جبت الجنزبيل واشتريت اندومي وشيبس ورصيد
وصلت البيت وواقفه في الباب منتظراهم يفتحو لي... بقيت اغني في اغنية اليسا (في حاجات مكنتش راضيه عنها عملتها... مع اني ما كنت في يوم بحبها... ودا كلو عشان ارضي حد ما حبنيش... الخ) ... مع انو اليسا دي إنسانه حساسه وبسمعوها ناس حساسين ومرهفين ومرتبطين وكلو لكن انا بسمع ليها عدم شغله مني... والمشكله اني بعيش مع الاغنيه اذا كانت رومانسيه بكون عامله كدا😍 واذا كانت حزينه بحس نفسي مشوكشه ومجروحه😭💔
اها واقفه وواقفه وواقفه وفجأه سمعت صوت زول قال : لو صوتك سمح ما عارفك تعملي شنو
اتلفت م شفت زول... تاني سمعتو قال ازعاج من الصباح .... تاااااني اتلفت وعيني وقعت في زولكم زااااتو جوا العربيه
قلت يابت يا فدوى اوووعك ثم اوعك تردي عليو... بقيت عامله كدا🙊😑
وهو قعد يضحك قال اللسان الطويل بتاع قبيل مشى وين
بقلبي قلت زي طولك دا
وتلفونو اتصل... مره بسمع كلمه كلمتين ومره ما بسمع
المهم سمعتو قال نحن قبيل تكلمنا في الموضوع دا واصلا المشكله ما كبيره وح تتحل ان شاءالله
تاني قال فهمنا خلاص وهسي جاي عليك
انا خالتي فتحت الباب ودخلت، ولمن اتلفت عليو لقيتو دور عربيتو وفحط وظاهر انو متضايق شديييد من المكالمة
قلت تستاهل يا عواليق وان شاءالله الماشي ليها دي تنتهي منك وترفع ضغطتك زي ما رفعت لي ضغطي من الصباح وانا جعانه 🤣😒
خالتي قالت لي بسم الله مالك بتتكلمي براك
قلت ليها جعانه
قعدت تضحك قالت لي وعد صحت ومتتظراك
قلت ليها مالا
قالت لي م بعرفها لكن تطلع في ملابسها شكلها طالعه
انا الضحك عايذ يشقني ، قلت ليها تطلع وين هي ما بتعرف اي مكان... بتكون عايذه ترتب الدولاب
قالت لي خلاص انا ح امشي المطبخ للشاي ونادي البنات معاك في الهول
قلت ليها سمح
دخلت ع وعد ، مسكتني من يدي قالت لي فدوى يا قلبي يا عيوني يا حياتي 😘😍
قلت ليها كلامك دا قولي لاحمد بتاعك ، اختصري عايذه مني شنو لاني جعانه
قالت لي اصلك عولاقه خلاص ما متعوده ع الكلام الحلو 😒
قلت ليها اي لاني جعانه
قالت لي عايذه منك طلب ممكن يا عسل🙄
قلت ليها اصلا عرفتك عايذه حاجه ، اها اطلبي سرعه لاني جعانه
قالت لي خلاص م تعلقي جعانه جعانه ، عرفنا ما تصرعينا بالكلمه دي
انا ضحكت ضحك قلت ليها كلمة تصرعينا دي امسحيها ما قاموسك ودخلي بدالها كلمة تمعطينا😂😂😂
قالت لي م موضوعنا يلا ياستي انا عايذه الاقي اخت احمد عزمتها فطور في.....
قلت ليها قااااادر الله يا ربي يا سيدي ، هسي امانه في ذمتك هجمتيني مع جوعتي دي عشان تقولي لي عايذه تلاقي اختو 😒 ... انا دخلي شنو ولو مشيت معاك اتونس معاها وافتح موضوع شنو... وثم ثانيا انتي بتقرري براك!!!! ... وانتي لسه ليك ايام في البلد دي عايذه تعديها مشاوير وطلعات ؟!!!! ... كلمي امك لو خلتك امشي معاك سلامه✋
قالت لي ممكن تسكتي عشان ارد ليك 😡 ... انا كلمت ماما وسمحت لي وانتي ح تمشي معاي
قلت ليها يا سلام عليك شايفاني ترحالك ولا ترحال احمدك... امشي دااااك الشارع 🌝
قالت لي اطلبي عايذه شنو لانك مستحيل تسمعي بمشوار وم تمشي 😂
قلت ليها فااالحه يلا امشي اعملي لي اندومي ومعاها سلطه بالجنبه وكباية عصير و
قاطعتني قالت لي يابت معدتك م ح تقدر تتحمل كل دا ولسه م شربتي الشاي😳
قلت ليها انا ومعدتي متفاهمين لو بلعتك انتي زاتك ما ح تشكي لي هي😂😂
فجأه خلودي(خالد) جانا كابس وقال لي فدوى يا فدوى تلفونك بتصل والمتصل اسمو Watiny دا منو وريني وريني وريني😃
قلت ليو لو نططت لبكره ما ح تطلع مني بحاجه لاني إنسانه بايره والرقم دا بتاع مروه صحبتي
قال لي كذاااابه انتي كبيره ليه بايره ؟! فدوى بايره يعني شنو ؟!🤔🤔
قعدت اضحك عليو قلت ليو يعني م معرسه وم عندي ولد احبو وكدا 😂💔😌
قال لي ريل اختي زاتها زيك لكن وعد ما بايره زيكم وبتتكلم مع احمد وبتقول ليو بحبك
*وعد بقت عامله كدا😳😳😳 قالت ليو خلودي سمعتني متين
قال ليها لمن هو اتصل ليك بليل وانتي قلتي ليو انا في المطبخ وتاني ضحكتي وقلتي ليو لالا بعدين ح تساعدني في المطبخ لانك بتحبني وانا بحبك
*وعد قالت ليو خلودي امشي من هنا سرعه 😡
*انا عامله كدا😂😂😂😂😂😃😃😃😃😂😂😂 ،، قلت ليها اها شوفتي جنس العولاق دا ومطبخ وبحبك يا عديمة الموضوع
قالت لي فدوى اها خلينا منو يلا ح تمشي معاي ؟!
قلت ليها اي ع الاقل ح تكون في طقه😋😋😋
قعدت تضحك هي ومشت المطبخ
.....
انا شلت التلفون ورجعت لمروه كلمتها بالحصل والولد الغياظ
هي لانها زوله حنينه وبتعترف بالحب قالت لي م تخليك قاسيه لانو الزول لمن يشوف زول ح ياخد انطباع بنسبة 73%😄
قلت ليها خلي يبلهم ويشرب مويتم 😒
ويا مروه ح ارجع ليك بعدين لاني طالعه مشوار مع وعد
قالت لي طيب تمام لاني طالعه زاتي الاقي زولي 🙈
قلت ليها بارنهم لي كويييس بعدين يخلوكم تزاولو من ضلكم 😂😜
فجأه اسمع تييييت تييييت تيييت ،، قفلت فيني الكلبه لانها ما بترضى كلمه فيو روميو بتاعها دا
.....
اها شربنا الشاي واكلنا الاندومي واتونسنا مع خالتو وريل... وعد قالت لي قومي نجهز
قلت ليها لكن انا م جبت معاي ملابس طلعه 🙄
قالت لي تلبسي من ريل لانو حجكم واحد ، انا م زيكم 😅✋
وفعلا وزني 58 بالظبط مع ريل ،، طلعت لي فستان ظريف وحاجات كامله كدا 💚
يلا وعد عاينت لي مساااافه قالت لي تعالي اظبطك واشيل ليك حواجبك ووشك وووو
انا بقيت زي الطيره لاني من يومي بطلع ساي ما عندي حاجه لزول😂✋
قلت ليها شكرا خليني مرتاحه وحواجبي م محتاجين لأنهم طبيعي شكلهم ظابط
قالت لي ما ح تباريني وانتي كدا ياخ يوم افهمي انك انثى 😒
الكلمه دي وجعتني وجعه وقررت اني اتظبط وقعدت ليها
يلا هي يدها ناعمه وخبيره في الميكب ...خلتني واقفه جنب المرايا وم عرفت نفسي... ياخ تغيير مبالغه 😂😂
قرصتني في يدي قالت لي اقفلي خشمك ودي انتي مالك مستغربه 😂
قلت ليها والله شاكه في نفسي
قالت لي يلا اجهزي وتعالي وريني اللوك كامل اوكي😉👌
قلت ليها كويس وانتي جهزي نفسك سرعه
.....
المهم هي ماشاءالله طلعت نجفه النجفه ديك فاهمني انتو😂
فستان ياكل منها حته وراقيه ساااااي في خلقتها دي ظاهر انها كيوت ربنا يحفظها لي حبيبتي💚
يلا عاينت لي قالت لي حلااااتك ربنا يغطيك من العين ولو سمحتي الطرحه م تلفيها في رقبتك شديد يا هبله لانو تسريحتك حلوه مع ملامح وشك 😍
قلت ليها سمح يلا اتخارجي
ودعنا خالتو وطلعنا
يلا مع طلعتنا جنب الباب كدا.....
