24
كيف يمكن لعقل إنه يستوعب كمية مصائب وكل مصيبة معقدة أكثر في نفس الوقت الي الهروب منها شيء مستحيل، ولد عمك مات ظلم وخوك خش في عقل مش عقله وحبيبتك مهددة وأختك مدايرة فيك العار وبات مش في الدنيا بكل أعداءك كثروا بعد ماكنت تمشي جنب الحيط، أو بالأحرى كنت بين تماسيح ووحوش مرتدية وجوه البراءة ، عائلتك تبرت منكم على شان كذبة انتشرت وهم الي نشروها بلا مايعرفوا الحقيقة، حتقول شيء واحد انتظر ياقلبي زعمك من حيطلع على حقيقته مازال، لأن الفترة هذه ربي مسخرها لي عشان نصفي حياتي، عشان نطلع من الوهم عشان نحاسب نفسي وناخذ حقي، حق ؟ الدنيا هذه كلها باطل والحق عند الي خالقنا، الدنيا هذه كلها مأساة عشنا فيها إجبارا عشان الموت مش مكتوب مازال.
مشى خالد مع عمه للمستشفى وشافوا الجثة وكانوا يرجوا فيهم مجموعة أمنية
-عظم الله أجركم
علي: أجرنا وأجرك
-طبعا أنتم عارفين إن ولدكم هارب من الحبس ولما مسكوه حاول الهروب أخرى، الحق تأسفنا واجد على قتلته بس قدر الله ماشاء فعل
انفصل علي وقتها: تي هذا ولدي الوحيد تقتلوه وتقولولي قدر الله ماشاءفعل، كان سيبتوه لي نشوفه حي را وحق الله جبته لكم بيدي انحبس لين كمل مدته وطلع ، بس توا شن بناخذ من كلامك حكمتوا عليه مليون مؤبد وهو مازال صغير، شن بينفعني أسفكم توا من ياخذ حقي من ياخذ حقي في قهرتي
خالد: خلاص ياعمي خلاص
علي: شن خلاص عشان أمن يقتلوا ولدي ويقوللي آسف تقوللي خلاص، شن تبيني نقوللهم شكري قتلتوا وحيدي لأنه مجرم، شكرا قتلتوا وحيدي وهو قاتل مجرم مسيبينه لكم سنين يسرح ويرتع وجيتوا عنده الصغير وقتلتوه؟ تبيني نقوللهم هكي ، حسسسسبي الله ونعم الوكيل حسسسبي الله ونعم الوكيل
ومشى علي شور الثلاجة يودع ولده الوداع الأخير ووراه خالد يمسح في دموعه
تغسلت جثة قيس وشالوه لأمه بيش تودعه الوداع الأخير، أصعب شيء لما تبي تاخذ حقك بس يوتخذ منك حق ماحد يقدر ينازعك فيه ،لم يوتخذ منك روحك قهر وتعب وأنت مش قادر تتكلم، كون مظلوم ياقلب وربك موجود، كون مظلوم وربك موجود
عيطة إيمان لما شافت ولدها من يصلح تصدع الجدران بعدها من يوقف زلزلة الأرض ومن يجبر كسرة القلب ، الخوات الي منصدمات والأمل الصغير الي راح من يرد يزرع مكانه أمل أخرى، باسم شنو حيكون الوجع هذا ؟ باسم الوطن ولا باسم الإهمال ولا باسم التصنع ولا باسم الصحوة المفاجأة
شن بيفيد الأب والأم لما يوعوا لأطفالهم في اللحظة الغلطة، الصرخة الي صرختها في مرتكب الجريمة كان خاطرك تصرخها في انعكاس صورتك في المراية بس حيقولوا وقتها انجنيت..
راح قيس وكم قيس غيره راحوا بطرق أسوأ من هكي وكم قيس ضاع بمسميات مبعثرة ومبررات حقيرة لا تسمن ولا تغني من جوع
واندفن قيس وكم من قيس اندفن وهو مايعلمش عن القبر غير مكان يمشوله الناس الي خلاص حياتهم كملت وماعاش عندهم مايديروا
بس مازال في يدنا ننقذوا كم قيس من حياته من شرور نفسه من تهوره من تتبعه للبروباجندا الكاذبة من رفقة السوء ..
