قصه #اني_اعشقك_فبأي_ذنب_قتلتني
البارت 1
بقلم /// Rehab ///
………………………
مساء الطيبه والاحساس 😘😘
ع عيونكم حبايب
ونرجع وياكم بقصه جديده 😎 بس هالمره اريد تفاعل قوي 🌝
اريد القصه تكون بالمرتبه الاولى 😘
==============
#سـلطـأني
#أني_أعشـقگ
نعم أدمـنت عشـقگ
فأنت سـيطـرت
على #أنفأسـي
وحبسـت أحسـأسـي
في ضـريح #هوآگ
إنني أعشـق
ألحب فيگ
أحبگ گلمـة
تنطـق بهآ شـفتأي
لگن يهمـس
بهأ قلبي
ليلي ونهأري
فهل تسـمـع
همـسـآتي
فأنت بلسـمـي
وشـفآئي
شمسي ألذي
تدفئ وجدأني
===========
طلعت تركض بكل قوتها والتعب هلكها واخذ من حيلها
تلهث وهي لازمه حجابها الاسود الي مر عليه الدهر
واخذ من لونه وصار املح
يشبه لون صايتها الممزقه والمهتريه
بعد عناء طويل بالركض
وكفت گدام عياده شعبيه
دخلت مدنگه والخوف ماكل گلبها
مثل الفقر الي صابها
ونخر عظامها
اتقدمت بخطوات هادئه ومكسوره
بلعت ريگها بصعوبه
وتحس العطش اتغلل لداخلها
تحولت انظارها ع الترمز الموجود بنهايه الممر
شافت بنات اثنين واكفات يشربن مي
بللت شفايفها العطشانه وعيونها معلگه وتباوع للمي الي ينگط ويوگع بالگاع
اتذكرت هي صايمه قضاء مافي ذمه ابن الجيران
حر الشمس الي ضربها
وركضها حتى توصل للعياده والعطش الي اثر عليها
حست بدوخه قويه
وكان الگاع تفتر بيها
غمضت عيونها بألم ولزمت الحايط بأيدها
مرت لحظات ع وضعها
اتذكرت والدها الي تركته يصارع الالم بين جدران الغرفه
اتحسرت بضيق
رددت بينها وبين نفسها لاكثر من مرة
" ان الله مع الصابرين "
رفعت راسها ووكفت بأستقامه مملوءه ثقه
مشت بخطوات بطيئه
مثل بطئ الساعات الي تمر عليها كل يوم وهي تصارع الحياه حتى توفر لگمة العيش لاهلها
والدها العاجز والي يحتاج لعلاج
بين فتره وفتره
واخواتها الي اعمارهن ماتجاوز 7 سنوات
اخذت العلاج وطلعت
بنفس الخطوات المتثاقله دخلت للبيت وهي تمسح جبينها الي يتساقط منه العرگ
حر الشمس اخذه كل طاقتها
راحت لغرفه ابوها
شافته نايم ويتوجع بألم
انكسر خاطرها عليه وعيونها الذبلانه غرغرت بالدموع
كلشي بيها انكسر وتحاول كل جهدها ترجع توكف ع طولها بكل مرة
بس عجز ابوها ومرضه كسر ظهرها وحناها
جانت دائما تگول هذا اصعب اختبار مر عليه من اول مااجيت لدنيا الا ان خسرت والدتي
بسبب السكر والضغط
وبعدها هي اتحملت مسؤوليه البيت والحمل يوم عن يوم يكبر ويزيد اكثر
وياخذ من حيلها
طلعوا جنى وسما يتراكضن منو الي يوصل الاسرع لحضنها
وسط صرخاتهن الطفوليه جوررري جوررري
ابتسمت الهم وفتحت اديها بحنان تستقبلهم وتحضنهم
_ هلا بالحلوات ااششش صوتجن بابا نايم خطيه مريض مانزعجه
_ اي اي
اخذتهن وراحت دخلت للمطبخ وهي تضحك وتشاقه وياهن
سوتلهن ريوك وگعدت بالگاع بالنص بيناتهن توكلهن يتسابقن منو الي تاكل اسرع وحده وتفوز ع الثانيه
سمعت صوت ابوها يحجي بتعب
_ جورري وينج ياابه
_ اجيتك ياابه اجيت
باوعت لاخواتها وهزت راسها تحجي وياهن
_ اروح اشوف بابا وارجع مو تتعاركن ع الاكل صيرن حبابات وعاقلات
تركتهن وگامت دخلت للغرفه
علامات الخوف والقلق ظاهرات بعيونها وهي تباوع بفزع ع ابوها الواگع بالگاع
صرخت مفزوعه ودموعها الي بدت تسترسل وتبلل خدها الترف
ركضت اله حضنته وتضرب ع خده وتبجي بدموع يتيمه ماضاگت طعم الراحه
_ ياااابه الله يخليك اروووحلك فدوة رد عليه بس افتح عيونك امااااانه الله لاتكسرني اكثر من كسرتي هاي مااااااعندي غيررررك ياااااابه
تصرخ وتبجي بهستريا وتعالت بعدها اصوات اخواتها بالبكاء ع حالة جوري وهي مهزوزة
فقداااان الاب حيييل صعب
وكسر ظهر للبنيه وفقدان امان وسكينه
اصعب إحساس فقدان الاب
هل جربت ان يتوفى والدك الذي كنت تحدثه قبل لحظات فجأة ودون سابق انذار
هل جربت ان تدخل بيتك فترى ناس يتحدثون عن موت ابوك وانت لازلت لم تستوعب بعد ذلك ؟
هل جربت ان تنظر إلى أختك وهي لاتستطيع النظر إليك بسبب دموعك ؟ هل جربت ان ترى والدك ميت وانت تتکلم معه وهو لايجيبك ؟ هل جربت ان يحملوا والدك امامك ويخرجو بيه إلى المقبرة وانت لاتستطيع فعل شيء؟ هل جربت ان يغادر الجميع من البيت وتبقى انت وعائلتك تنظرون إلى بعضکم دون اي رغبة بالحياة ؟
هل جربت ان تبقى في بيتك وتبحث عن ابيك دون جدوى ؟ هل جربت ان ترى ثياب والدك في الخزانة ولاترى والدك ؟ هل جربت إنتظار والدك ليدخل إلى البيت وتبقى تنتظر لساعات ؟ هل جربت اي مناسبة من دون والدك؟
انا جربت کل هذا واکثر
ع عياطي ونحيبي وصراخ اخواتي وبجيهن التموا جيرانا
وناس ضلت تترحم وناس تواسيني وتهدي بيه
بس شيهديني واني مكسوره
صح جان مريض ونايم بفراشه بس وجوده ونفسه حواليه يحسسني بالامان والراحه
احس عندي سند بالحياه
وهسه سندي راح وضاع مني وخسرته وبعد مستحيل يرجع
خلصت 3 ايام الفاتحه واني فاقده وماادري شنو صار ومنو اتكفل بالفاتحه وامورها
وحتى اخواتي مااعرف منو مهتم بيهن ومداريهن ودايرباله عليهن
بس كل الي اعرفه من حجي خاله ام محمود جيرانا هنه زينات ويطلعوهن ويه الجهال يلعبن
………
اني جوري عمري 20 سنه من سكنه بغداد صاحبة بشره حنطيه وملامح حلوه طويله وجسمي ضعيف لان صايمه اغلب الوقت لذلك مااكل هواي
عائلتنا متكونه من امي وابوي واخوات 2
امي اتوفت من زمان وابوي عاجز ومريض اتكفلت اني بيهم وبمصاريفهم وعلاج ابوي المستمر
حالتنا الماديه ضعيفه
عندي عمامي 2 واحد اكبر من ابوي والثاني اصغر منه مااعرف عنهم شي بس سامعه من ابوي من جان يسولف يگول الجبير ( جلال) بعد وفاه جدي طمع بالحلال كله واخذ حصتي وحصه عمي الزغير وانطانه مبلغ قليل مايكفي
وسافر بعدها لاربيل وماعرفنه عنه شي وعمي الزغير ( قصي ) اخذ فلوسه وسافر للامارات واستقر هناك بالبدايه جان يتواصل ويانه وبعدها انگطعت اخباره
طبعا هالحجي جان عمري تقريبا 10 سنوات
بس اتذكر شكل عمامي ومااعرف بعد اذا هسه من اشوفهم اعرفهم او لا
واصلا ماجنت مفكره بيهم او مفكرة التقيهم بس بوفاه ابوي جيرانا ابو محمود رجال جبير وجان يعرف اهل والدي
وعنده ابن اخته هناك بأربيل قرر يدور ع عمي جلال ويبلغه بوفاه ابوي عسى ولعل يجي يشوفنا لان احنه بقينا بس بنات
والدنيا تخوف ومابيها امان
وره اسبوع جنت گاعده اني وخاله ام محمود بس عقلي فاصل وعيوني مورمة ومنتفخه من البجي
وحايره بدنيتي وشسوي وشلون
واباوع ع اخواتي يلعبن گدامي ومافاهمات شي
اندگ الباب وكامت خاله ام محمود تفتحه
ثواني واجت گالت رجلها عمو ابو محمود يريد يحجي وياي
خليت حجاب ع راسي وطلعت وياها
دخل وگف بالباب ومدنگ راسه مايباوع اليه
_ شلونج عموو صحتج احوالج
جاوبته بتعب وانكسار
_ عايشه برحمه الله ورحمتكم وفضلكم ربي يخليك عموو مامقصر ويانه وان شاء الله اگدر ارد ولو جزء بسيط من الي تسوي النه
_ شنو هالحجي عموو الله شاهد حالج من حال بناتي وماتفرقين عنهن وابوج الله يرحمه كان ونعم الجار والصديق
_ تسلم عموو والنعم منك ومن خاله ام محمود
_ شوفي عموو انتي تعرفين ابن اختي عايش بأربيل ومن اتوفى الوالد اني طلبت منه يدور ع عمج جلال ويحصل عنوانه ويتكفل بيكم لان يبقى عمج وانتوا بنات والدنيا تخوف
واني لو اگدر اخليكم تحت رعايتي واتكفل بيكم بس تدرين الناس ماترحم ويصير حجي طالع ونازل عليج وعلينه لان عندي ولد بالبيت
_ معذور عموو وماتقصر
_ واليوم خابرني وانطاني معلومات عن عمج واهله والي عرفته عمج صارله سنتين تارك اربيل وراجع لبغداد ساكن بيها هو وعائلته
رفعت راسي مصدومه ومتفاجأه
_ يعني هو جان هنا قريب علينه ومافكر يشوف اخو ويسأل عنه لعد شگد گلبه قاسي وماعنده صله رحم وانسانيه اذا فعلا هالحجي صح
_ والله ياعموو احنه مانعرف شنو ضروفه يمكن جان مايگدر يسأل عن ابوج او ظروفه قويه ومنعته عن هالشي،
انعصر گلبي وشلت عليه من عرفت هو قريب علينه ومافكر يجي ويسأل وهسه بعد وفاه اخوه منو گال يستقبلنه واحنه بس بنات
يمكن من الباب ويطردنا ومايستقبلنه عنده اذا هو قبل ويه اخوانه وجان موزين واكل حقهم وتركهم وراح هسه شلون بعد مايعرف بأخو مات وترك بناته برگبته ياترى شنو موقفه لو شافنه
يستقبلنه ويكون حنين علينه لو ننطرد بالشارع،
احس بعقلي مايتحمل هالافكار بعد
وبده وجع راسي يأذيني
لزمت راسي بأطراف اصابعي واضغط عليه حيل ومغمضه عيوني بقوه
انتبه عليه عموو وخاله وحاروا شيسوون لان توازني اختل وبديت افقد سيطرتي ومااگدر اوگف بعد
سندتني خالتي ام محمود وگعدتني بالگاع
وعموو واگف ويباوعلي بقلق
_ هاا عمو شبيج شنو يوجعج بس گولي
حجيت بأرهاق وتعب واشوف القلق بعيونه
_ ماكو شي عمو لاتخاف بس راسي وجعني هسه اخذ حبايه ويصير زين
_ والله ياخاله هاي لان ماتاكلين صارلج كم يوم وشوفت عينج هاج عليج راسج
_ لا عمو ليش هيج صدك جذب يعني اخواتج منو الهن لو صارلج شي هسه انتي سندهن بعد وفاه ابوج ولازم تصيرين قويه علمودهن وتتحملين
والموت ياخذ الكل وكلنه ع هذا الطريق ولازم نكون صبورين ع المصاب مو ندمر انفسنا بأيدنا
هزيت راسي بثقل وماجاوبته
راحت خاله جابتلي علاج واجت اخذته منها وشكرتها ع تعبها وياي
رجع عموو يحجي ويكمل كلامه
_ اي عمو هسه اني عرفت مكان عمج هنا بغداد واندليت بيته تردين اخذكم ونروح سويه لو اروحله وحدي بالبدايه وابلغه بوفاه اخو وارجع اخذج مرة ثانيه لبيتهم بكيفج بعد هالقرار بيدج انتي تختارين
_ لا عمو اروح وياك اريد اشوف عمي وشلون عايش بعد ماتركنه وماسأل علينه ومافكر بينه
_ براحتج عمو باجر العصر امر عليج واخذج وياي واروح الهم
_ ان شاء الله
بعدها طلع عمو ابو محمود وخاله بقت يمي لان صحتي تعبانه قله اكل وبس بجي ووجع راسي الي لزمني
خطيه بقت گالت خاف تحتاجين شي وماتگدرين تگومين ع البيت واخواتج
وفعلا رحت نمت بغرفه بابا ع فراشه لزمت ملابسه وبقيت ابجي واشم بريحته الى ان غفيت من التعب بلا مااحس
فزيت ع حركة سما وجنى گاعدات يمي ويلعبن بشعري ويتهامسن ويضحكن بيناتهن
ابتسمت الهن بصعوبه وگعدت باوعت جان فايت الوكت والشمس نازله واذان الظهر قريب
_ اووو شگد نمت بدون مااحس من التعب
كمت من مكاني رتبت ملابس ابوي ورجعتهن لمكانهن وطلعت اشوف خاله ام محمود وين
خطيه تركتها وحدها بالبيت واني نمت
جانت واگفه بالمطبخ وتطبخ الغده هاي الفتره كلها مسواگ البيت كله ع عمو ابو محمود وهو ماقبل ياخذ مني فلوس
وگفت اساعدها وهي جانت تطبخ النه والهم لان بيتهم قريب كلش علينا وماكو احد بالبيت مالتهم
وخطيه حايره بينا وبينهم
شگد احجي وياها ترجع لبيتها لان هي مرة جبيرة بس ماتقبل تگول انتي حسبت بنتي وماكو فرق بينج وبين بناتها
بناتها 3 كلهن متزوجات وكل وحده ابيتها وباقيه هي وعمو وحدهم بالبيت
وابنهم محمود يدرس ماجستير بغير محافظه يعني هم ماموجود يمهم
كلمنه الغده واذن الاذان رحت صليت وهديت كم ركعه لوالدي ووالدتي
قبل جنت اصلي بس لامي ودائما اذكرها بالدعاء والمغفره وهسه والدي صار وياها واله نصيب بدعائي وصلاتي
للعصر واجت صديقتي نرجس اني وياها فرق سنتين بيناتنا هي اصغر مني وبيتهم بعد شارعين عنا تقريبا
نرجس علويه وحلوه كلش وتجذب بسرعه وهي اصغر وحده من البنات
وباقي اخواتها ال 5 كلهن متزوجات ومستورات ببيوتهن
وبس هي الباقيه يم اهلها ومدلله ابوها لان هي الصغيره واحن وحده بيهن
_ شلونج حياتي شلون صرتي
_ الحمد لله زينه مابيه شي
_ اكلتي جوري لو لا ترى موزين اذا تبقين بدون اكل وابوج الله يرحمه مايقبل عليج اذا هيج تبقين وتعذبين نفسج وبعدين اخواتج منو الهن انتي قوتهن وسندهن
_ الله كريم
_ ونعم بالله اگلج جوري اجيت احجيلج شغله مهمه
_ شنو احجي
_ احم ابن خالي خطبني
_ ياااا صلاوات صدك تحجين الف مبروك حياتي
_ شبسرعه باركتي دفهمي اول شي
_ شفهم بس لارفضتي
_ الصراحه مو اخو قبله خطبني ورفضته وهسه رجع هو خطب ورفضت مرتين وهالمره الثالثه رجع حجه ويه ابوي
_ شنووو شتحجين ولج نرجس اخو خطبج قبله وهسه هو خطبج شلون اله نفس بيج بعد
_ ماادري والله ماتشوفيني حايره ومااعرف شأصرف
_ سالفه تحير والله ومااگدر انطيج رايي
سندت ظهرها ع الحايط وغمضت عيونها ومبين عليها حايره ومتوتره وماتعرف شنو تسوي وتختار وهي قبل مدة رافضه اخو
_ زين اهلج شنو رأيهم
_ ابوي موافق وماعنده اعتراض يگول وافقي لان هواي ناس دكت بابنا عليج وكلهم جنتي ترفضيهم وهسه هذا ابن خالج يعني مو غريب وراح يصونج وامي مگالت شي
_ يعني حتوافقين عليه زين شنو شغله وين اهله قريبين عليكم لو لا
_ بيت خالي ساكنين بالبصره وهو يشتغل سايق تكسي وزوجه خالي تگول شقتكم اذا توافقين معزوله فوگ وهو كاتل نفسه عليج يريدج يگول لو هي لو مااتزوج
_ وهو مو يعرف اخو خطبج قبله يعني ماعنده اعتراض ع هالشي لان اخو عينه عليج
_ لا حسب كلامه يگول الزواج قسمه ونصيب وماصارت اله تصير اليه
_ هاي شنو
_ اي والله
_ يعمري الله يسهللج ان شاء الله ويقدملج الي بي الخير
_ امين
عدلت روحها ورجعت تباوعلي باهتمام
_ عوفج مني ربج يحلها من يمه وگوليلي انتي شخبارج شكو ماكو بعدج ماتاكلين
_ لا لج والله اكلت خطيه خاله ام محمود محتاره بينا وهي طبخت لان مابيه حيل اگوم بس اساعدها شويه من احس بروحي زينه
باوعت بأرجاء البيت وعيونها بكل مكان
_ اي صدك شو ماشفتها يمج وينها
_ طلعت قبل لاتجين بربع ساعه گالت اروح اشوف بنتي صار شهرين مجايتهم وهي حامل ماتتحرك هواي
_ الله يساعدها خطيه
_ امين يارب
_ جوري شبيج اكو شي صاير ومو ع بعضج اكو حجي بعيونج
_ اي
_ معناها احجي ليش ساكته
جرت حسره قويه بگد همومها وحملها الي جاي
_ باجر اني وعمو ابو محمود انروح نقابل عمو جلال ونشوفه
_ شنوووو
بقلق وخوف وعيون تلالي بالدموع جاوبت
_ خايفه اخاف مايتقبلنه ويطردنا ونصفى بالشوارع ماعدنا احد يعيلنا ويسندنا،
بخوف وترقب
طلعنا ثاني يوم اني وعمو ابو محمود متوجهين لبيت عمو جلال
وبيني وبين نفسي افكر وخايفه
ياترى راح يستقبلني لو …
يطردني …
يتبع
…………………
النشر راح يكون حسب تفاعلكم ..
مامحدده وقت ..
وياريت ماتبخلون عليه بالضغط ع النجمه ..
