#اني_اعشقك_فبأي_ذنب_قتلتني
بقلم // Rehab //
مساء الورد 🌹🥰
رغبتنا لطلبكم بتكمله اخر احداث القصه
كتبت الكم بارت اضافي ..
وان شاء الله يكون عد حسن ظنكم بنهايه القصه
ونفتح باب صغير ع ابطال قصتنا
نشوف شنو صار الهم اخر فتره ..
--------------------------------
أصعب الإنتظار هو إنتظار من لا يأتي ..
ﺑَﻌﺾ ﺍﻟﻌﻄﻮﺭ ﺗﺨﻔﻲ ﺩاﺧﻠﻬا ﺣﻜاﻳﻪ لاﺗُﻨﺴﻰ ، فلا ﺗتعجب ﻣِﻦ ﺗﻨﻬﺪ ﺃﺣﺪﻫﻢ ﺑِﻤﺠﺮﺩ ﺭﺷﺔ ﻋﻄﺮ ..
كل شخص لديه لحظة صعبة في حياته .. ولكن من الرائع أن شخص واحد فقط
يقول لك : (( لا تقلق .. أنا هنا ))
الساعه 10 بليل
گاعدين نتابع مسلسل بالتلفزيون
وماعون فاكهه گدامنه خليته للتوأم الي كل شويه يجوعن
دگ موبايلي صوت رساله
فتحتها جانت من لقاء
ضحكت اتوقعتها دتشكي من رأفت على سوالفه وياها وجرأته بالحجي بينهم
فتحت عيوني ع وسعهن
مصدومه بمضمون الرساله
- جوري هيثم اتصوب برصاصه
دگات گلبي الي تسارعت بشكل غريب
ولشتي ترجف
بقيت صافنه اقره بالرساله الف مره اريد استوعب الكلام والاحرف مااگدر
لا گلبي يقبل يصدگ ولا عقلي
ومرت صورته گدامي
ضحكته الي نادرا اشوفها
اخر مرة شفته بيها رحت زياره لبيت عمو
وصادف بيها هو نازل مجاز
جان لابس تشيرت اسود نص ردن
يمكن اكثر لون يلوگ عليه هو الاسود
واكثر لون مفضل عنده هو الاسود
شعره رافعه ليفوگ وحالق لحيته مرتبها
مباقي منها بس قليل
زايده وسامته واناقته ..
فهيت واني اركز بعيوني عليه
اريد احفظ كل تفاصيله
واني ادري بي هو مو اليه ولا بگلبه
الصراع الي بين عقلي وگلبي
معركه دائمه !
زحت عيوني عنه واني اتذكر كلامه الي مر عليه شهور ومااگدر انساه ولا اتخطاه لحد هاي اللحظه
نزل وگف بمسافه عني
- شلونج جوري
- الحمدلله بخير انت شلونك
- الحمدلله عايش
- من رخصتك
تركته ومشيت للمطبخ
تاركه وراي مشاعري الي اتخربطت بمجرد حجيت وياه كم كلمه ..
وبعدها ماشفته ولا التقيت بي
فزيت من ذاكرتي بذاك اليوم
واني احس بدموعي الي نزلت مثل نهر يجري
بين اصدگ الخبر وبين اجذبه
هواي افكار تتخبط براسي
شسوي لو صدك !!
شعليج بي ياجوري مو گلنه عيشي حياتج بعيد عنه
مو گلتي لنفسج خلص هيثم صفحه وانطوت ؟
شلون انطوت وبعده گلبج يلهف بس ينذكر اسمه !!
شلون نسيتي وبعدج ترجفين بس يخطر ابالج !!
واذا صدگ شتسوين !!
اذا دموعج ماسيطرتي عليهن بس سمعتي بي
وماتدرين الحجي صح لو جذب
ماتدرين اذا لقاء دتختبر كلامج بنسيانه
لو صدگ هو متصوب !!
اباوع لاخواتي صافنات عليه
شنو الي يبجيني
شبيج ياجوري !!!
بيه اني بيه هيثم ....
هيثم الي عشقتي بجنون
هيثم الي انخذلتي بسببه !!
