2
أشخاص أسمر وأشقر وقمحي بس مش الشكل الي متخيلته لولد عمها، ليش كل الأشكال الي متخيلتها لهم إنهم أقزام زي والدها، ممكن لأنها مااحتفظتش بأي صورة لعائلتها سوى صورة والدها
- هيلين صح؟
- تفضل
-أنا خالد
-أوه خالد أنت جميل جدا
ضحك خالد وارتبك: وحق الله أنت الي طرف بكل
- نعم
- هيا بنقعدوا في المطار هنا
- أنا آسف مانفهمش عربي واجد
- أها باهي تفهمي انجليزي لأني بصراحة مانعرفش فرنسي، وحق ربي شكلك حتتعبي معانا
- ليش
-شيء هيا بس ناكلوا شيء ونردوا بيش نلحقوا على طيارتنا بعدين
___________________
ياسمينة: أسمعي بنت عمك بتجي را بنحطلها سرير معاكن
شهد: شنووو
وكان الرد من جمانة أختها بنفس الطريقة
ياسمينة: أها خلاص لازم تتعودن عليها معكن
جمانة: أمي عندنا خصوصيات ومانعرفوهش يا أمي عطيها الدار الي برا
ياسمينة: باتك قال لا
شهد: أمي أنا مانيش مخليتها في دارنا، خليها تعيش في الدار الي برا
جمانة: أنا نطلع ندوي لباتي
ياسمينة والله كان دويتلنه يقلبها على روسكن ، تحملن بلكي عمتكن تاخذها عندها الله غالب
شهد: الصبر وخلاص، هيا أنت صبي نضموا
جمانة: صبي أنتِ أنا ننشر الرواية ونجيك
شهد: رواية توا يافاشلة مصدقة روحها كاتبة صبي را نحرش فيك باتي، هالوهمية هذه تسرق في روايات من قوقل وتغيرها بالليبي وتقوللهم من كتاباتي هاشتاق كلماتي، صبي ياوهم
مسكت جمانة الصباط من كراعها وعزقاته في شهد الي طلعت تجري
جمانة: جيبي الصباط هنا ماركة خير من وجك يافقمة
أحمد: أمي وين
جمانة: أرجى ندورها لك في جيبي
أحمد: عنجد الحناطة على الصبح تي هيااا أمي وين
جمانة: هياا ينعلي ياخيي وحق ربي نا أرجل منك، أمتى ناوي تنشف معلش يعني رك تمرض في بالأنوثة الي عندك
أحمد: حولي من قدامي ترا
جمانة:آه ياصبر الدنيا ، آخر العنقود طراش مش سكر معقود، شهد خوك هذا عندي إحساس يتفرج على جويل من ورانا
شهد: صبي يابايرة خير مانحرش فيك باتي
جمانة صبت بحمق وعزقت التليفون: مايفهموش في المواهب بكل ، إنسانة مثقفة زيي كاتبة موهوبة لازم يطمسوها
أحمد: قرت زحمة حكي دارت روحها موهوبة واو
جمانة: اسكت ياحميدة أنت خيرلك
ياسمينة: ياحسن شوف عيالك را ذهبولي شيرتي
__________________
خالد: كولي كنك؟
هيلانة: احكيلي كيف حتكون حياتي
سيب خالد الكشيك وبحت فيها: شوفي يابنت عمي خليني واقعي، حتتغير تغير جذري، خاصة واحدة زيك لازم تكون أسد بيش ماتاكلهش الذئاب ، فهمتيني
هيلانة: شوية شوية ، بس أنت كيف عرفتني لما جيت
خالد: أنا شايفك على الفيس وبعتثك طلب بس ماقبلتيشي
هيلانة: اها ممكن، حنقبله أكيد
خالد: خاطري نحكي معك واجد بس توا خلينا نردوا بيش مانتعطلوش ونمشوا في الموعد
هيلانة: احكيلي على العائلة
-ياستي أنت عندك 3 أعمام علي وحسن الي هو باتي وعمر طبعا مقاطعنا ومايتكلمش معنا وعندك 4 عمات اثنين منهن في بريطانيا وعندهن أولاد بس زيك ماجوش ليبيا نهائيا واثنين قاعدات في ليبيا نورة عندها فضل 10 سنين وزهراء سنتين، وصابرين عندها نمارق بس عمرها سنة، أنا خوتي 3 أحمد 17 سنة وشهد كبرك وجمانة أصغر بسنة وأنا طبعا أكبر واحد28 سنة ونحذرك منهن لأنهن حياكلنك بقصقصتهن ولسانهن
ابتسمت هيلانة : والباقي؟
عمي علي عنده رواسي حتى هي كبرك أو أكبر بسنة و رهام تقريبا 20 سنة ورغداء وقيس توأم كبر أحمد خوي، عمي عمر مش متزوج أصلا ومتعارك معنا وعايش بروحه في شقة، عمي هذا غيرنا كلنا يعني يشرب ويدير في حاجات مش تمام
هيلانة: وأنت ؟
-أنا شنو؟ أها فهمتك، كنت خاطب واختلفنا وسيبتها وتوا سينقل
- اها، عائلة كبيرة ، متحمسة للقاءهم، حنكون أصحاب أنا وخواتك
رفع خالد حاجبه: أشك بصراحة
- ليش
- لاشيء خلينا نمشوا هيا
________________________
كيف تنقلب الحياة بسبب شخص جديد يقتحمها، وكيف حتكون حياة المقتحم بسبب تغيير جذري في حياته، تحذير خالد خوف هيلانة من الي حتشوفه، وتحذير شهد لرواسي خلاها تخاف من المصيبة الي جايتها، حتاخذ منها خالد خاصة بعد تما سينقل رغم محاولاتها المتكررة لكن كل شيء فشل، رجيم مكياج لبس ضيق، كل محاولة كانت تنتهي بأنتِ خيتي يادبة
كانت العائلة متأهبة لقدوم هيلانة بحذر وخوف ونقص لأنها فرنسية عاد أكيد مايعجبها العجب أكيد تدلع أكيد مصاريفها واجد أكيد تلبس ماركات وتاكل في الغالي ، كل هذا كان يدور في بالهم، ممكن الي كانت متعاطفات معها عماتها فقط، أما الباقي فجوهم متكهرب ويستنوا في التغير الي حيصير.
رواسي: أمتى يوصلوا هم؟
شهد: ممكن مع الواحد هكي
جمانة: نعلي تعليقات كلهن يهبلن
رهام: مش حتبطلي سرقة روايات أنت؟
جمانة: شن فهمكن أنتن بكرة ندير كتاب وننجح وكلكن تحايلن عشاني
رواسي: عنجد الوهم، آه يابنات كل مانذكر إنه معها بروحهم نتمحمط
جمانة: أمتى تقتنعي إن خالد مش مبحت فيك بكل ، وتقول علي نا وهمية
رهام: اسكتي را تفطسك عليها ضربة تشل الكتف
رواسي: اهي ردت عليك رهام
جمانة: خلاص اسكتن أمك جت.
_________________
دور البراءة حلو لعبه بس هل حيقتنعوا به الآخرين؟ ابتسامة مع كلمات منمقة وتغليف القهر والغل الداخلي، صعب لما الانتقام يتغلب على الإنسان لدرجة مايخليشي يشوف شيء غير إنه ياخذ حقه فقط، الماضي الي تحسابه اندفن مع الأموات حيتجدد مع الي تحسابهم صغار ومايفهموا شيء، كيف تدير شيء وتحساب ربي سترك فيه وعداه على خير بس ربي دسه لوقته عشان ينرد فيك أضعافه
هيلانة المشرقة المتألقة هل هي فعلا هكي؟
هل حتكون نسمة حلت ولا حتكوّن العواصف؟ حتطلع المدفون وتحصد الزرع الفاسد وتبني المتهدم وتردم المبني بس كيف ؟
خالد: نورتِ ليبيا يا هيلانة، تصدقي هيلين أحلى
هيلانة:ماما وبابا كانوا على مخالفة دائمة بسبب اسمي
خالد: الله يرحمهم
هيلانة: حيجي يوم ونحكيها لك بس مش توا،توا نبي نوصل بسرعة متحمسة نتعرف على عائلتي
خالد: يستر الله.
وبعد نص ساعة وصلت هيلانة لعائلتها الجديدة
بوابة كبيرة وبداخلها بيوت وسيارات وعالم آخر، كان المفروض تنعم زيهم بالخير هذا كله بس انحرمت منه وعشان هكي هي هنا بينهم عشان ترد الي انحرمت منه أضعاف أضعافه، بس كيف ؟
