يلا من يومي بنتقد العلاقات وحتى صحباتي لمن يحكو لي بقعد استهتر لاني شايفه قلبي دا ما بدق الا للطقه 😂✋
المهم خالتي قررت تنزل السودان وعندها بتين وولد ،، البتين وحدي اكبر مني بسنتين اسمها وعد... والتانيه اصغر مني ب3 سنه اسمها ريل.. الولد لسه صغير اسمو خالد وطبعا فصيح فصاحه دا مواقفو كتيره بحكيها ليكم
يلا خالتي نزلت معانا يومين عشان في تشطيب في بيتها... انا من النوع الما بهتم بنفسي كتير
باكل وم بظهر فيني... لوني قمحي... ولساني اطول مني وطبيعي طاشه شبكه
عكس بت خالتي اسمها وعد... وانتو عارفين ناس الشهاده العربيه ماشاءالله يعملو كدا😂👋 ... لون وصحه يعني خلقه واخلاق ماشاءالله تتبارك ما تتشارك وتتعلى ما تتدلى
اليومين القعدوهم معانا ديل هي تتمسح ليل ونهار وكل مره مطلعه كريم اول مره اشوفو في حياتي مع انو لونها انضف من نيتي لكن الترطيب عندها اهم من حياتي انا دي وحاتكم.... انا اصحى شعري منكوش وشايله هم نضافة البيت لانو اي بت تجي تشتغل لينا انا بطيرها بنظرياتي... امي قررت ماف اي بت تجي تاني واشتغل برااااي.... يوم صحيت وحاسه جسمي دا كلو يطق التقول دلوكة انصاف مدني... طواااالي اتمديت في سريري وعاينت لوعد لقيتها نااايمه نومة ملاك ماشاءالله... وريل اختها نايمه... اها انا الرقده غلبتني وديل ضيوف بشيلو حالي... اتنفضت قومت وقولت هووووي يا فدوى احسن ليك تشوفي شغلك.... سريع سريع ظبطت اموري ولفيت شعري وهووووب ع الشغل... اتحدى اي حبشيه يدي خفيفه ماشاءالله وكف كف كف خلصت... وعد صحت قالت لي البت البتشتغل ليكم نشيطه عليك الله كلميها لو بتقدر تجينا بعد نستقر في بيتنا
عاد انا الضحك دا شرطني ، قالت لي مالك جنيتي بتضحكي براك ؟!
قلت ليها انا دي الشغاله وم عندك اي مشكله بشتغل ليكم
قعدت تضحك قالت لي سوري ما عارفه انو دي انتي البتشتغلي
قلت ليها سوري انا دي ياختي وقومي اشربي الشاي
قالت لي لو ما سمعت صوت احمد من الصباح ما ح اقدر اشرب حاجه🙈
انا بقيت عامله كدا😳😳😳😱😱😱 ... حمو يظلطني انا... زول ساي بعبرني ماف... انا لو قتلوني بقوم اشرب واكل واضحك وكأنو ماف حاجه
عاد دي فرصتي ،، طواااالي مسكتها من يدها وقلت ليها اسمعي هنا يا وعد ✋ الاولاد ديل كلهم واااحد وفي الاول يدلعوك ويهتمو بيك وبعد يضمنوك بركبو وشهم التاني... ما تصدقي كلامو... باكر يشخت ليك ويوريك الطفا النور منو... انا اصغر منك صاح لكن واعيه وزولة دنيا واخره وبعرف المصلحه وين... اختي جنس ادم دا.. ووووو الخ (نقتي كتيره وهي ساكته مستغربه فيني)
قالت لي اسكتي دقيقه لاني نص كلامك ما فهمتو وليه الالفاظ السوقيه دي 😕
قلت ليها خليني من السوقيه ولا المستشفيه لكن ركز في المضمون😏
قالت لي فدوى ما تخليك عدوانيه وتحكمي ع كل الأولاد كدا لانهم بالجد ما واحد وحتى لو واحد فانا متأكده انو احمد ما زيهم (بقت تتكلم عنو ومواقفو ومواصفاتو)
هي تتكلم وانا افكر في الفطور بشنو 😂💔
المهم خليتها تاخد راحتها في الكلام لاني ما مركزه معاها وما حبيت اختصرها لحد اللخو المحترم سي احمد دا اتصل وهي عيونها عاملين كدا😍
انا لي الله بدي الجنه مالي ومال ناس الدنيا ديل ها... قمت خليتها تتكشم زي نار القصب ... المهم احداث اليومين عدت وبيتم جهز
مشينا معاهم انا وامي وابوي واخوي عدي صغير قدر خالد....
يلا هم ابوهم ما جاء معاهم نسبة لظروف شغلو
المهم عملنا الكرامه والضيوف م كتار... خالاتي وخيلاني واهل ابو وعد .... كان يوم حلو ومميز... البيت بقى فاضي وحتى اهلي رجعو لكن انا قعدت قلت اساعدهم شويه لانهم ما بعرفو البلد دي
😌😌😌
بليل كدا قعدنا نتونس ونضحك وخالتي من النوع المحبوب ومن أتزوجت سافرت وما جات الا مرتين بس
يعني هي زاتها مسطحه ما بتعرف البلد
اها انا النعاس طلع عيني لكن لقيت مكالمه من صحبتي مروه وطبعا مروه عكسسسي... بتفهم الحب صااااح ومتيمه لحد التعجب... وعيشتها كلها تمعطني بمشاكلها هي وحبيبها وانا فااالحه بحلها ليها وبديها نظريات مع اني سنجل لكن عندي ابعاد في العلاقات دي وخاصه المشاكل 🌝
اها رجعت لمروه وبقيت اتونس معاها لحد نومت خليتها تنقنق براها
يلا الصباح انا متعوده ع شغل البيت وقومت بدري صليت وقريت سورة البقره.... ورجعت سريري وهم نايمين
بقيت قاعده في نص السرير واتكلم برااااي تاني قمت فتحت الشباك قلت اشوف الشمس دي ساي 😂😂😂
عيني وقعت ع ولد يعمل كدا👋 ماشاءالله طول وعرض واسمراني... يتكلم بالتلفون وواقف جنب عربيتو وفجأه شات العربية شكلو زعلان ومتشكل مع حبيبتو عشان كدا انا بقول مااااا تحبوووو مااا تحبو 🔪🔪🔪
