اني اعشقك فبأي ذنب قتلتني

البارت الثالث عشر

قصه #اني_اعشقك_فبأي_ذنب_قتلتني
#البارت_الثالث_عشر
#الكاتبه /// Rehab ///
مساء الحب ..

الحب نعمه ..
مدري نقمه ع البشر ..
مرات مثل العسل ..
ومرات مثل المر ..

هذا الحب روح تفتر علينا ..
وسحر يمشي باجسادنا ..
الحب غنوه ..
واحساس ..

الحب حياة مليانه هم وغم وقهر !
بس بي الحلو وبي المر ..
الحب ضياع والم ..

بقيت صافنه بوجه عمو
ومسبله عيوني
وجناتي حسيت بيهن وردن من الخجل
والحراره تطلع من خدودي

عمو فاجأني بكلامه
وضليت باهته
واحس الكلام والحجي نفذ مني

وصعب اجاوب
او اعبر عن فرحتي گدامهم

ابد مااتخيلت هيثم بنفسه يخطبني
جنت افكر بي بس بالخيال
واتخيل نفسي عروسته
وانام بحضنه

واشم ريحه عطره
وهو يتوغل لاعماقي ويدخل بريتي

فزيت ع صوت خاله
تستفسر سبب سكوتي وصفنتي
همه مايدرون اني جنت انتظر هاليوم بفارغ الصبر
وهواي خليت امنيات واحلام

واني اتخيل انحط بهيج موقف
بوقتها جنت اگول
اضل ارگص واهلهل بس تصير

ومن صار الحلم حقيقه اتخورست وسكتت
ولساني انعگد 
اتلعثمت بجوابي وماعرفت شنو ارد

نصيت خجلانه
وافرك بأيدي متوتره كلش

رجع عمو يحجي وياي
_ هاا عمو شو ساكته اتأكدي مانضغط عليج بس خلي شغله ابالج ابن عمج سندج ويشيل همج وانت بنيه ماعندج معين باجر عگبه لو متت منو الكم انت وخواتج

_ الله يحفظك النه عمو ، عمرك طويل ان شاء الله

ابتسم وگال
_ وهسه جوابج شنو ع ابن عمج

رجعت نصيت خجلانه
واحس عرگت كلش
ولازال افرك بأيدي من الارتباك والتوتر

بلعت ريگي
وبللت اطراف شفافي

وجاوبته بهمس
_ الي اتشوفه انت عمو

بضحكه حجه وگال
_ يعني اعتبرج موافقه

هزيت راسي بخجل وگمت
واسمع عمو اتنفس بعمق وراحه
ورجع يحجي ويه هيثم

دخلت للمطبخ
ووجهي احس بي جمر من الخجل
ضليت اهفي بكفوف اديه
واسحب نفس عميق

والابتسامه مفارگت شفافي
فرحانه كلش
وفرحتي ماانطيها لاحد

اجت لقاء تباوعلي بشك ومستغربه
_ شنو شبيج

ضحكت وگلت
_ هيثم خطبني

بقت لقاء ثواني صافنه تريد تستوعب
الحجي الي گلته
والقنبله الي فاجأنه بيها هيثم

شويه وعاطت بفرح ولزمتني حضنتني وتضحك
ابتعدت وسحبتني من ايدي
كعدنا بالگاع

_ احجي ولج بالتفصيل شنو شصار وشلون گالج ، يعني هو كال اريد اخطبج لو شلون لحظه لحظه هو بابا مو صاح عليج هسه بس لا هو گالج