-انا شايف ان حياتك بتنهار يا "عز"!
=و انا مش شايف غيرها؛ هي بقت مغيمة على العالم الخارجي!
-هي كلت عقلك خلاص! فوق بقي علشان انت بتضيع.
=لما بضيع، بلاقي نفسي في حضنها
-يابني بطل المُحن دة و ركز معايا علشان الجو ابتدي يبرد
=مش ببرد طول ما هى مدفية قلبي
-ياسلام؟ طب انا هقدم استقالتي و اروح، يلعن ابو معرفتك على اللي يشتغل معاك
*بعد سنة*
-بص يا "عز" انا عايزك تفتحلي قلبك و تقولي على كل اللي جواه، انت هنا عند دكتور نفسي علشان اساعدك مش اكتر!
=حاسس اني بردان!
-تحب اوطي التكييف؟
=لاء؛ قصدي اني حاسس بالبرد جوا روحي، كأن في ثقب جوا مفتوح!
-كلمني عن اصحابك يا "عز"
=مش عارف، انا فجأه فتحت عيني لقيت نفسي لوحدي! مش عارف مين صاحبي و مين مشي و مين فاضلي! انا حاسس كأني كنت مسافر عني و فجأه رجعت علشان اشوف الخراب دة كله!
-طب ايه هي آخر حاجة فاكرها؟
=هى! "كاريمان"
-حبيبتك؟
=بالنسبالي كانت اكبر من اني اقول عليها حبيبتي! كانت هي الوطن و العالم بتاعي بدل العالم بتاعكوا! لمعة عنيها كانت بالنسبالي كأشعة الشمس، وجهها كان ضوءالقمر، و دموعها كانت زي المطر، و صوت ضحكتها كانت مزيكتي إنما بقي خطواتها و كلامها يبقوا أحداث حياتي!
-و هي راحت فين؟
=مشيت؛ و اكتشفت اني كنت مجرد حدث جوا حياتها، بينما هي كانت كل حياتي!
-حاولت ترجعلها ؟
=حاولت كتير بس مفيش فايدة، و واضح اني لازم اتعايش مع الحياه الجديدة دي!
-ممتاز
=بس فاضل سؤال علطول يراودني انا كنت عايش ازاي قبل ما اعرفها؟ ازاي كنت عايش في الضلمة دي! هي السبب في كل اللي انا فيه دلوقتي!
-حياتك مكنتش ضلمة، و هي مش السبب
=ازاي؟
-هي كانت مجرد علاقة في حياتك وفشلت لكن انت اللي غلطان علشان انت اللي حطيت روحك جواها؛ الحب عبارة عن مشاعر بنحطها جنب حياتنا و أولوياتنا، مش بنلغي حياتنا و يبقي هو الأساس!
=بس انا حبي كان صادق و مستاهلش الفراق!
-الوقوع في الحب عامل بالظبط كأنك ركبت قطر، مهما كانت عدد الساعات و الايام اللي قضتها فيه، لازم في الأخر يوصل لنهاية الخط! الفراق، هيوصلها مهما حصل أو بأي شكل من الأشكال!
تمت..
لو عجباكوا الاسكريبتس،بلز اعملو شير للكتاب قولوا لأصحابكوا + فوت 💙
أنت تقرأ
كوكب ستاربكس
Contoدفئها يحتضني، ورائحتها تنعش رئتاى، و عندما ارتشفها تشعرني بالثمل دون تدخل اى كحوليات؛ فالكفايين وحده يستطيع أن يتولى أمري و يجعلتي في مزاج جيد. خاصة عندما اكون وسط أناس يشبهونني و يستمعون إلي نفس الموسيقى التي تفرضها علينا المقهى، و نراقب بعضنا البع...
