نزلت خدمة والحمدلله وقعته في مكان كويس،، انا قارية حاسوب ونزلوني في اللاب بتاع المؤسسة الاشتغلت فيها.. كويس انو كان فيه موظفة ومعاها ولد كدا.. النصيحة انا من اول يوم شفتو ما حبيتو نوع الثقيل ثقيل ديلك.. عامل روحو تقيل الود.. اول ما جيت سلمته ابا يرد لي السلام منها وانا صنفتو خلاص وحلفته اني لا اسلم عليه لا اتكلم معاه.. شايف روحو كدا.. الايام مشت وبديت اتعرف علي الموظفين وتعاملي بقي عادي الا مع الود دا في خط احمر بينا لا سلام لا كلام.. والحارقني اني شايفاه ظريف مع البنات التانيات وكل واحدة تجي شايلة لابتوبها يصلحو ليها تقعد تتونس وتضحك معاه .. قلت ما علينا انسيه يا مريم قالو اتعزز الليمون..
الليلة الخميس برجع البيت بدري اها قبل ادخل البيت كويس من الباب جاتني ريحة البخور.. وي في شنو معانا ضيوف ولا حاجة ريحة البخور دي طالعة للباب.. صلحته طرحتي وطلعته المراية من الشنطة والكحل صلحتو والبدرة سريع سريع اتهندمته 😂 ودخلته بس يا فرحة ما تمت 😢 ما لقيت اي زول.. استغربت زيادة امي امي يمه.. مريم تعالي الله جابك تعالي اخلطي المنقة دي ودخليها التلاجة وغسلي الموز والعنب ديل.. وفي اسود اعمليه سلطة.. يي امي بسم الله بتين انا جيت لي هسي هدومي ما طلعته.. يمه في شنو الجاي منو البيت مرتب كدا ونضيف للبخور والحاجات دي.. نسابة اختي جاينكم ولا شنو.. نسابة شنو يابت ودعمك جا من البحرين وح يجي يقعد معانا هنا واتلحلحي لي اها افهميني.. شنووو ود عمي منو ال في البحرين وجاي يقعد معانا.. يابت انا ما فاضية ليك ولي اسئلتك الكتيرة دي ابوك هسي جايين معاه.. امشي غيري وتعالي ساعديني.. الله الله طيب سارة وينا.. مشت الجامعة.. وبعدها مااشوف ليك الا المفراكة مرفوعة في وشي علي طول احترمت نفسي وعملت خلف دور ومشيت.. ود عمي المغترب يعني اشمعني ما قاعدين يجيبو سيرتو نهائي.. هو عمي بجيبو سيرتو عشان دا..حسب علمي انو امي ما بتريدهم والمشاكل البينا من قمتا لا بجونا لا بنمشي ليهم.. الجدا هسي شنو وكمان جاي يقعد معانا وامي دي فجأة بقت تريدهم الحكاية فيها إن،، اصلا كلمة مغترب دي ساي بتجنن امي .. طيب هو الجابو شنو ياربي من البحرين فجأة كدا.. مريم مريم يابت انتي غتستي وين ساعة..جاية ياامي جاية اها.. لبست لي بجامة سريع وشلته الفرشة رقدته شعري ولبست هدباند يلمو لي وبخ بخ اتريحته وجيت.. بقينا شغالين في المطبخ.. تيت تيييت سمعنا صوت بوري امي شالت توبا وطلعت.. انابقيت بعاين بالشباك بتاع المطبخ فاتح في الحوش طوالي للشمارات.. جو داخلين ولدين مع ابوي وشايفة امي بتسلم عليهم ما عرفت ياتو ودعمي.. لكن كانو نضاف نضافة المغتربين ديلك وكل واحد قاطع ليه نص شاكي وشايل ليه تلفون قدر وشي 😂😂 واقفة بصور في الموقف.. واحد طويل ما طويل شديد يعني وصحتو مليانة كدا ولونو قمحي.. والتاني اقصر منو وضعيف لابس نظارات و لونو اسمر.. الشمار حرقني ليك اتصلت طوالي بي زينب وحكيتو ليها كلو 😂😂 ما شهدتني زاتي قالت لي مسافة السكة بكون معاك وقت فيها دور مغتربين البقعدني شنو في البيت جاياك جاياك.. والهبالة مكملنها انا وهي قلبناها جبجبة في التلفون جاياااااك جاياك يا ابشرا جاياك جاية احتو معاك يا ابشرااا.. وايوووي فكت لي الزغروته في التلفون والتلفون فضيحة خلاص وقت لقيت امي محمرة لي براحة نزلتو وبقيت بعاين ليها.. قالت لي امشي سلمي علي ودعمك بسأل عنكم.. قلبي بقي بدق دق دق كدا طلعته من سكات.. لبست عبايتي وجيت داخلة السلام عليكم.. وعليكم السلام.. ابوي قال ليه دا الصغيرونة مريم اتخرجت السنة دي وهسي شغالة خدمة وعقبال تتوظف كدا وتشيل عننا.. ياخي والله ما شاءالله دي مريم كبرت وبقت عروس يا عمي..انا خجلته هنا وبقيت بتطوطح زي شفع الروضة فجأة انتبهت لي روحي اتعدلته.. طوالي عرفتو دا ودعمي.. قال لي طبعا انا اغتربت طول وانتي ما بتعرفيني انا اسامة مهندس في البحرين والغربة وظروفها وجري الشغل خلتنا نتلوم مع الاهل وكدا وانا والله عمي دا عزيز علي شديد وكان ما كدا كنت نزلت في فندق بس عايز اعوضو عن السنين الما قعدته فيها معاه.. ابوي قال ليه دا بيتكم يا ولدي وانا عندي منو اعز منكم في الدنيا دي ما انت ولدي ال الله ما رزقني ليه.. تتقلنا زاتنا وقعدو يضحكو.. من جواي والله انت مسكين يا ابوي الود دا شكلو ما هين بتاع حركات وبكاش من كلامو دا.. قلت ليه اي والله فاقدين لينا ولد نحن زاتنا في البيت.. قال لي دا صاحبي مازن جا معاي لانو الشركة هنا انتدبتنا نتم ليها بعض المشاريع هنا وان شاءالله تواجدي معاكم ما يزعجكم بس ف انا طبعا صريح جدا وبحب الصراحة.. لويت خشمي اصلي ما بحب الود البتفلسف في الكلام وبقعد فيه.. صاحبك المعصعص دا زاتو شكلو زيك كاتل ضلو كدا.. هههه لالا ازعاج شنو زي ما قال ابوي البيت بيتك هو اصلا.. دق دق الباب دق عرفتها زينب مشيت فتحته ولا سلمت علي توووش لقيتها دخلت قدامي السلام عليكم ازيك يا عمي وكمان عايزة تقعد كان
ما جريتها وابتسمت ليهم كدا عن ازنكم يا جماعة وجينا داخلين الغرفة... وااااي وااااي يا مريم لكن شفتي العربية الواقفة بره نفسيات نفسيات.. ولا شفتي الدقن اه انا من الدقن.. والعجب الحواجبين اغزر من شعري احييي انا يا مريم دا يدو ناعمة وانضف مني انا البت عريس لقطة.. طاخ ضربتها ليك هيي انتي اصحي من احلامك دي شنو سرحتي لي ورقدتي في السرير قومي ورانا شغل وفعلا قبل نتم ونستنا امي نادتني مريم تعالي جهزي الغدا...
تابعوني🌷
فاطمة قسم الله
