قصه #اني_اعشقك_فبأي_ذنب_قتلتني
#البارت_الثاني
#الكاتبه ///Rehab///
مساء الهيل ...
جوري
وگفت السياره گدام بيت عالي
نزلنا وعمو دفع الكروه للسايق وراح رفعت راسي اباوع للبيت الي يشبه القصر
بناء حديث وتصميم راقي ...
دگ عمو الجرس وبقينا واكفين منتظرين ...
خوف
وقلق
وتوتر
احس گلبي راح يوگف من الخوف ...
وهو يتسارع بنبضاته ودگاته المتزايده ...
للحظه فكرت اتراجع وارجع لبيتنا واني اتكفل بأخواتي مامحتاجه رجال يكون وياي ...
بس عمو ابو محمود كان اسرع من خطواتي وهروبي _ لاترجعين عمو اعرف بشنو تفكرين خلينا نتواجه ونشوف قراره يمكن يكون متغير بعد هاي السنين الي راحت ويحن عليكم
هزيت راسي بلا جواب ورجع يدگ الجرس
دقايق وانفتح الباب گدامنا ...
وطلعت بنيه مرتبه ونازكه بملابسها ...
مبين عليها اصغر مني بالعمر ...
_ نعم منوو
_ بلا زحمه عليج بس نريد ابو احمد اذا موجود عدنا حجي وياه ضروري
_ منو حضرتك
_ گوليله ابو محمود وهو بس يشوفني يعرفني
جان عمو يحجي وياها واني ساكته اباوعلها بتمعن وقلق
وهي ابد مشالت عينها عني ..
تحجي ويه عمو وترجع تباوعلي وتكمل كلامها ...
جان واضح عليها الاستغراب والتساؤول
فتحت الباب ودخلتنه بالحديقه ...
گعدنا ع الكراسي الموجود ..
وهي دخلت للبيت ..
من التوتر بس افرك أيدي ..
واعض شفتي ..
والقلق والخوف عندي يقره الف ...
بعد مده طلع رجال لابس بنطلون اسود وقميص والشيب تارس شعره ولحيته ...
بقيت اباوعله ..
واحس بالشبه القريب من ملامح بابا الي فقدتها ...
اتقدم يمنا ووگف يباوع لعمو ..
ويضيق بعينه ..
كأنه يريد يتذكر هالشخص شايفه قبل ...
واني واكفه قريب منه ادرس ملامح وجهه ومركزه بي ...
سلم علينه وطلب منه نگعد ...
ثواني وگال ...
_ حجي ابو محمود هذا انت معقوله
ابتسم عمو اله
_ اي اني جيرانكم قبل ياجلال لو نصيحلك ابو احمد لان كبرت بعد
_ هههههه براحتك حجي باليعجبك احجي
وگام عليه باوسه ويضحك بوجهه ورجعوا اتسالموا من جديد ...
من شفته هيج شويه الخوف قل عندي واطمأنيت اكثر من قبل ...
وصار عندي امل ان عمو يتقبلنه احنه بنات اخو ويتكفل بينا ...
صرت اوزع ابتسامات ..
وحدي بدون مااحجي اي شي ومنتظرته شوكت يلاحظ وجودي ويسألني ..
التفت عليه ورجع يباوع لعمو ابو محمود
_ هاي الحلوه بنتك حجي
_ لا
رفع حاجبه ويباوع بوجهي
