عذاري:اذا متحجيلي ويامن جنتي تحجين هسه افضحج فضيحه واخليهم ياخذون تلفونج
باوعت عليها كامت ترجف بهل لحضه. طبت عمتي للغرفه
عمتي:ها شبيجن
عذاري:لاا عمه ماكو شي دنسولف اني وهناء
مدري شخذت وعافتنه وطلعت ركضت سديت الباب وراهه وكعدت يم هناء
يله احجي بسرعه
هناء:بس عليج الله لاتحجين لحد وعلي يذبحوني ومايرفلهم جفن
عذاري:لا ماكول بس احجيلي الحقيقه
هناء:باعي هذا صديق همام قبل خطبني. وماوافق لان يشرب وهوه يعرف بسمعه صاحبه ومن عرف همام بعلاقتنه تعارك ويا وصارت مشاكل وبوقتها كتلني وبلكوه فكوه مني وحته رادت تصير عشاير بس نسدت السالفه وتقاطعنه
بس هسه اني عدي علاقه بي لان احبه ويحبني وكال حرجع اخطبج وبعد ماعرف شحيصير ومن يومها همام قفل مايزوجني وهلتشوفين عمري صار 29 سنه ياهو اليخطبني يرفض ومعلكني من ذاك اليوم الهليوم
مع العلم احنا عندنا البت تتزوج من عمرها 14 و15 سنه
ومن تصير المناسبات يعيرني العانس والعانس
مايدرن انه جان من زمان مزوجه لوما اخوي
عذاري:جا ليش مايقبل بي
هناء:عبن يشرب وابو نسوان
عذاري:وانتي شون اتقبلين بهيج واحد ماتغارين علي
هناء:جا شسوي غير احبه
عذاري:وشنو اليثبت انو هو حيرجع ايخطبج ومايضحك عليج
هناء:هاا والله خيتي ماعرف بس غير هوه كالي
عذاري:هههه اثاريچ ثوله يولي كلنه نكدر نحجي ونكول ونوعد بس علينا بل فعل وبله هوه من يمته كايلج ارجع اخطبج
هناء:كبل سنتين واعدني بس كالي خل الم چم فلس
عذاري:صفكت اديه وغميتها يولي انتي هم مطفيه صارله سنتين مواعدج وفوكاهه يشرب ونسوان وانتي مصدكته كطيعه
هناء:اوكفي اوكفي شو طلعتي بي فرد طلعه اكبر منج انه وماخذه راحتج بل غلط
عذاري: جاا انتي اكبر مني وهذا عقلج
صدك لاحضت شغله ع همام انو دائما متعصب ومايتحاجه عكس حميد عازل روحه حيل جاوبيني براحه عليج العباس
هناء:همام سالفته طويله انتي عاد كيفتي واحد يحاجيج ويقصقص الج
عذاري:لا يولي دسولفي انه صارلي تلث ايام هنا شو وحيدي حته نسرين ونور مايطلعن
هناء:روحي سبحي الجهال بلبدايه وبعدين تعاي احجيلج امري لله
عذاري:ركضت طلعت هدوم للجهال وصحتهم داسبحهم واني ابالي موضوع همام وليش هيج متعصب
الفضول كتلني ماعولت اخلص بسرعه
ورحتلها
هناء:ها اشوفنج رجعتيلي
عذاري:جا غير الفضول نحرني
هناء:اي احجيلج ع همام اخوي
كبل سنتين بلطائفيه ب2007 وجان الذبح بلكطنه بيوم من الايام خابره صاحبه اعز واحد عندي ومن هوه وصغير سوه بس نتقل لبغداد هوه سني بس جان ساكن بلبصرا هواي
بيوم خابره كله انه جاي للبصرا عليك
فمن اجه ثاني يوم بليل طلعو مدري وين رادو يرحون
جانت دائماً توكف سياره مضلله براس الفرع هاي اي واحد غريب يشوفو مو من هين يكتلو
ليش موشافوهم الزمو وكتلو كدام عينه
همام اتخبل وصارت بي حاله نفسيه خطيه مرته شكد هملها وعانت هواي وابنها همات جان صغير وماله شغل بي
ومايلفي بلبيت تخبل ع صاحبه
فصار نادراً تواجده بلبيت كله بلدوام هوه يروح اسبوع وينزل اسبوع
بالاسبوع الينزل بي هوه مايبقى بلبيت مدري وين يطلع
ف هل تشوفي دائما معصب ومشاكل يسوي بلبيت يفرغ كل قهره بينه
عذاري:صدك انقهرت عليه
زين وحميد اشبي ليش هلكد مايحجي وعازل نفسه حته وياي ماله شغل بيه
هناء:حميد تعب من موتت مرته هي جانت بنت عمنا واخذها عن حب بس خطيه كبل اربع شهور تفاجئ بموتها
عذاري:شون ماتت الله يرحمها
هناء:اووف موته فضيعه خطيه الله يرحمها
جان طباخنه بي دهن وسواد لاجع عليه وهيه نضيفه حيل راحت جابت نفط وجلفته بي
من جاي حميد داتحميله الاكل وهوه مناشف زين
اول ماشاعلته كابه هيه والطباخ وماملحكين عليها وماتت الله يرحمها
عذاري:من سمعت موتتها بجيت متحملت
هناء:كومي جا انتي ماصدكتي تسمعيلج سالفه تبجين عليها كومي دانام خلصتي كلبي
عذاري: تصبحين ع خير باجر تكعدين تساعديني لا افضحج
هناء:اهووو رجعنا للتهديد ماااشي فتهمت
عذاري:ضحكت ومشيت بس بقه بالي يم هذا التحبه شسمه وشكد عمره وحلو او لا
اووي وهسه انه شعليه
...................
عدن تلث ايام ع خير هناء ويايه ويايه تخاف لاترفضلي طلب وافضحها الثوله
بليوم الرابع ندك الباب رحت دافتحه وتفاجئت بهمام لابس عسكري وجنطته ويا
تذكرت مالابسه شال
ركضت ليجوه جريت الشال وطلعت للمطبخ
لكيته كاعد عل جودليه
يشرب مر ومرجي راسه عل حايط
فتت من يمه داسد باب المطبخ
وجان يحجي
همام:ماعدنا نسوان تفتح الباب ومره ثانيه نتبهي وحطي شال ع راسج مو جنج خبله ركضتي فتحتي
عذاري:فتحت عيني تفاجئت شون يكلي خبله
عبالي سامر لان دزيته للمحل يشتريلي
شو هناك وفات سامر من الهول جان يباوعلي همام
همام:ها سامر وين جنت
سامر:عمو جنت يم بيبي اكل
عذاري:باوع عليه همام وشال جنطه وطب جوه
غميت نفسي دومي اجذب
فتت ليجوه واول مره اشوفه مبتسم
هناك وجت مرته سلمت علي
وكعدت
عمتي:يمه ماحضرلك اكل
همام:اي والله جوعان حيل بس اسبح
عمتي:اليوم نسرين تعبت كومي يمه عذاري
عذاري:بكلبي كلت هسه انتي كتيله احضرلك اكل شو صخرتيني بس نقذتني من حجت هناء
هناء:لا يمه هسه انه اسويله
عذراي:اكوم اساعدج
كملنه الاكل وصحناله
هناء كلتلي حروح بس سويله الجاي وصبيله
وكفت علطباخ اسوي بلجاي وهوه مدنك ياكل كلساع اسرق النضره اله اشوفه شديسوي
بقيت واكفه علجاي اطكطك بصابيعي شو توترت
اهوو عذاري هسه انتي شداسوين بنفسج حتكضين عمرج هيجي تراقبي هسه شعليج
قطع صفنتي. صوته وهوه يصيح
همام:الججاي الجاي يمعوده
عذاري:ها وينه نداريت كبل طفيت النار
همام:حسبي حسابج اذا محروك تسويلي واحد غيره
عذاري:ركضت اصب واني اسمعه يضحك يااربي شنو هالانسان هذا ساعه يضحك ساعه يعصب
صبيت الجاي واني ادعي ربي يطلع مامحروك حته ماسوي غيره
دنكت للكاع انطيتهيا
همام:ثوبج
عذاري:شنو شبي
همام:من ادنكين لمي ثوبج زين
عذاري:وووين يلا وصلت الفكره عزه العزاني
طبيت ليجوه كبل
ميستحي هيج يحجي بس لا مابيها شي هوه دينبهني
اجه حميد بليل وكبل صعد الغرفته. صارلي اكثر من اسبوع اهنا وحته اهلي ماعزموني ولا سوولي حفله سبعه سكتت ماحجيت بس استغربت من حميد ميحجي وويايه اصلا
اما الجهال فعادي وياهم تعلمو عليه بس سامر شويه نحس يدور ع امه هواي
طكت روحي وصعدت لغرفتي لكيت حميد متمدد صافن
عذاري:حميد
حميد:ها
عذاري:انته .....وللحكايه بقيه
