فتحت الباب وطبيت لكيته كاعد علقنفه ومنصي راسه. ضعيف وشعره خفيف مسوي مارنز ومبين حنطاوي نصيت راسي عود استحيت تقربت كعدت
كلت السلام عليكم
حميد: وعليكم السلام شونج
عذاري: بخير وانته
حميد: الحمدلله، ،اسمج عذراء مو
عذاري:يا صخام الصخمك حته اسمي مايعرفه طبعا حجيتها بكلبي
لا عذاري
حميد: هاها عاشت الاسامي عذاري
عذاري: شكرا
حميد: مثل مكلولج انه عدي جهال ثنين ولد وبنيه رقيه وسامر. ومرتي توفت صارلها تلث اشهر وتربيتهم صعبه وانه رجال اشتغل وما امن اخليهم عد نسوان اخوتي ودلوني عليج الناس الخيره
عذاري: اها الله يرحمها
حميد: ويرحم والديج
عذاري بقينه شوي ساكتين وراها حجه بشغلات عاديه والعرفته سامر عمره اربع سنين ورقيه سنتين
وعنده اخوان اثنين حيدر وكرار ومزوجين وكلهم ساكنين بلبيت
واخت وحده عمرها بنهايه العشرين ومامتزوجه بس هلوحده عدهم اسمها هناء
وهم بابت عرب يعني عدهم كاع وزرع ومواشي وحلال
شفته فقير وهوه اصغر واحد بأخوته نتبهت ع شكله عادي مقبول
كلت هوه هذا حضي شيجيب بس التعب والشلاع الكلب من هسه كيعان وزرع وحلال وامهم مبينه وكحه ونسوان اخوته هم شفتهن يخوزرن وبيبتهم ام ابوهم عايشه وياهم يعني عائله كامله ماشالله شدعيلك بويه ورطتتني
بقه ساكت شوي وكال انه اترخص صيحلي العائله هم يلا نروح
عذاري:ماشي الله وياكم
طبيت ليجوه واني خاليه من االامل فوك الجهال
الحوكع بيهم. هنوب عائله بكد العشيره
شدعيلك ابوي وامجد
رحت صحتهن عود بوسني وطلعن راحن فضت الكعده وراحن النسوان اليمنا وطبيت الغرفتي ابجي
يارربي شسوي هسه اني دخيلك خلصني
مرت الليله واني دموعي نازله ع خدي
صبحنا الصبح طلعت من الغرفه لكيت بنين دتغسل مواعين
وفاطمه دتثرم علكاونتر
طبيت كلت صباح الخير
فاطمه:صباح النور عروس الساعه ب11ونص
عذاري:والله بكيفي شوكت ماريد اكعد
فاطمه:ع الاقل ساعدينا بلشغل شنصير احنا
عذاري:اكلج اشو البيت ونضيف بعد شتردين مني شنو قصتج وياي دكافي عوفيني
فاطمه:يمه يمه ع كيفج عيني اكلتيني وشربتيني
بنين: هاي شبيج فاطمه تره انتي جبتيهه النفسج
فاطمه:هاي عود انتي حجيتي ابدال متلوميني علميها الاحترام
بنين: والله اليجي من ايده الله يزيده
فاطمه:من هذا طلكوج
عذاري:باوعت ع بنين جانت تغسل بلماعون من كالت هيج رأسا دمعت عينها وذبته من ايدها وفاتت جوه
ها فطيم رتاحيتي
فاطمه:انتي سكتي بالله
عذاري:اوووف ياربي شيخلصها عاد حجيتها بكلبي ومشيت للستقبال لكيت امي كاعده تكلم باميه
ام عذاري: ها يمه شبيجن اصواتجن طالعه
عذاري:هيه يوميه ليش متعجبه
ام عذاري:مسولفتيلي البارحه ع العريس
عذاري:امبين زين بس امه ونسوان اخوته مبينات وكحات
ام عذاري:عساس هسه انتي لسانج قليل
عذاري:محجن وياج
ام عذاري: بلي حجن كالن بعد تلث ايام للخميس نمرلكم يعقدون محكمه لان مستعجلين علمود الجهال
وعود الحنه اذا رادت خلي هيه تسوي لان احنا عيب توها ماتت مرته
عذاري:شصخم بل حنه بعد هلضيم هذا
اوووف شدعيلك بويه وامجد
ام عذاري:اسكتي لايروح يجي ويسمعج
عذاري:كمت منها واني افكر شون حتأقلم وياهم وهذول الجهال شيحملهم ويكبرهم هوه اني اريد واحد يكبرني
مرن التلث ايام حسيتهن يركض ركض لعذابي والجحيم. مالي. وقبلها بيوم جنه مسوين الفحوصات مال دم ومدري شنو علمود العقد
كعدت الصبح ب 8ونص بدلت وجهزت نفسي واجت امي وابويه وياي وبنين عشيره رايحين
وصلنا للمحكمه نزلنا من السياره ولاكونه هوه واخو واخته وامه
اخو عاكد الحاجب وشعره حفر وخفيف مبين بلجيش
سلمنه عليهم
وطبينا جوه
جانت هواي بيها عرسان يعقدون وبيهم الفرحانين والمتكاودين بس حضي واكف يمي جنه ميت
فتنا. عقدنا وطشو جكليت علينا وهلهلو همزين هلهلو ماكوله مرته متوفيه هستوهه وميصير
بس نتبهت ع امه واخته سلمن من وره خشمهن
بقه كلساع يباوعلي ويرجع يدنك
ماعونت نطلع ونرجع لبيتنا النوب بابا عزمه يمنه بس ماقبل كالو عدهم شغل
وتحدد يوم ياخذوني بس زفه لبيتهم سبوع الجاي الخميس
مر الاسبوع بين الجهاز والخطار والهوسه. واجه يووم الزفه
سميته اليوم الموعود اشوف فاطمه سبوع كامل تنضف ومتحاجيني وكله حبي وحياتي مكيفه حرح. رحت للصالون الصبح اني. وبت عمي شهد واختي بنين و......للحكايه بقيه
ملاحضه:اعتذر عن التأخير بس مريضه كلش وكوه كتبت هلبارت البسيط انتضروني بلجايات بارتات اطول
