21
شن ردة الفعل الي المفروض تكون من خالد بعد حكتله سيلين كل شيء، كيف حيسكت ،دمراته ودمرت عائلته بأوهام ولخبطة وتعب، سببت في جعل هيلين تظن نفسها مريضة نفسيا وتنتحر وسببت في دمار نفسية خالد وشكه في أهله وعقه لوالديه سبب في أشياءمستحيل كان خالد يرتكبها
بعد رميها بوابل من الهزايب والوعد والوعيد طلع خالد من عندها بعد عرف كل شيء ومشى شور المستشفى خش لهيلانة
-على قد مانبيك توعي وتكملي معي على قد ما خايف عليك من الصدمة، جديات أنا تعبان محتاجك معي هيلانة ردي بالله عليك نوضي طمنيني إنك حتعيشي هيلانة عشان خاطري نوضي، لأمتى حنقعد هكي حبي لك كل مايتزعزع يرد يرسخ أكثر ، محتاجك أقسم بربي
شرد فيها شوية ومسح دموعه وطلع مشى لشقته
بكا على تدخين على تفكير لعند رقد
ثاني يوم ناض مشى لحوشهم وقرر إنه يهدا ويبدا يغير من الوضع الي هو عايشه شوية وصل ولقى هله روحوا
بعد سلم وتغذا معهم
ياسمينة: شن صار
خالد: أنا مصدوم يا أمي أقسم بالله مصدوم
شهد: شن في
خالد: هيلانة
ياسمينة: كنها البلا
خالد: طلعت بنت عمي عمر
شهد: نعمممم
خالد: وعندها توأم أخرى نسسسخة يا امي من هيلانة أنا ماشفتها قريب عيطت نحسابها هيلانة ونا كنت كيف ماشي للمستشفى وشايفها
ياسمينة: لا فهمها لي هذه كيف
بدا خالد يحكي لأمه وخواته وهن متنحات مصدومات فيه وفي الي يقول فيه
ياسمينة: سبحان الله يارشا وخلاص تبي تضريني ربي ضرك
خالد: حتى أنت غلطت يا امي وقاعدة تاخذي في جزاء غلطك ، أول ماتطلع هيلانة حنرد نقسم الورثة ونعطيها حق عمي عمر وعمي عبدو
جمانة: وسيلين هذه
خالد: سلين قالتلي مانبيش شيء الشقة متاع باتها عطتني أوراقها غيرتها باسم هيلين كتكفير عن ذنبها ولأنها نادمة على كونها السبب في انتحار أختها وأنا عندي شقة شريتها سجلتها باسمها بعد ماتنوض هي تصرف فيهن وأول ماينوض باتي طيب لازم يردلها حقها
ياسمينة: وخوك
خالد: خوي هذا قصته قصة يا أمي يستر الله عليه نرجى في خو معز يكمل عزاهم ويكلمني نتلاقى معه
شهد: باهي والمحامي مالقش حل
خالد: المحامي كل مانكلمه يقوللي عطيني وقت
جمانة: امشيله واحكيله على الي حكاته لك
خالد: ماينفعش نحكي للمحامي مافيش دليل بكون معز قتل عمي غير الشهود ومافيش دليل يبرئ أحمد وقيس لأنهم اعترفوا ، القصة توا مع خو معز يا يتنازلوا يا مش عارف شن يصير
شهد: يستر الله
خالد: جمانة كنك؟
جمانة: لا شيء راسي صداع بس
شهد: خاطري نمشي لباتي ولأحمد
خالد: بكرة بإذن الله نشيلكن توا مش حنقدر، بنعدي نشوف المحلات لي وين ماشفتهن ولا نندري على رزقنا الي تطرطرش
ياسمينة: كبرت ياخلودة وشلت المسؤولية
خالد: سامحيني يا أمي
ياسمينة:نا مش زعلانة نا توا هذا وين فطنت لروحي هذا وين عرفت نا شن درت زمان
خالد: عماتي معش جن بكل
شهد: عماتي من وقت حضرن القصة الي صارت في عزا عمر والعركة بانن على حقيقتهن
خالد: يلا المهم تنزاح هالغمة ويستر الله ، ماتبوا شيء نا بنطلع
شهد: الحوش منفض را
خالد: اكتبن شن ناقص نطلع ونجي نلقاك واتية تمشي معي للسوق
جمانة: حتى نا
خالد: باهي تمام
صبا خالد طلع شاف المحلات وبرم على رزقهم ورد لقى شهد وجمانة لابسات يرجن
