Love. Sex. Insecurity.
[Chapter 14]
By: Crayon
****Kyle****
1:23 am, Monday
March 21
Nahalughog ko na ang buong unang palapag ng bahay namin pero hindi ko makita si Aki. Hindi ko naman magawang gisingin pa sila Mama dahil tiyak na makakagalitan ako kapag nalaman nila ang ginawa kong pagtrato kay Aki.
Naiinis ako dahil pinairal ko na namang topak ko, hindi ko man lang naisip ang effort na ginawa ni Aki para puntahan ako.
Naisip kong lumabas ng bahay, nagbabakasakaling nasa labas lang si Aki. Dahan-dahan akong lumabas ng bahay para di makagawa ng ingay. Ayaw ko na magising sila Mama o ang mga kapatid ko.
Hindi ko nakita si Aki sa aming terrace kaya lumabas na ako ng gate. Agad naman akong nalungkot ng mapansing wala na roon ang gray na kotse. Sa pagkakaunawa ko ay iyon ang dalang kotse ni Aki. Naupo ako sa maliit na bangko na nasa gilid lang ng gate namin.
Di ko napigilan ang muling magbuntung hininga. Tiningnan ko ang oras sa aking wrist watch, pasado ala-una na pala ng umaga. March 21. My birthday. Dapat akong matuwa dahil inabot pa ako ng isa pang birthday. Pero parang ang hirap gawin noon. Napakarami kasing nangyari sa akin sa nakalipas na mga araw, napakabigat ng loob ko at di ko magawang magcelebrate at magsaya. Siguro matatawag na mababaw ang dahilan kung bakit di ko magawang magsaya pero gustuhin ko man kasing gawin iyon ay di ko rin kaya. Napakahirap na magpanggap na masaya ka lalo na kapag ganitong nasasaktan ka.
Nakatitig lamang ako sa kalsada habang nag-iisip. Minsan masarap pa ang mag-isa lang. Hindi mo kailangan magpanggap na okay ka kahit hindi naman.
Halos tatlumpung minuto din ata akong nakatanga lang sa labas ng bahay namin.
"Happy bithday to you! Happy birthday to you! Happy birthday, happy birthday. Happy birthday to you!", nagulat ako ng marinig ko ang pagkanta na iyon di kalayuan sa akin. Akala ko ay mag-isa lang ako ng mga oras na iyon. Hindi ko maaninag ang kumakanta dahil nasa parte siya ng kalye na di gaanong naiilawan ng poste ng ilaw.
"Birthday na birthday mo sambakol yang mukha mo.", pamilyar sa akin ang lambing sa tinig na iyon.
"Aki?", lumapit siya sa akin at ng mailawan siya ng poste ay nakita ko ang malapad na ngiti sa kanyang mukha. "Tarantado ka kanina pa kita hinahanap.", malakas na sabi ko sa kanya.
"Talaga? Hinahanap mo ako?", nakangisi niyang sabi habang nakatayo sa tapat ko. Tila tuwang-tuwa sa narinig kahit na nakakunot ang noo ko ng mga oras na iyon.
Agad ko naman siyang niyakap. Alam kong nabigla siya sa aking pagyakap, pero higit akong nagulat sa aking ginawa. Gusto ko na sanang bumitaw ngunit may kakaibang dulot na pakiramdam ang ginagawa kong pagyakap kay Aki. Iba sa akap ng kahit sinong lalaking nakilala ko.
"Huwag ka nga basta na lang umaalis sa tabi ko.", mahina kong bulong sa kanya na may halong pagtatampo. Naguguluhan ako sa mga sinasabi at ginagawa ko. Parang may sariling isip ang katawan ko at kusang ginagawa ang nais nito.
Naramdaman kong hinalikan niya ako sa noo.
"Binili lang naman kita nito.", napilitan akong kumalas para tingnan kung ano ang tinutukoy niya.
Ice cream. Cookies n cream.
"San ka bumili niyan?", taka kong tanong.
"Diyan lang may 7-11 na store diyan sa may kanto.", nakangiti niyang sagot. Ang sarap sa pakiramdam na sa tuwing kinakausap niya ako ay pinapakita niya ang nakabibighani niyang ngiti.
