FOREVER WITH YOU

Chapter 13.1.2

CHAPTER 13.1.2

Pinaghandaan ni Jade ang araw na iyon. Papaano naman kasi'y natuloy na nga ang planong merger ng Twin Dragons at Good Flavors. May bahagi sa puso niyang natutuwa at alam niyang magkikita na ulit sila ni Andy. Kahit kasi katabi niya iyon sa condo ay tila napakailap nito at hindi man lang nagpapakita sa kanya. May bahagi rin sa kanyang kinakabahan dahil paniguradong makakaharap na naman niya ang ama ni Andy. Alam  niyang magugulat ito kapag nalamang siya ang ipinagmamalaki ng kanyang amo na tagumpay sa likod ng Good Flavors. At proud siya sa accomplishment niyang iyon dahil pinaghirapan talaga niya iyon. 

Pagpasok pa lang niya sa building ng Twin Dragons ay nakakuha na agad siya nang atensyon sa mga taong dati na niyang nakatrabaho. 

"Ms. Jade!" Si Wilma na excited pang  sumalubong nang nakita siya. 

"Wilma!" Masaya rin naman niyang sinalubong iyon. 

"Kumusta na, Ms. Jade?" Hindi pa ito magkamayaw. "Wow, babalik ka na ba dito?" Halos pabulong pa nitong tanong lalo na nga't hindi naman kalayuan sa kanila ang pumalit ditong C.O.O. 

"It's not like that," Bahagya pa siyang umiling. 

"Mas lalo kang gumanda." Mataman pa nitong tinitigan ang dating amo. "Sana dito ka na lang. Ang sungit ng amo ko." Nakanguso pang pagsusumbong nito.

"Wilma..." Bahagya pa niya itong dinilatan. 

"Ms. Jade, come on." Si Mr. Chen Sy na agad na rin siyang sinenyasan na pumasok sa conference room ng Twin Dragons. 

"Yes, sir." Tumango pa siya dito at agad na ring sumunod. 

At tulad nang inaasahan, agad niyang nakita si Andy na tipid lang na ngumiti sa kanya. Hindi rin nakaligtas sa kanya ang gulat na hitsura ng ama nito. 

"What is she doing here?" Hindi na  napigil ni Oliver Woo ang mag-react pagkakita pa lang kay Jade. 

"President Woo," Si Mr. Chen Sy. "This is Ms. Jade Dimaguiba, my General Manager for Operations." Proud pa nitong pakilala sa babae. "I guess you knew her. She worked here, right?" Makahulugan pa itong tumingin sa iiling-iling lang na kaibigang si Andy. 

"Yes." Hindi na nito nagawang makaimik pa. 

"She's the woman behind the success of Good Flavors. Why President Woo, do we have problems here?" 

"No..." Mabilis din naman itong umiling. "Should we start now?" Pormal na sabi lang din nito.

"Please..." Sagot naman ni Chen at naupo na nga sila upang umpisahan na ang meeting. 

Hindi na rin naman sila nagpaliguy-ligoy pa sa meeting na iyon. Pinag-usapan nilang lahat ang detalye ng merger at pati na rin ang mga taong ilalagay nila sa puwesto para silang mangalaga sa interest ng kompanya. 

"My son will take charge on the operations." Si Oliver na nakipag-unahan na kay Chen.  

"I want Ms. Dimaguiba to take charge too." Hindi rin naman nagpatalo si Chen lalo na nga't ang Twin Dragons lang ang tinutulungan niya. 

"We can't have two people for that." Kunot-noo pa ito. 

"We both share the same interest here President Woo. It's not like I don't trust Andy but our Jade here, it's her forte." Seryoso rin ang mukha nito. "Don't take things personally, I want Jade to be the Chief Operating Officer." 

"Okay then," Napabuntong-hininga pa ito. "They'll both have the position. Can we agree with that?" Wala na rin itong choice at hindi madali sa kanya ang desisyong iyon lalo na nga't mas malaki ang posibilidad na magkalapit na naman ang dalawa.