22
ساعة وراء ساعة والانتظار سيد الموقف، قلوب تبكي دم وقلوب تبكي حقد على الي صار، وقلوب تعذبت وانذلت إلى أن نزفت وابتعدت عن العالم لعلها تلقى عالم آخر في اللاوعي.
نكتة الأمان لما نصدقوها يكون واقعها صادم ووجع الحروب لما نعيشوه نصبروا عليه ونتأقلموا معه إلى أن نصبح أعجوبة للعالم،غريبة هي الدنيا وكأنها في الأيام الأخيرة مصرة تخلينا نتعجبوا، بس ليش نتعجبوا والي قاعد يصير هو نتيجة أفعالنا، سواء بظلم أو سكوت عن الحق أو قتل أو تحريض عليه أو أي شر ممكن يترجمه العقل في معاني الشرور .
بعد الي صار مرت أسوأ ليلة ممكن تمر على عائلة هيلانة وخالد، تناسوا كل الهموم السابقة وانفتح جرح جديد
خاصة لما سمعن ياسمينةوإيمان باب السيارة متاع خالد بعد ساعات من طلوعهم
شهد: شن صار؟
خالد: فعلا هربوا المحابيس ومابوش يخلونا نخشوا لجهة الحبس، شفت واحد كاين عسكري سألته قالي الحبس ينفض كلهم هربوا، حاولت ندور عليهم في أي مكان ما فيش أي أثر، يستر الله وخلاص
إيمان:يعني كيف ولدي رااااح
رغداء: وسعي بالك يا أمي شوفي باتي وجهه كيف منصفر
علي: لا حول ولا قوة إلا بالله
جمانة: شنو هذا أمتى نتريحوا نحن بسسسس أمتى تعبت أقسم بالله تعبت
ياسمينة: وتوا شن بيصير
خالد: حنراجوا بلكي يجوا هنا في أي وقت.
___________
عصام: هربوا لكن وديني نجيبهم وكان مادفعلي الي طلبته وراس أمه ننكد عليه معيشته
- شن بيصير يعني
عصام: نحرقهم بحوشهم بكل
- وأنا شن بيصير في
عصام: تنقي علي خوذني خذيتك، خليني نشوف شن يصيرلي مع الكلب خالد بعدها نديرلك راي
- مش حيسيبوني
عصام: أعلى مافي خيلهم يركبوه المهم توا خليك هنا لين نشوف شن صار في خالد هله
- بتسيبني هنا بروحي
عصام: سكري الباب وماتخافيش توا نجيك في الليل.
_________________
-الحمدلله على سلامتك
_الله يسلمك، حنكلموا أهلك بيش نطمنوهم
- ياريت، كلميلي خالد
_تبي شيء أنت توا
- فكولي الأجهزة هذه
_ حنفكوهن بس لازم تتريح
كل شيء معقد وكل شيء ماشي بطريق منحرف، كل ما تحل كارثة تطلع الي أكبر منها، من الي رد للدنيا هيلانة ولا حسن، من الي تكلم معها عصام رشا ولا سيلين و شن الكارثة الي صايرة لمهند وسليمان، قيس وأحمد وين؟ وشن حيصير في خالد وعائلته بعد تهديد عصام، معقولة خالد حيدفعله المبلغ هذا بعد الي صار ؟
خالد: أنا معش عرفت شن ندير أقسم بالله يا أمي
ياسمينة: زعمك شن دايرين توا؟ وين عدوا؟ ياربي نجيهم واحفظهم يارب أقسم بالله قلبي ماعاد يتحمل نحس في روحي بنموت من كثر الهم
شهد: خلاص يا أمي أهدي
جمانة: شهد
شهد: نعم
جمانة: معش عرفت شن ندير ياشهد
شهد: شن في
جمانة:في رقم دزلي المسج هذا
شهد: وريني
جمانة : مش قصدي أقسم بالله مش قصدي
شهد: نهاااارك أسود نهاااارك أسود دزيتيله صورك أنت
جمانة: مش رقمه هذا
شهد: ياكلبة هذا واحد يعرف خالد يا كلب هذا واحد بينتقم منه عن طريقك، نهاااارك أسود ياجمانة شن ندييير ياربي شن ندير حي علينا ياجمانة
________________
أحمد: شن بتدير توا
قيس: نعدوا للحوش
أحمد: وكان هلي مش في الحوش
قيس: مافيها إلى هكي نمشوا للحوش يا أحمد
أحمد: ماعندش ولا قرش ناخذ تاكسي ولا عندنا تليفونات كيف يصير
قيس: خايف نمشوا كعابي يكونوا دايرين استقافات يمسكونا أخرى
أحمد: هيا هيا والي يصير يصير
_________________
بعد ساعات وبعد نص الليل كل واحد في غرفته ومعه سر ، خالد عقله قريب يوقف من التفكير والخوف، ياسمينة ماكملتش بكاء على الي قاعد يصيرلهم، شهد وجمانة مرعوبات من الي قاعد يصير وعلي وعائلته في حوشهم بين راقد وباكي وشارد وخايف، المريض فاق والمذبب حر والمظلوم مش واخذ حريته، أي بلاد وأي حياة الي نحن عايشين فيها وأي ذنب الي تحمله مجموعة كبيرة
في عز تفكير خالد رن عليه رقم قفز على أمل يكون أحمد وقيس بس كانت كارثة جديدة حلت على راسه
خالد: أيوا
-معك يوم يا تدبر الفلوس ياصور أختك تلقاهن في الفيس وتلقى خوك وولد عمك في شكارة وحوشك محروق بالي فيه
عطيتك يوم وعقلك في راسك
وسكر الخط
خالد: شههههههد.....
___________
قيس:أنا تعبت من المشي
أحمد: تعال نتريحوا هنا وخلاص شوية ونكملوا
قيس: زعمك دوروا علينا
أحمد: بلكي ماسمعوش
قيس: مافيش شيء يندس في البلاد هذه
أحمد: جعاان بكل أنا لين جسمي هابط
قيس: تحمل يارا يطلع النهار نتوكلوا على كرعينا
أحمد: حي على أمه سيارة
قيس: صبي نوقفوهم بلكي يشيلنا للحوش
أحمد: وكان يطلع حد مش تمام
قيس: نمشيله بروحي
صبا قيس: السلام عليكم
- شن تديروا هنا توا
قيس: نبوك تشيلنا للحوش
- هاربين من الحبس أنتم
قيس: تي لا يا را غير واحد فك منا السيارة وفيها حاجتنا كلها
- أركبوا نشيلكم
قيس: أحمممد تعال هيا
جا أحمد بالشوية وركب قيس قدام وهو لاورا
ومشت بهم السيارة في الليل
بس الي مهم إن السيارة كانت ماشية شور نقطة استيقاف بحت أحمد في قيس في مراية السيارة هزله راسه وهز قيس راسه ونزلوا والسيارة تمشي ، التوت كراع قيس وأحمد ناض ونوضع وعدوا يجاروا بين المزارع ووراهم الرصاص صلي
في عز جريهم انسمعت آه قوية وطاح صاحبها والثاني حاول ينوضه بس ماقدرش وخاف وقعد يمشي على قد مايقدر كل مايمشي يتلفت للوراءويلقى السيارات واحدة وراه وواحدة تشيل في الي طاح
من الي انتهى دوره ومن الي حيا من جديد
بكرة تعرفوا
عادت الدوامة 😂💔
