همس لي ما تعملي لي دور البت الشريفة عارفك عايزاني تعالي لي في الغرفة.. حسيتو بعد مني.. بقيت مجمدة في مكاني.. امي وابوي جو جاريين مخلوعين ولمبة البطارية جهرت في عيوني صرخت زيادة..
بسم الله في شنو يامريم مالك
مع كلمتهم دي اتفقعت بالبكي
ابوي قال ليها شكلها اتخلعت بي الضلمة دي
امي مسكتني اطلعي بي جاي القزاز دا ما يجرحك انتي البجيبك تكابسي والكهربا قاطعة شنو بدون تشيلي بطارية..
من جواي بفكر في الحصل اقول ليهم ولالا لالا انا ما بقدر احكي بي حاجة زي دي.. بس دا صوت مازن الدخلو بيتنا شنو.. اااه يا راسي دا مازن ولا اسامة انا بقيت ما عارفة شي..
مريم يابت مريم
اها يا امي
يابتي انا بتكلم معاك ساعة انتي ما بتردي هاك البطارية خليها مولعة جمبك هنا..
حاضر يمه
وقت طلعت جاني خوف ما عادي وبقيت بعاين قصاد الباب بقيت صاحية لما غلبني النوم اظن نمت قريب خمسة صباحا..
تاني يوم بالتعب والسهر ما مشيت الشغل جيت داخلة علي البرندة لقيت امي وسارة ميتات بالضحك ولما شافوني ضحكو زيادة..
خير اها مالكم متشرطات بالضحك كدا 😈
هههههههه انتي صحي امس عملتي كدا هههههه وااااي يا بطني خلاص خلاص لما دموعي جرو بالضحك وامي بتحكي لي في عمايلك بالليل..
اها خلاص عايزين تمسكوها لي وانتي الجابك من دغش الرحمن شنو من نسابتك..
يابت الساعة واحدة انتي صاحية هسي و ما حاسة بالوقت ولا شنو..
واحدة😮😮 اتزكرت تلفوني ما شحنتو رجعت دخلت تاني الغرفة..
سارة جات وراي بعد شوية هاك خالتي جابت ليك جلباب هدية وعايزة تطلع كدا..
سارة دقيقة انا عايزة اقول ليك شي
مالك في شنو احكي
بس ما ترفعي صوتك امي تسمع وتحصل مشكلة
وحكيت ليها بي كل الحصل معاي..
ختت يدها في خشمها وبقت تعاين لي.. مريم انتي جادة ولا بتهيأ ليك ساي..
سارة ما تبقي لي زي امي تطلعيني بحلم برضو..
عايزة اقول ليك شي وما تزعلي من كلامي النصيحة انتي يا مريم بعيدة من ربنا لا بتصلي ولا بتقري ليك قران ساي معدياها لي اغاني وحضور افلام اليوم كلو وونسة وطلعة وكلام فاضي..
فجاة ما رضيت الكلام القالتو سارة.. ياخي خلاص انسي الموضوع زي ما قلت ليك حاجة انا احكي ليك شنو وانتي تقولي لي شنو.. انتي ما الله عشان تحاسبيني بالبعملو دخلك شنو..
ياخي افهمي كلامي دايما بتفهميه بطريقة غريبة انتي انا اختك يا مريم ما عدوك..
وبعدين دا ودعمك عارفة يعني شنو ودعمك يعني شرفك مستحيل يعمل كدا الصراحة.. انتي بتكوني خايفة ساي مع الكوابيس الحصلت ليك دي بقيتي تتخيلي.. اسامة مستحيل يعمل كدا وبالمناسبة هو كلم ابوي وقال عايزك.. وتجي انتي تقولي كلامك الما ياهو دا اوعي تحكيه لي زول تاني وما يطقش اضان ابوي وامي بالجد لانو حا تعملي مشكلة كبيرة بيه..
سارة طلعت ودموعي جرت بي جاي ما انا عارفة من اول ياريتني ما حكيت شي...
يابنوته انتي تلفونك قافلاه مالك من قبيل بتصل عليك..
زوبة ازييك واقفة مالك جمب الباب ادخلي..
يابت انا اتكلمت معاك اول بس انتي كنتي سارحة.. السارحة بيه دا منو لما كلامي ما سمعتي..
زهجانة ساي بس زول شنو البسرح فيه كمان..
اها يعني عايزة تقنعيني انو اسامة ما الكنتي سارحة فيه شايفاك بقيتي تحبيه..
يابت عليك الله انتي رايقة وفايقة اسامة شنو وحب فاضي شنو عليك الله ولا بفكر فيه( من جواي طبعا غير كدا وفرحت جد لما سارة قالت لي انو اسامة كلم ابوي بس ما عايزة اقول لي زينب خفت منها الصراحة)..
اها خلاص يبقي دا الود بتاع اللاب اكيد وقعدت تضحك.. اها اها احكي لي الشمار بتاع يوم اتصل بيك داك قال ليك شنو،،
والله الود يتحبه هو وبعدين ما عارفة في حاجة بتجزبني ليه (ومن جواي بقول احسن احسسها انو اسامة دا ولا في بالي تختاني كدا كدا)
قالت لي عايني يا عسل اذا عايزاني اوقعو ليك بوريك تعملي شنو..
قولي والله..
اكيد يا بت وانا صاحبتك علي شنو
اها يلا سريع سريع قولي لي اعمل ليه شنو عشان الفت انتباهو..
قعدت تضحك ايواااا خليك كدا ملحلحة بس انا هسي عندي مشوار كدا بجيك بعدين..
شنو اقيفي مشوار فجاة كدا جاك نص النهار..
عايني بغشاك بعدين يلا باي يا مزة..
دي مالا دي فجاة مشت مستعجلة مجنونة اكيد..
قعدت اضحك الهبلة صدقتني اكيد لما اصدمها يوم عرسي بس عشان تبطل حركاتها دي وانها براها مفتحة..
#وقفة
*بس يا خسارة لو انتي كنتي عارفة هي بتخطط ليك في شنو وفعلا وصلت لل هي عايزاه💔
تابعوني🌷
فاطمة قسم الله✏
