كرونيك #ما_ذنبي_انا

2⃣

2.ميسااء.. ميسااااء ...  يااااا ميسااااااا نوضي آ ماما راح عليك الحال .. ياااا هاني نايضة .. نضت بزربة غسلت توضيت صليت بدلت قشي ، لبست ليكات في لبوردو و سروال نوار مع كونفارس في النوار رحت فطرت و عاودت رجعت درت خيماري نوار بعدما درت شوي لوك و غسيل و هزيت ساكي وخرجت .. كانت 7:45 .. وين نخدم قريب لدارنا مشية 10 دقايق.. وصلت لقيت سي أحمد ولا كما نقولو أنا عمي أحمد في المكتب ، هو مول لمكتب مهندس كبير ومعروف، صباح الخير عمو .. واش راك مبكر ليوم  _ ايه يا بنتي كاين خدمة ، ليوم جاي وحد سيد من شركة للمنشئات الهندسية و نشالله نديرو معاهم عقد و نزيدو نحكمو مشاريع أخرى. أنا: واااو ان شاء الله ربي يسهللنا ، مالا تولي عندنا بزاف لخدمة  - ايه آ بنتي غير وجدي روحك أنا : اووو تعبت من دك ههههه  _ههههههه ربي يسهل ان شاء الله.  خرجت من عند عمي أحمد و انا نخمم .. اوو بزاف الخدمة و نزيدو نلسقو روحنا في هذ الشركة، أصلا المكتب مافيهش بزاف مهندسين عمي أحمد و زوج مهندسين إلياس و عمار و كاين بنت شادة الدوسيات و هذوك صوالح يعني سكريتيرة و كاينة أنا مهندسة مبتدأة يعني غير نعاون جامي حكمت projet وحدي. الغد من ذاك نضت بكري و رحت للبيرو بكري على 8 دخل إلياس شوية هكا جا عمي أحمد وعمار و جدنا كامل الوثائق و قعدنا نستناو في مندوب الشركة.. ولات 9 ونص جا المندوب و المحامي تفاهمو و وقعو العقد شراكة عامين قابلة للتجديد. لعشية عرضنا عمي أحمد للعشاء إحتفال بالعقد الجديد .. وجدت روحي ماما خلاتني نروح بحكم عمي أحمد كان صاحب بابا الله يرحمو، لبست نورمال جيب نوار مع فاست كوير نوار تاني و تحتها ببل بلو نوي وخمار بلونوي كحلت عويناتي و درت غيسيل جيت سامبل و مسرارة كما تقول ماما  دخلنا للمطعم بسم الله...