5
الأفعال القديمة ممكن تخلي الثقة تنعدم، الفعل السيء نتناسوه بس ماننسوش منه شيء وماننسوش فاعله، زي لحظة الموت تعيش بعدها بس تخلف منك شخص آخر تفكيره غير وكل شيء فيه غير، المشكلة إن عقولنا ماتستوعبش غير عدو واحد رغم إن أعداءنا واجد بس دائما عقلنا يرد العداوة والأفعال السيئة لنفس الشخص يعني كأنه رأس الهرم والباقي أحجار في هرمه، وأحيانا تكون العداوة مبنية على شيء تافه درته شماعة قدام الناس بس بينك وبين نفسك عارف إن العداوة هذه تأسست بسبب غيرتك وحقدك على الطرف الآخر.
هذا الي كانت ياسمينة تظنه هي ممكن أفعال بسيطة من عبدو بس هي ضخمتها بسبب كرهها له ولعبت عليه بحاجات واجد لين خلت رجلها يلزه ويضطر عبدو للهجرة،وهي نفس الأفعال الي خلت عمر يبي ينتقم بأي طريقة بس هل توصل لدرجة القتل؟
ياسمينة: شن جيبك ياعمر
عمر: أنت تسكري فمك مالكش علاقة ولا معش عندك رجالة نحكي معهم
خالد:شن تبي ياعمر
عمر: نا صح لو نلقى نقتلكم واحد واحد بس مش نا الي درت فيكم هكي
ياسمينة: زي كل مرة راس مالك كذب
عمر: نا لو نبي نقتلكم ماندير جو الجبن الي أمس ونديرها من بعيد، لا وراسك يا لفعى نجيك في وسط حوشك ورصاصة مش خسارة فيك.
خالد: عمر أطلع خير مايصير شيء مايعجبكش
عمر:شن بيصير بتهجروني زي عبدو ولا شن بتديروا حتى مرا ماعندي بيش تطلقوها مني بالغصب زي مادرتوا في عبدو، وماعنديش حتى ولد تاخذوه منه زي مادرتوا في ولده، وتوا قدام الناس عبدو هو المذنب عشان من يا ياسمينة وعشان شنو عشان تكلم على الي شافه والي داراته أختك معي؟ نتكلم أكثر ولا هكي ساد
ياسمينة: أطلع برا ياحقير، شكلك سكران وجاي ترمي بلاك علي وعلى خواتي
عمر: أنا حنطلع والي عندي قلته يا ياسمينة؛ بس توا عاد فسري كلامي لعيالك، هيسلام يا مراة خوي
خالد: شن يقول هذا يا أمي
ياسمينة: سكار حشاش شن تبي منه،ساد الي داره جاي يرمي بلاه علينا
شهد: شن قصة خالتي وهو وعمي
ياسمينة: فاضية غير نفسر ختاريفه هالصايع ، صبي معي نلموا المطبخ بيش يجوا العمال
صبت ياسمينة تلم وتطلع في المطبخ الي في الجنان
وسيبت شهد وخالد وهيلانة متنحين
هيلانة ماتكلمتش ولا كلمة بس قررت لازم تتلاقى مع عمها عمر بيش يفهمها شن في وشن الي يعرفه هو هي ماتعرفش، وهل خوها الي حكى عليه حي ولا ميت، هذا كله كاين يدور في بالها في الوقت الي كان خالد مصدوم من الكلام الي قاله عمه وقرر نفس القرار الي قرراته هيلانة إنه يتقابل مع عمه
أما شهد فصبت عدت لأمها وهي متنحة وماعندهش نية تدير شيء من الرعشة الي حصلتها.
خالد: هيلانة تعرفي شيء أنت عن الي قاله عمر؟
هيلانة: أكيد لا! هو قال عندي أخ صح؟
خالد: مش عارف، معش فهمت شيء أنا وحق ربي نحس في روحي مش مستوعب شيء ، آااااه
هيلانة: خلاص لا تتحرك رجلك حتؤلمك
خالد: اففف استغفر الله العلي العظيم، معش عرفت شن نقول ولا شن ندير وشن الحل، نبي أمي تتكلم بس مادوتش ولا كلمة
هيلانة: تفكر في الي نفكر فيه
خالد:شنو
هيلانة: نمشوا لعمي
خالد: طول عمرها أمي تكره باتك وعمي وكانت تقوللي في مواضيع كبيرة أنت ماتعرفهش بس ماتوقعتش تكون هكي المواضيع، من كثر تحذيرها تميت نصدق فيها ونحذر فيك وفي خواتي ونا مانعلمش شن في أصلا
هيلانة:والحل؟
خالد: خلينا نسكروا الموضوع نطمنوا على باتي بعدها ساهل
