Love. Sex. Insecurity.
[Book 2 : The Finale]
By: Crayon
****Kyle****
2:04 am, Tuesday
July 14
Ilang sandali lamang ay nakabalik na din si Renz sa kotse.
"Wala daw dyan si Aki, pero dito daw yun umuuwi kapag galing ng trabaho sabi nung guard nila.", bungad sa akin ni Renz.
Lalo lamang akong nalungkot sa aking narinig. Akala ko ay makakausap ko na si Aki pero mukhang nagsisimula na namng maglaro ang tadhana.
"Kung gusto mo dun muna tayo sa bahay, balik na lang tayo dito after an hour.", mungkahi ni Renz. Ilang kalye lang naman kasi ang layo ng bahay nila mula kela Aki.
"Hindi na, umuwi ka na lang muna. Hihintayin ko na lang si Aki dito.", sagot ko. Ayaw kong umalis sa tapat ng bahay nila hanggang di ko nakikita o nakakausap si Aki. Nangangamba ako na baka habang naghihintay kami ni Renz sa kanila ay biglang dumating si Aki at umalis agad para magpakalayo-layong muli. Ayaw kong may masayang na pagkakataon kaya mas gugustuhin ko na lang na maghintay.
"Hindi naman natin alam kung anong oras uuwi si Aki eh. Tsaka may sakit ka pa, magpahinga ka nalang sa bahay akona ang bahalang mag-check kung nakauwi na si Aki.", pamimilit ni Renz. Alam kong concerned lang siya sa aking kalagayan at ang gusto kong mangyari ay wala sa lugar kaya ganito na lang ang pagtutol niya.
"Kaya ko naman, medyo mabuti na yung pakiramdam ko.", pagmamatigas ko.
"Ang kulit mo din talaga eh, sige sasamahan na lang kita dito.", sagot ni Renz.
"Huwag na, magpahinga ka na lang sa inyo tsaka kailangan kong mapag-isa muna. Magiging mas madali para sa akin na kausapin si Aki kung kami lang dalawa.", katwiran ko. Ayaw ko din kasi na datnan kami ni Aki na magkasamang naghihintay sa tapat ng bahay nila. Ayaw kong maging awkward ang sitwasyon para sa aming tatlo.
"Tingin mo, hahayaan kitang mag-intay dito sa labas ng mag-isa lang?"
"Please Renz, nakikiusap ako sayo. Pagbigyan mo na ako." Natahimik naman si Renz nang marinig ang pagsusumamo ko na hayaan na lang muna akong mag-isa.
"Okay fine, hahayaan kita sa gusto mo pero after an hour at wala pa rin si Aki, susunduin na kita dito. Matutulog ka sa bahay at bukas mo na ng umaga kakausapin si Aki. Ok ba yon?", tanong ni Renz. Tumango lamang ako at lumabas na ng kotse niya.
"Mag-text ka kung gusto mo magpasundo ng mas maaga ha?", pahabol ni Renz.
Pinanood kong makalayo ang kotse ni Renz. Naglakad ako ng konti palayo sa gate ng bahay nila Aki, ayaw ko naman mapagkamalang magnanakaw. Naupo ako sa isang malaking bato na nasa gilid ng daan.
Hindi ko iniinda ang lamig ng gabi o ang kagat ng lamok. Nanatili akong nakaupo at nakatingin sa malayo habang tahimik na humihiling na makita ang headlights ng sasakyan ni Aki. Sinisikap ko ring mag-isip kung paano ko kakausapin si Aki pero dahil sa pagod sa nangyari sa maghapon at sa panaka-nakang pagsakit ng ulo ay walang pumasok sa aking isip.
****Renz****
2:15 am, Tuesday
July 14
Kanina pa ako nakaparada sa tapat ng bahay namin pero hindi ko pa magawang i-garahe ang aking sasakyan. Nakaupo lamang ako sa loob ng kotse. Nag-aalala ako sa kalagayan ni Kyle. Hindi ata tama ang ginawa kong iwan na lamang siya doon na mag-isa. Pero wala akong nagawa kundi sumangayon nung makiusap siya sa akin.
Kita ko sa mga mata niya kung gaano niya kamahal si Aki at kung gaano ang pagnanais niya na magkausap sila ngayon. Mukhang si Aki na nga ang kanyang happiness.
