نصيبك تحب مجنونه (زواج ام دراسه الجزء الثاني)

البارت الخامس عشر

نصيبك تحب مجنونه
(زواج ام دراسه الجزء الثاني)
الحلقه الخامسه عشر
&&&&&&&&&&&&
بعد نص ساعه بالظبط دخل ابراهيم بسرعه وع وشه غضب ربنا ووراه صالح وهدي بس وقفوا كلهم بصدمه وهدي شهقت بعنف وهي بتصرخ : تسنيــــــــم
قرب صالح بسرعه من هاشم ومسكه ضربه جامد وابراهيم ساعده بس قدر يهرب منهم بسرعه وصالح مسك تسنيم من شعرها جامد
ابراهيم : سيبها يا صالح .. اكيد ف حاجه غلط
صالح بغضب : حاجه غلط .. اختك كانت نايمه ف حضنه بقميص النوم .. انت شايف .. انطقي يا بنت ال ....
هدي بغضب : صااالح مسمحلكش انا بنتي اشرف منك .. انطقي يا تسنيم قولي في اي كنتي ازاي كده انطقي
صالح : هترد تقولك اي . اقولك أنا بقي بنتك متلزمنيش بنتك طالق والمره دي بلا رجعه انتي طالق يا تسنيم طالق وابني مش هخليكي تلمحيه
ومشي بسرعه وابراهيم مقدرش يلحقه لانه نفسه مش فاهم حاجه وقرب على تسنيم اللي بتعيط جامد وضربها بالقلم جامد وهدي بتبعده عنها
هدي : ابعد عنها يا ابراهيم س
وكان هيضربها تاني بس ايد منعته رفع راسه لقاها شهد بص ليها بدهشه واتعدل لقي فارس وهاشم وادم واقفين وراها
شهد بابتسامة : كلاكيت تاني مره .. بس البطله والبطل اختلفوا مش كده
هدي بغضب : إنتي .. إنتي ازاي
شهد : ايه مفاجاه مش كده .. المفروض دلوقتي انا اللي كان يحصلي كده مش تسنيم بس انتي ملعبتهاش صح المره دي يا دودو تؤ تؤ تؤ يا خساره
نزلت لمستوي تسنيم اللي بتبص ليها بغضب وابتسمت ابتسامه صفرا : اي رايك حسيتي بحاجه .. دي كانت مجرد طلاق مش اكتر ونفس البرشامه يا سوسو
طلع ادم برا وبعدين رجع ومعاه صالح ووقفوا جنب بعض وشهد واقفه ف النص وبتضحك
ابراهيم : صالح؟؟ انت ؟؟ انا مش فاهم حاجه؟؟
شهد : بسيطه افهمك انا .. أنتي خطتي لكل حاجه بس ف نفس الوقت اتحركتي بحركاتي انا ازاي يا شهد .. ازاي يا شهد اقولك بردو .. اهم حاجه انك تعرف تفكير عدوك عشان تنتصر عليه وده كان المهم عشان كده جيت انا وادم وسعديه هنا .. اه بالمناسبة انا وادم مش متخانقين ولا حاجه ده جزء من الخطه
ابراهيم : خطه ايه يا شهد . وضحي كلامك
شهد : امك كانت عايزه حاجه واحده بس انها تخليني لوحدي تماما وكان لازم تفضل فاكره انها كسبت لاطول فتره ممكنه .. انما انا وادم اتصالحنا بعد ما سافرت بست شهور مش اكتر .. لانه في النهاية اخويا وحكالي على موضوع التهديدات والرسايل اللي جتله هو وماما وطبعا كان سهل اصدقه لاني شوفت كره هدي ليا بنفسي محدش كان محتاج يحكي ليا ذ
ادم : ولما شهد رجعت وعرفت النص الثاني من الحقيقة اللي كان لازم ماما هي اللي تقوله ساعتها اخدنا الخطوه الثانيه اننا نيجي هنا .. لما جينا هنا انا كمهندس كمبيوتر زرعت مسجل صوت  ف البيت كله وبكده اي همس كان بيتقال كنت انا وشهد بنسمعه .. عرفنا كل تحركاتك وكل تفكيرك من قبل حتي ما تفكري فيه
هاشم : وف النقطه دي بقي كان لازم انا اظهر .. انا وشهد متقابلناش قريب ولا حاجه انا قابلت شهد من خمس سنين ف امريكا كنت بتفسح على حساب واحد صاحبي وقابلتها وساعتها اعتذرت منها وهي قبلت اعتذاري وادم كان موجود حوالينا اساسا هو كان المشكلة بس ف الاخر سامحني ولما هي رجعت وجت عاشت معاكم في البيت هنا وابتدينا نعرف إنتي عايزه ايه ساعتها انا ظهرت
دخل مهاب ومعاه جنه وسعديه وجودي إللي سمعوا كلام ادم وهاشم ووقف الكل حوالين شهد
مهاب : اوعي تفتكري أن كان ممكن اخون صاحبي .. بعد ما خليتك تديني الامان وكل حاجه وطبعا كان ساعتها هاشم عمل إللي انتي عايزاه للاسف انا قولت لادم متأخر ساعتها فعلا اتخانقنا وبعدين اتصالحنا عادي بس الكلب اللي كنتي زراعه ف المكتب عشان كده مكناش عارفين نتعامل صح بس خلاص خلصنا منه
شهد : بعد ده كله كان لازم ارجع هنا وطبعا كان لازم امثل اني رافضه رجوعي لمصر عشان جنه مكانتش عارفه حاجه نهائي ورجعت فعلا وادم اللي فكرني بحوار الشقه القديمه فمكنش لازم افضل مع جنه ف الفيلا وف نفس الوقت مش هترضي تخليني امشي فكان لازم اتحجج باي حجه عشان أمشي ومشيت فعلا وقعدت ف الشقه وكان زياره ادم ليا مستمره
سعديه : وساعه ما قبلتيني ف المقابر كان متخطط
شهد : لا دي الحاجه الوحيده اللي مكنش متخطط ليها بس طريقه كلامي مكنش قصدها بس كان لازم يحصل كده ولما وقعتي انا كمان تعبت والله واتخنقت مع ادم بجد لان مكنش قصدي توصلي للحاله دي
جنه : والغيبوبه هي كمان كانت تمثيل
شهد : دي الحاجه الوحيده اللي كانت بجد ومش تمثيل .. معرفش حصل ازاي بس كان ضغط نفسي ولم فوقت رجعت وقررت انهي نص اللعبه والنص الثاني اكمله لما ابقي ف وسطكم
صالح : شهد جاتلي وحكتلي ع كل اللي اختك وامك عملوه فيها والصراحه انا مكدبتهاش واكتر دليل البرشام اللي كان عندنا ف البيت إللي تسنيم نسيت ترميه اساسا
هاشم : وهو نفسه إللي تسنيم شربته لما جت على هنا
هدي : وهي جت هنا إزاي؟؟
شهد بغمزه : زي ماانتي روحتي المستشفي عشان حفيدك تعب
افتكرت هدي لما طلعت برا وجالها تليفون بيقول فيه أن علي تعب وتسنيم منهاره ازاي مفكرتش للحظه لي تسنيم اللي مكلمتهاش ؟؟ وف نفس اللحظه افتكرت تسنيم لما جالها تليفون وبيقول البيت كان بيولع وطلعت فوق بسرعه وقابلها هاشم وهدها وفهمها انه دكتور ومامتها نايمه جوا لانها منهاره وقدم ليها عصير وشربت العصير من هنا وجسمها كله اتجمد وشافت ابتسامه هاشم لما شالها ع السرير وقطع جزء من هدومها وهي حتي مش قادره تصرخ
شهد : إنتي خططتي وانا نفذت بس بطريقتي انا .. واه ع فكره انا وابنك مش مكتوب كتابنا ولا حاجه احنا المفروض مخطوبين وحتي دي ملهاش اي ثلاثين لازمه .. لان انا إللي شرط الشرط ده
#فلاش
شهد : بص بقي شرطي اننا هنتخطب تمام بس قدام الكل مكتوب كتابنا
ابراهيم باستغراب : ليه يا شهد .. هتستفيدي اي يعني
شهد : بيني وبينك انا قلقانه من طنط لسه .. خايفه انها تعمل حاجه فيبقي انا عارفه نواياها
ابراهيم : بس معتقدش أن ماما هتعمل حاجه .. انتي هتبقي مراتي فاكيد مش هتعمل حاجه
شهد : معرفش بقي بس انا قلقاانه يا ابراهيم .. خدني ع قد عقلي يا اخي
ابراهيم : مع اني مش فاهم بردو إنتي عايزه كده ليه .. بس المهم انك تكوني معايا .. حاضر يا شهد
#باك
شهد : كل حاجه مشيت زي ماانا كنت راسمه بالظبط .. اه وحتي الدكتور بتاع الصيدليه اللي جبتي منه المخدر معرفه .. وانا وصيته هيعمل اي بالظبط وانتي محطتليش مخدر تؤ .. ده كان مهدئ اي رايك بقي عجبتك بقي ولا اي .. اكيد عجبتك ده أنا قعدت اخططلك سنين يا شيخه بس عارفه الاختلاف اي اني مفضحتش بنتك بس حرمتها من اهم حاجه ضنها والضنه غالي واكيد إنتي عارفه
ابراهيم : استفدتي اي يا شهد
شهد : استفدت اي  ....بتقولي استفدت اييييي ...اقولك انا استفدت اي ...... استفدت ان ارجع حقي ..... استفدت ان امي ترتاح ف تربتها
هدي : حسبي الله ونعم الوكيل فيكي
شهد بصراخ : أنت متتكلميش نهااائي انت فاهمه
ادم : شهد اهدي
شهد بحركات انفعاليه : لا مش ههدي مش ههدي يا اددددم
فارس ؛ خلاص يا شهد
شهد : وهي مسكتتش لييييييييييي....... هي محستش بيااا لييييي
هدي : اشوف فيكي يوم
شهد بصراخ : انتي موجوعه عليها صح موجوعه عليها...... وانت انت من اول ما شوفت قولت لا مستحيل اكيد ف حاجه غلط...... اشمعناا انااااااااا كانت فين الثقه دي معاياااا انا هااااا..... رد عليا
ابراهيم : لان دي اختي
شهد : وانا كنت مراتك .... انا اللي سبت دراستي عشانك انا اللي اتخليت عن كل حاجه عشانك..... اخويا وعائلتي وصاحبتي ودراستي كل شئ علشانك ....... استحملت ذل امك اللي كان بينتهي مع دخولك البيت ....... مين تستحمل ان جوزها ميجيش جنبها من يوم فرحها ..... انا استحملت ..... وفوق ده كله تفضحوني اهو انا بقي إللي بقولكم حسبي الله ونعم الوكيل فيكم منك لله
هدي : اطلعي برا بيتي .. برا البيت
فارس : المره دي بقي حق شهد اللي تطلعك برا بيتها
تسنيم بجنون : انت بتقول ايه انت مجنون ولا اي
فارس : لا مش مجنون .. واقدر اثبتلك كل حاجه دلوقتي.  طلع ورق كان معاه ووراه لابراهيم إللي اتصدم وبص لفارس بضياع
ابراهيم : بابا بايع البيت لعمي قبل ما يموت
وقعت تسنيم ع الأرض من الصدمه وهدي شدت الورق من ابراهيم وقطعته كذا مره
فارس : كنت متوقع انك هتعملي كده من اللي حكته شهد عشان كده دي نسخه الاصل معانا اكيد مش هطلعه بالسهل كده
شهد : بس انا عندي اصل فهسيب ليكم البيت تعيشوا فيه بس بردو روحكم ف ايدي .. سبع سنين وانا متعذبه بسببكم وجيه الوقت أن ده كله ينتهي .. مبروك الطلاق يا تسنيم واه صالح خساره ف واحد زيك
بصت هدي ليها بكره ومسكت سكينه كانت موجودة على السفرة وخبطت بيها شهد فجاه ف وسط اللي واقفين
الكل بصراخ : شااااهد
بصت ليها شهد بالم وهدي اتكلمت بشر : موتي بقي .. انتي شيطان موتك هيريحني ابقي سلمي على امك
ضحكت شهد بصوت عالي وهاشم واقف جنبها مبتسم ومد ايده لشهد ووقفت سليمه بصت هدي بصدمه على السكينه وطلعت لعبه
شهد : مش قولتلك لازم تفهم دماغ عدوك .. اكيد بعد كل الصدمات دي لازم تعملي كده بس هاشم عمل احتياطه وجبنا اللعبه دي حلوه صح .. خلي بالك من مامي يا هيما باي يا بيبي
طلعت شهد اول واحده من البيت وطلع وراها الباقي بصوا لبعض وضحكوا باستثناء جنه وسعديه وجودي
جنه : أنا عايزه افهم دلوقتي ف اي
آدم : طبعا انتي وماما وجودي مش فاهمين وحقكم الصراحه .. احنا مرضناش حد فيكم يعرف باللعبه دي لان سهل جدا انكم تكشفونا
سعديه : لي يعني ؟؟
ادم : لان رد فعلكم كله هيبان انه فيك مش حقيقي وهدي ذكيه مش غبيه وهتلاحظ ان ف حاجه غلط واحنا مكناش محتاجين كده خااااالص لأن اللي خططنا ليه هيضيع
جودي : وحكايه البيت
شهد بابتسامة : فارس هو اللي ساعدني ف الحكايه دي
ادم : اهو دي الحاجه اللي انا وهاشم منعرفهاش ازاي يا شهد
فارس : لما شهد حكتلي الموضوع كله وفهمتني الخطه بتاعتها عرفت منها أن انكل محمود كان مكلمها قبل كده عن موضوع أن البيت ليهم فيه بتاع هدي وطبعا بابا صديق تالث لابوها وانكل محمود فطبعا سألته وعرفت انه معاه ورق بيدل ع صحه كلام انكل محمود بس اللي صدمني ان اصلا البيت كله بتعهم فقابلت شهد الصبح وفهمتها كل حاجه وانا اللي وصلتها لبيت هدي وكنت مستني تحت
مهاب بمرح : ده ولا الافلام الهندي
شهد بابتسامة : هو فعلا شبه الافلام الهندي بس كل فيلم وليه نهايته
فارس : بس دي البدايه
جنه: ازاي؟
فارس بابتسامة هاديه : بدايه قصتي مع شهد .. ادم وطنط سعديه انا هاجي يوم الجمعه ان شاء الله مع اهلي واطلب ايد شهد منكم وده غصبا عن شهد شخصيا
ابتسم الكل وقربت سعديه من شهد ورفعت ايدها وافتكر الكل انها هتضربها حتي شهد بس هي حضنتها وشهد عيطت وحضنتها هي كمان
سعديه : انا مش هحاسبك علي اللي عملتيه .. بس لو خبيتي حاجه تاني يا شهد هضربك اكتر من لما كنتي صغيره
شهد بصوت خافت : بنتك وتعملي إللي إنتي عايزاه فيها .. اسفه
بعدت عنها ومسحت دموعها وجنه قربت منها وخبطتها ف كتفها اكتر من مره وشهد ثابته
شهد : ممكن تبطلي جنان .. اي ماانتي ضربتيني بالقلم خلصانه
جنه : انا لو اطول اقتلك هقتلك يا شهد .. بقي تخبي عليا كل ده وأنا إللي شايله همك .. وانت انت كمان كنت مشترك معاها ف الجريمه دي يا ادم
ادم : ما باليد حيله وبعدين انتي قلبك طيب ورهيف فمكنتيش هتقدري تشوفي كل ده وتسكتي يا جنه
جنه : تعرف بقي أنا هسامح شهد ومش هسامحك انت لاني متوقعتش منك كده
ادم بغضب طفولي لشهد : عاجبك كده
شهد وهي بتحضن جنه وجنه حضنتها جامد : اه المهم انها تكلمني انا
فارس لادم بضحك : اشرب يا حبيبي
ادم بضياع : يا سواد الليل عليك يا ادهومه
صالح : طيب انا همشي انا .. وشكرا يا شهد على اللي انتي عملتيه.
شهد : اسفه يا صالح انت ملكش ذنب بس
صالح مقاطعا : عارف .. هي إللي اتدخلت ولازم تدفع ثمن اخطأها .. سلام
ومشي وسابهم وكلهم بصوا مكانه بحزن
مهاب : فعلا كان خساره ف تسنيم .. طيب همشي انا كمان يا رجاله اتأخرت اوي ع الشغل وانت هخترعلك اي حجه واقعد ف البيت متقلقش
ادم بمرح : متقدرش تعمل غير كده اصلا .. غور يلا
فتح هاشم الفون بتاعه ولقي مكالمات كتير من ريم اتصل بيها وكانت بتعيط جامد
هاشم بزعيق : يا بنتي ف اي مالك .. طب اهدي .. اهدي خلاص بقي انا جاي متقلقيش سلام
جودي بغيره : ف اي
هاشم : ريم رجلها اتكسرت ف المستشفي ومنهاره
جودي : وانت حامي الحمي بتاعها يعني
هاشم بعند : اه حامي الحمي لانها ملهاش حد غيري هنا يا جودي هتيجي معايا اتفضلي مش هتيجي براحتك
ومشي ناحيته عربيته وجودي بصت للبنات وشاوروا ليها تروح ورا هاشم وفعلا راحت وراه وهو اتنهد وركب وراها ومشي
ادم بابتسامة : والله العظيم مجانين .. وكله بسببك يا شهد كان لازم يعني الشو إللي عملتيه عنده ف البيت ده
شهد : امال هاشم هيظهر ازاي يا ذكاء يعني مالك يا ادم ما تفوق كده
سعديه : يلا نروح بيتنا ونكمل خناق هناك
شهد : لا انا عندي شغل و
قاطعها فارس : لا إنتي اجازه النهارده روحي اقعدي مع عائلتك .. وان شاء الله اكون عندكم انا كمان بعائلتي يوم الجمعه
سعديه بابتسامة : تآنسوا وتشرفوا يابني
جنه بغمزه ملاحظهاش حد غير شهد اللي بصت ليها بنظرات ناريه : طب هنسبقك ع العربيه يا شهد يلا
ومشيوا كلهم على عربيه ادم وشهد فارس واقفين قصاد بعد ومش عارفين مين فيهم يبدأ بالكلام لحد ما قررت شهد تتكلم
شهد : شوف إزاي تعرف امبارح وتحصل كل حاجه النهارده
فارس : ده عشان ربنا بيحبني
شهد بعدم فهم : اشمعنا
فارس : عشان مفضلش ملطوع ومتحصلش الجوازه .. دلوقتي بقي ومفيش عليكي اي هم ولا خطه ولا بتاع تتجوزيني
ابتسمت بخجل واتكلمت بمشاكسه : يوم الجمعة اقولك رأيي يا بشمهندس
فارس : يوم الجمعة حاجه ودلوقتي حاجه تانيه خالص قولي يا شهد
شهد : موافقه وامري على الله اهو اكسب فيك ثواب
رفع حاجب واحد بضحك : لا والله
شهد : اها .. يلا مع السلامه وشكرا على كل حاجه عملتها معايا
فارس : من هنا ورايح مفيش شكر مابنا على اي حاجه
ابتسمت بهدوء ومشيت عند ادم وهو ضحك بخفوت وركب عربيته ومشي
&&&&&&&&&&
ابراهيم بغضب : عاجبكم إللي حصل ده كل ده بسبب اعمالكم .. حتي البيت اللي احنا عايشين فيه عايشين فيه شفقه انتوا فاهمين
هدي : كل حاجه انتهت
ابراهيم: يعني ملاحظه دلوقتي .. ملاحظه .. شوفتي كرهك وحقدك على الناس وصلنا لايه بنتك واتطلقت وابنها ابوه خده منها وحقه لان لو كنت مكانه كنت اخاف على ابني من بنتك .. البيت بعد خمسه وثلاثين سنه نكتشف انه اصلا مش بتعنا فيها ايه لو كنتوا زي الخلق بتحبوا الناس وفوق كل ده عايزه تقتلي البت بس طلعت انصح منك وكسرتك انتي
تسنيم بحقد : انا بكرهها بكرهها
ابراهيم : واي الجديد ماانتي ع طول كرهها .. واستفدتي اي كل اللي عملتيه ف الماضي اترد ليكي والعن من الاول على الأقل شهد مخسرتش كتير لا كان عندها عيل ولا تيل انما انتي ابنك ضاع منك افرحوا بقي
هدي بصراخ : كفايه بقي كفايه اسكت بقي .. مش انت إللي جبتها لينا البيت.. مش أنت اللي دخلتها وسطنا وانا كنت رافضه بس انت دخلتها غصبا عننا انت السبب في كل ده
ابراهيم : انا السبب .. انا السبب بردو .. اقولك الكلام مش هيفيد معاكم انا سايبكم وماشي اشبعوا بقي بانتقامكم ده
ومشي وسابهم وكل واحده فيهم بتتوعد لشهد وجواها وجع وكره غريب من ناحيتها
&&&&&&&&&&
وصلوا على المستشفى وسأل على الاوضه إللي فيها ريم ووصل لهناك لقي رجلها متجبسه ومغمضه عينها بوجع
هاشم : ريمو .. حصل ازاي ده
ريم بدموع : انا كنت ماشيه ف الطريق وكنت عايزه اسألك على الطريق فجاه العربيه خبطت فيا ومحستش بحاجة غير وانا هنا والم فظيه ف رجلي يا هيشو
جودي ف نفسها : مكنتش اتقطمت رقبتك وخلصت منك .. والله لو اعرف صاحب العربيه كنت حابسته عشان مكسرش رقابتك وريحني منك
هاشم بحنيه : يعني كان لازم تكلميني وانتي بتعدي يا ريمو .. خلاص اهدي هتبقي تمام
جودي : اه طبعا ده هيشووو واخده بااك دكتور وأنا دكتوره والاعتماد الكلي هيبقي عليا تنسي هاشم خالص يا  روحي انا ههتم بيكي  .. اكنه مقتول بعد الشر يعني
ريم : لا يا حبيبتي متقلقيش .. هيشو هيهتم بيا مش عايزه اتعبك
جودي : هيشو ده تنسيه يا روحي اصل عنده شغل كتير فمش هيكون فاضي ولا اي ياسي هيشو
هاشم : ايوه صح .. جودي هتهتم بيكي
جودي : ويارب تطلعي سليمه
ريم بدهشه : افندم
جودي : اقصد يعني اعرف اقوم بدوري صح
هاشم : طيب انا هروح اشوف الدكتور عشان نخرج عارفك مبتحبيش تقعدي في المستشفيات
جودي بسخريه : بجد .. ده انت حافظ بقي
هاشم : اه حافظ ثواني وراجع
ومشي وساب واحده بتغلي وبتتخيل انها بتجيب ريم من شعرها وتخبطها ف الحيطه لحد ما تموت وتخلص منها بس فاقت تاني وهي بتستغفر ربنا
ريم : انتي بتغيري على هيشو ولا اي
جودي : نعم ياختي؟؟؟؟
ريم : زي ما سمعتي .. واضح اوي انك بتغيري عليه
جودي : يعني انتي معندكيش دم بقي
ريم بغضب : نعم
جودي : زي ما سمعتي .. اه ونصيحه ليكي بلاش تقولي هيشو دي كتير عشان مطيرش ليكي صف سنانك الابيض ده
ريم : انت غيرانه مني ؟؟
جودي : اغير منك انتي وانتي شبه عروسه باربي كده
ريم : وماله عروسه باربي حلوه مش وحشه
جودي بهدوء حاد : بصي انتي لو متخرصتيش هكسرلك نفوخك وقابليني لو عرفتي تقومي منها غير بعد سنه انا دكتوره وعارفه نوع الإصابات ومدتها كويس اوي يا روحي اشطا
بصت ريم ليها برعب وسكتت تماما ودخل هاشم وكان رايح عشان يشيل ث ريم
جودي : اي حيلك حيلك انت هتعمل اي
هاشم بتعجب : هشيلها مش شايفه رجلها مكسوره
جودي : هي رجل واحده مش الاثنين وسع انت انا هسندها وتمشي على رجلها السليمه مش لازم تشيلها
وفعلا قربت منها وسندتها وريم منطقتش وماشيه ساكته خالص حتي الالم مطلعتش صوت من شكل جودي المرعب وهاشم واقف كاتم ضحكته بالعافيه ومشي وراهم وبعد مده وصلوا للعربيه ومشيوا وبعد فتره وصلوا قدام البيت وجودي جريت علي ريم لما لقت هاشم بيقرب منها
هاشم : اي هتطلع ازاي هي دلوقتي يعني مش شايفه السلالم
جودي : اولا دول سلمتين مش سلالم ثانيا بقي هم دول اللي هتطلعهم وهتركب اسانسير مش هتطلع على رجلها فياريت تمشي بهدوءك
هاشم متجاهل جودي : هتقدري تطلعي يا ريم
بصت لهاشم وبعدين بصت لجودي وكانت قربت تعيط واتكلمت بصوت مهزوز : اه هقدر
ابتمست جودي ابتسامه صفرا وطلعتها ودخلوا البيت ودخلت ريم لحد اوضتها
جودي : معتقدش انك بتتحركي كتير فالاحسن تنامي دلوقتي وبعدين ام تصحي تاكلي
هاشم بضيق : جودي
ريم بسرعه : لا هي معها حق .. هنام انا
هز راسه باستسلام وطلع برا وجودي اتجاهلته ودخلت اوضتها غيرت هدومها ولسه بتقعد لقت هاشم داخل عليها
هاشم : ينفع اللي إنتي عملتيه ده معاها
جودي : معملتش حاجه وبعدين انت كنت عايز تشيلها ده انت مشلتنيش ساعه الفرح
هاشم : انا ؟؟ مش لفيت بيكي قدام الناس
جودي : بس مشلتنيش لحد الاوضه زي اي عروسه وجاي تشيل الباربي دي علي فكره تقيله كانت هتوجعلك ضهرك
هاشم : تقيله اي بس دي غيره يا حبيبتي
جودي : بطل تقولي غيره دي عشان مروحش اخلصلك عليها دلوقتي حالا .. أمشي يا هاشم امشي
هاشم : براحتك يا جودي انا تعبت من أن كل شويه اقولك سامحيني وافتكرت أن بعد النهارده هتعرفي اني كفرت عن غلطي من زمان ونرجع زي الاول بس لا براحتك خالص
طلع برا وهي قعدت على السرير بتعب وعيطت وهي مش عارفه لي بتعمل كده او بتعامله بالطريقه ديه ليه
&&&&&&&&&&&&&
جنه : يعني حتي بابا كان عارف
شهد : لا ع فكره انكل محمود معرفش اي حاجه غير لما فوقت من الغيبوبة
سعديه : خلاص بقي اقفلوا على اللي فات .. مش هنستفيد حاجه
ادم : فعلا يا ماما
جنه بغمزه : بس اي حكايه فارس ده يا شهد ها
شهد بحده ؛ جنه اتلمي
ادم : كده بتحرجي البونيه
شهد : والله ماانا سيباك يا ادم
وقامت جريت وراه وهو جري منها والكل بيضحك واتحول الأمر أن ادم إللي بقي بيجري ورا شهد ووقعها على الكرسي وقعد يزغزغها لحد ما تعبوا وقعدوا يضحكوا
جنه : هقوم امشي انا بقي لان كده انا طولت كتير
شهد لادم بهمس : اتحرك يا متخلف وصالحها
ادم : ما كله بسببك يا شهد الكلب .. احم تعالي يا جنه هوصلك
جنه بجمود : لا شكرا هاخد تاكسي
ادم : معندناش بنات تركب تاكسي يلا يا جنه يلا يا ماما يلا
وزقها علي برا وبعت بوسه للموجودين ونزلوا
سعديه بضحك : والله لايقين على بعض
شهد : فعلا حب من الطفوله بقي يا مامتي تربع وترعرش علي العرش ف القلب
سعديه : عقبالك يا شهد انتي كمان لما تلاقي نصيبك الثاني كده مع اني حاسه انه هيكون فارس مفيش كلام بس الجمعه مش بعيد .. يلا تصبحي على خير
شهد بابتسامة : وانتي من اهل الخير
دخلت سعديه الاوضه وسابت شهد ف أفكارها هي عارفه أن اكيد هدي مش هتعديها بالساهل والموضوع ده قلقها جدا ربنا يستر من اللي جاي
&&&&&&&&&&&&
نزل معاها تحت ووقف جنبها ومش عارف يبدأ بايه وهي ساكته ومستنياه يتكلم
آدم : اسف
جنه : هو انت عملت حاجه
ادم : جنه بقي .. صدقيني مكنش قدامي حاجه غير كده
جنه : انت خبيت عليا
ادم : صدقيني ده عشان مصلحتنا كلنا افهمي
جنه : انت ضحكت عليا يا ادم .. عيشتني طول السنين دي مغفله وانت عارف كل حاجه
ادم : حقك عليا سامحيني .. اسف يا جنتي سامحي ادم
جنه : هسامحك من بكره الصبح
ادم بتذمر ؛ نعم ياختي واشمعنا يعني
جنه : مزاجي .. واتفضل وصلني من غير صوت والا اخليها بعد اسبوع
ادم : واهون عليكي
جنه : زي ما انا هونت عليك السنين دي كلها اه تهون يلا اتفضل
ركبت العربيه وسابته واقف بيشتم في شهد وركب وراها واتحركوا لحد البيت
&&&&&&&&
دخل فارس الييت ولقي جيداء قاعده معاهم سلم على الكل ووجه كلامه لجيداء
فارس : مقولتيش ليها انك جايه هنا كنت جبتك معايا
جيداء : لا عادي انا لفيت لفه بالعربيه كده وجيت على هنا .. انت اللي اتاخرت
فارس : كان ورايا شغل كتير ومش قادر هموت وانام
شريف بحنيه : طيب يا حبيبي اطلع ارتاح
فارس بنعاس : طالع فعلا بس ف حاجه مهمه .. انتوا هتيجوا معايا يوم الجمعة قرايه فاتحتي وطبعا انتوا عارفين العروسه تعيسه الحظ شهد اجهزوا زائد تصبحوا على خير
وطلع وسابهم بعد ما رمي المفاجأة دي في وشهم بصوا لبعض ف دهشه وبعدين جيداء وانجي صرخوا مره واحده : ييييييييس
&&&&&&&&
رايكم في البارت النهارده لو ف حاجه مش مفهومه ياريت تقولوا عشان اوضحها
توقعاتكم
#Nemo