: مع إني حالفة على المصحف مانقول هالكلام لكن الله غالب ، زمان عمك عبدو كاين منبوذ من العيلة وربي يسامحني كنت نعامل فيه معاملة شينة بكل وصلت بي نعامل فيه كيف العامل عندي كان طيب بكل ، ويتحمل على أمل لما يكوّن عائلة نحنوا عليه ونعطوه حقه، لين في يوم تطلقت أختي رشا وكانت متعبة هلي بعمايلها وفضايحها، لما لقيتها هكي جبتها عندي ومادرتش حساب عمر وفعلا صار الي صار وشفتها هي وعمر في وضع مش تمام قبل حتى ماتطلع من عدة الطلاق، تعاركنا مع عمر ولزيته من الحوش وحلف من يومها إنه ينتقم، باتك وعمك تبروا منه وماعطوشي حقه ومن وقتها وهو عدونا، بعد فترة تما طلب عبدو يكثر بإنه يبي يتزوج وكانت رشا طلعت من العدة فخطر علي ندفله رشا ونفتكوا منها، أختي كانت سمحة بصراحة وتلعب بجمالها وتجيب في مسة رجل وراها بيش يطلبوا يدها، وزوجناها بالغصب لعبدو بعد وافق، وأقنعناه إن مافيش واحدة رضت به بسبب شكله وتزوجت وهو شهر شهرين وسمعنا برشا حامل ، جانا وقتها عبدوكيف المجنون يعيط ويقول بنطلقها، قلناله ليش وهكي ماباش يقول وطلقها فعلا وبعد تطلقت اكتشفنا إنها حامل قلناله مايجوزش طلاقك، وقتها اضطر إنه يتكلم وقال إنه مايجيبش عيال وعنده أوراق تثبت هكي وشفنا الأوراق، وإن رشا خاينة ويانعطوه حقه يا أما يفضح بها تعارك حتى هو مع حسن ولزه ومسكين ماقدرش يدير شيء ولا ضميره سمحله يفضح بها فقرر يسافر، لما سافر كنت أنا لي فترة متزوجة وماحملتش ، اتفقت مع رشا تجيب العيل وأنا نربيه
شهد: يعني فعلا خالد ولد رشا؟
ياسمينة: لا رشا طيحت وتعبت بعد تطييحتها واجد وكنت أنا بنسافر ونعالج خذيتها معي وسافرنا وصار نصيب سبحان الله حملت طول بمعجزة من ربي وعلاج ودعاء رشا كانت في زواجاتها الأولات تحمل وكل ماتحمل تطيحه لأنها ماتبيش تجيب ومن كثر الي داراته سببلها الشيء هذا عقم حتى هي ومعش جابت حتى توا بعد تزوجت ماجابتش
جمانة: والعيل ولد من؟
ياسمينة: عمر، رشا استمرت علاقتها مع عمر بعد تزوجت عبدو
شهد: يناعلي ياويييلك ياعمي أكيد توا يتعذب على الي داره
جمانة: باهي كيف عمي عبدو عنده عقم وعنده هيلانة
ياسمينة: هذا الي مازلت نبي نتأكد منه، وكنت مؤيدة تجي هنا بيش نتأكد
جمانة:ليش مادويتيش؟
ياسمينة: باتك محلفني معش نفتح المواضيع القديمة
شهد: نحس في راسي بيطربق ، هيلانة أصلا حتى شكلها مش شورنا بكل جمالها غريب وحسب ماشفت في صورة عندها حتى أمها جميلة بس مش شقراء يعني ممكن تكون مش بنت عمي وبعدين شن علاقتها بالإرهابي الي حكى عليه خالد، الموضوع مايخشش عقلي من لاخير
ياسمينة: كم مرة حسن دوا مع عبدو يحلف إنها بنته وإنه تعالج ولما قاله مستحيل قاله ليش ماهو حتى أنت جاك عيل بعد سنين ولا حتى هو مستحيل!
___________________
خالد: أيوا
المحامي: أهلين خالد كيف حالك
خالد: نبي نشوفك ضروري
المحامي:والله توا صعب بكرة الصبح نتلاقوا في المكتب
خالد: تم رن علي الصبح
المحامي: أحمد خوك طلعوه را وشالوه للحبس
خالد: جديات
المحامي: والله امبدري شوية كلمني واحد نعرفه غادي وقالها لي
خالد: تمام توا نمشي ونشوف شن الموضوع
المحامي: تم
سكر خالد ودس الورقة متاع هيلانة ومشى للمكان الي فيه قيس وأحمد ومابوش يخلوه يشوفهم، طلع شور المستشفى وبعد ماسأل على حالة هيلانة خطر عليه يطلب يشوف الرجل الي ضربه أحمد ووافقوله يشوفه من الشاشة
خش خالد ولما شاف انصدم لأن الي في المستشفى مش نفس الي في الصورة الي ورتها له هيلانة بكل ....
تهيالي بدت توضح الرؤية ؟❤😂
