12
لما تحاول تنتقم من حد لازم تكون مدرك عواقب انتقامك عشان ماتتحولش من مظلوم لظالم، لما تكون مكسور ماتجبرش كسرك الأول بكسر أقوى تخسر فيه روحك، الإنسان نقي بالفطرة بس الشرور مكتسبة وكل واحد يرمي لومه على المحيط وينسى نفسه، فكر كيف تاخذ حقك بقولة يارب فكر كيف الدنيا دارت على سلاطين ورؤساء وأغنياء وبلطجية و طغاة ومدعي التمسك بالدين، أنت مش منزه من الخطأ ولا معصوم منه بس حاول تتجنبه عند المقدرة، ماتمشيلش برجلك وتقول أنا طحت في الوحل عشان ناخذ حقي، لأن وقتها حتكون أنت والوحل سواء.
صدمة رشا بالصدفة الغريبة كانت كفيلة بانهيارها الداخلي رغم تظاهرها بالقوة والقدرة على المواجهة بس أي مواجهة هذه قدام كلام كبير زي هذا، حاولت تبرر حاولت تتكلم بس صوت الكذب ماقدرش يتكلم وقتها وفضحها الجزء الصادق فيها حاولت تهرب بس لسانها نطق بكلمة واحدة: حنحكيكلك كل شيء بس أهدا
وفعلا حكت كل شيء والرد الوحيد الي كانت متوقعته وصار هو: وتي دبشك نشيلك لحوش هلك.
_______________
نورة: شهد سادك بكا من أمس وأنت مابطلت دموع
جمانة: الموضوع عادي يعني عندكم
رواسي: مابعدش بعيد يعني ولد عمك كيف خوك
فنصت شهد في رواسي: أنت مش طبيعية راك والله ماطبيعية
رواسي: شكرا، وشن دخلني نا، نا الي قلت لأمك تدير هكي
جمانة: رواسي لمي روحك خيرلك
إيمان: رواسي خلاص انهي
رواسي: كلام الحق وجاع
شهد: الله يرحم أيام ميتة عليه وهو يهزب فيك كيف الكلبة
رواسي: احترمي نفسك باهي
رهام: تي كنكن أنتن مش وقته الكلام هذا
رواسي: سكتن على الداعشية وخوها اللقيط وجايات يشطرن علي
صبت شهد من عالكرسي بتمد يدها على رواسي مسكتها صابرين
صابرين: رواسي احترمي نفسك
جمانة: تعرفي تروحي يارواسي، أطلعي من هنا، مش حوشنا مش عاجبك وخونا لقيط وأمنا مش تمام شن قعدك هنا
رواسي: ريت مملكة السعادة الي لزيتيني منها اقعدي فيها ، هيا يا أمي
إيمان: عيب ياجمانة هكي
شهد: سكتتي على بنت وقت قالت كلام كيف وجهها المعفن وجاية تقولي عيب على جمانة
جمانة: الي مش عاجبه كلامي يلحق رواسي
صبت إيمان لبست كندرتها وطلعت هي ورواسي بعصبية وصابرين وراهن تهدي فيهن وتحايل عليهن
رهام: لا حول ولا قوة إلا بالله ، عمتي تبي شيء رني
نورة: سلامتك يا أمي ، معلش الله غالب تحملي بنات عمك
رهام: مش لايمة عليهن الي هن فيه مش ساهل
جمانة:خليك أنت وين ماشية ، مانقصدش أنا بس شفت الموقف كيف مستفز
رهام: عارفة والله رواسي أختي ربي يهديها وأمي ماتتحمل فيها شيء
جمانة: مش عارفة كيف رديت على أمك هكي غصب عني طلع الكلام من القهر الي أنا فيه
صابرين: تفضلن تفضلن
نورة: صبن صبايا شكلهن
شهد: استغفر الله على الصبح هكي
__________________
هيلانة: ليش درتها باسمي ؟
خالد: أنا رجل ندير رزقي بيدي بس أنت لازم نضمن شيء لك
هيلانة: شن بتدير توا
خالد: بندور على محامي كويس
هيلانة: أمتى نشروا أثاث الشقة
خالد: ماهي مؤثثة
هيلانة: بس ناقصها شوية حاجات
خالد: المهم نمشوا هالأسبوع كيف مايمشي بعدها ساهل، خليني توا نشوف موضوع المحامي قبل
هيلانة: إن شاء الله خير وخلاص
خالد: مافطرتش أنت صح، نتكوا ناخذوا سندوتشات
هيلانة: لالا نبي كابتشينو وكرواسون
خالد: حاضر هي
________________
أحمد: شهد
نورة: شهد خالد يضبح
شهد: مننن
نورة: تييي قصدي أحمد اففف ياربي استغفر الله
شهد خنقتها العبرة : شوفن القهوة على النار
طلعت لأحمد في السقيفة : نعم
أحمد: أمي حصلت طيارة على بكرة عمي كلم قيس قالله
شهد: وباتي؟
أحمد: عمي بيقعد معه لعند يسمحوله يروح حيروحه عمي في طيارة إسعاف
شهد: أمي هذه مش عارفة كيف تفكر
أحمد: أنا معش فهمت شيء في العيلة هذه يخلوا حتى القطوس يحشش
شهد: فاضي أنت درق وجك
طلع أحمد لقى قيس مقعمز على كرسي في الجنان
قيس: صايرة طحنة
أحمد: وييين
قيس: أمي ورواسي خواتك لزاتهن
أحمد: تدوي جد
قيس وحق الله
أحمد: شوفلنا صاحبك هذا يديرلنا سهرة كيف نهارتها
قيس: بس المرة هذه تدفع أنت ماتقعدش تطاوح على حسابي
أحمد: تم غير كلمه بس
قيس: بتطلع أنت ولا شن
أحمد: تي نرجى في التشاركية جايين بيفكوا الخيم
قيس: خلاص امالا بنطلع ونكلم الرجل الي قتلك عليه
أحمد: تي حسيته مش ليبي هو
قيس: لالا مش عارف شن جنسيته
أحمد: من وين تعرفه أنت
قيس: جاني مرة في المحل شرى مني كندرة ومن وقتها تعرفنا ومرة على مرة لين تمينا رفقة وخذاني معه في قعدة من قعداته
خلاص شوفه اليوم وقوللي، حل توا آهي التشاركية جت.
__________________
رشا: معش عرفت شن ندير قلتله كل شيء
أمال:فتحت على روحك فتوحة كبيييرة يارشا ، جمال شن بيسكته توا
رشا: جمال رجل ومش حيضرني
أمال: وكان شاف خالد؟
رشا: خليه يشوفه ، أنا أصلا قلت له الي قلته لخالد
أمال: المسج جاك من من؟
رشا: من رانيا صديقتي
أمال:وشن خلاها تقولك هكي
رشا: مافيش حد عارف غيري أنا وياك، الباقي كلهم فاهمين كيف مافهمت خالد، والله نخلي ياسمينة تنجن ونركبها خلل في عقلها على الي داراته في
أمال: في تحليل dnaيارشا
رشا: خليهم يديروه، نا بنسافر الأسبوع الجاي
أمال: كيف تسافري وجمال وقصته؟ وخوتي بيخلوك؟
رشا:ومن قالك حنقول لحد؟
أمال: بتهربي يارشا ؟
___________________
هيلانة: خالد نفتح تليفوني
خالد: وترني عليهم
هيلانة: لا والله لا
خالد: أفتحيه بشرط جاك أي مسج ولا أي شيء تقفليه
هيلانة: حاضر
فتحت هيلانة التليفون وأول مافتحاته جاها مسج: قدمتيلي طبقين من ذهب ننتقم من خلالهم منك، شكرا على إنك عرفتيني عليهم بلا ما تقصدي، بس نوعدك حتخسريهم قريب بالموت البطيء، جعيد
هيلانة فنصت وتمت تبحت في خالد وفي المسج
خالد: شن في
هيلانة: جعيد ما فهمتش مسجه شن يقصد؟
خالد: وين وريني
خذا خالد التليفون وقرا المسج :شن يقصد هذا ؟ على من يحكي هذا ؟
هيلانة: مش عارفة مش عارفة والله
خالد: حنرن على شهد قلبي مش مطمن
هيلانة: شن حتقلوللها
خالد: مش عارف اصبري
كانت وقتها شهد كيف مكملة صلاة الظهر شافت تليفونها يهز ، صبت من ع الصلاية شافت الرقم ردت طول
شهد: خالد
خالد: ماتقوليش لحد إني رنيت عليك
شهد تميت تبكي: وينك أنت كيف تسيبنا في وقت كيف هذا
خالد: أنت وجمانة كويسين؟
شهد: رد بالله عليك ليش مشيت
خالد: جاوبيني أنتن كويسات
شهد: الحمدلله
خالد: أحمد أحمد وين
شهد: برا مع التشاركية يلموا في الخيمة
خالد: يعني مافيكم شيء
شهد: ليش هربت من الحوش
خالد: الموضوع كبير ياشهد
شهد: يعني الموضوع صح ؟
خالد: شن هو
شهد سكتت
خالد: شن هو
شهد: أنت مش خونا
خالد: من قاللكم
شهد:من قاللنا يعني صح، خالد صح بالله عليك قولي صح
سكر خالد الخط وتما يبكي من خنقة صوت شهد
في الوقت الي هيلانة كانت منهارة وخايفة من مسج جعيد، لأنه مادارش هكي إلا وهو في شيء فعلا .....
