ما حسيت بي حاجة تانية او الحصل شنو.. لما فتحت عيوني لقيت نفسي راقدة في السرير ويدي ملفوفة.. انا في المستشفي حاولت اتحرك بس كل حتة في جسمي كانت بتوجعني.. والوجع البقتل كان جواي.. ما قدرت اقوم.. بعد شوية الباب فتح وسمعت جوطه وكوراك بره زي كأنو صوت ابوي.. الدكتورة جات داخلة وقفلت الباب..
في شنو..
عاينت لي كدا وسكتت..
وانا بديت ابكي تاني..
قعدت جمبي وقالت لي ممكن تبطلي بكي لانو لا بفيدك ولا برجع الكان وخليك قوية وممكن تحكي وتفضفضي لي الجواك..
سكته ودنقرته علي رجولي وبقيت ماسكاهم علي وببكي..
خلاص طيب اعتبريني اختك الكبيرة مش امكن اقدر اساعدك..
ما رديت عليها برضو..
قالت لي انتي عارفة انو الله ابتلاك عشان بحبك..
الجملة دي هزتني شديد من جواي وخلتني ابكي زيادة بكيت زي اول مرة ابكي.. الله كنت عايزة اقول ليها انا ما حصل عرفت الله.. من قمته ما لقيت زول يقول لي يا مريم انتي مفروض تصلي بعد كدا.. يا مريم انتي لازم تقري قران.. يا مريم انتي بعيدة من ربنا.. يا مريم دا صاح ودا غلط..
قالت لي طيب انتي لي عايزة تنتحري كنتي.. لو ما الله ستر كنتي حا تموتي منتحرة وتدخلي النار.. لو مهما حصل ليك دا ما بخليك انك تحاولي تنتحري و...
قاطعتها طيب لما يبقي ما عندي شي اعيش عشانو لاني فقدت اعز حاجة بملكها ولا برضو حا تقولي لي ما يستحق ودموعي كانت نازلة ما عايزة تقيف..
سكتت كدا وقالت لي الكان بكورك بره دا ابوك وناس امن المستشفي طلعوه بره لانو عايز يضبحك قال ويرتاح منك..
عاينت ليها كدا وضحكته يضبحني انا.. ابوي قال عايز يضبحني.. يا مريم ابوك عايز يضبحك زي الخروف جخخخ كدا... وبعدها قعدت اكورك واضرب في راسي ووشي وقمته اكشح في الحاجات.. الدكتورة حاولت تمسكني لما بقيت بصرخ بي طول حسي نادت دكاترة تانيين ومسكوني ادوني حقنة ونفس الشي تاني ما حسيت بي روحي..
ما عارفة مرا كم من الوقت لما صحيت اول شي شفته اختي سارة كانت قاعدة وبتعاين لي..
فرحته لما شفت سارة وقبل افتح خشمي بي كلمة قامت وجات طق طق ضربتني كفين ياخ الله ياخدك ويريحنا منك ابوك رباك كدا يا عفنة.. انتي عملتي شنو فينا فضحتينا ووطيتي راس ابوك الطول حياتو رافعو فوق.. عايزة تقتلي امي وجرتني من قميصي وضربتني ضرب.. بقيت ببكي بس وبقول ليها يا سارة اسمعيني انا ما عملت شي انا ما كدا عليك الله اسمعيني شوية يا سارة انا اختك ما بتصدقيني..
قالت لي اسكتي يسكت حسك اسكتي تاني تتكلمي لشنو بعد العملتيه دا ياريت لو ابوي وصلك وقتلك وفشه غليلنا فيك.. اي شي اسامة وراني ليه بالصور والفيديو وتاني جاية تقولي ما عملت شي.. الله ستر اسامة وسكتت.. المفروض انتي يطردوك بره البيت ويتبرو منك..
جات الدكتورة داخلة ومسكتها انتي بتعملي في شنو ما صاح كدا يا اخت انتي قلتي لي عايزة تتكلمي معاها براحة.. مسكتها وطلعتها بره..
وانا بقيت ساكتة وببكي..
يارب يارب اموت وارتاح يارب اموت يارب اموت..
الدكتورة جات داخلة وقعدت جمبي قالت لي ممكن تحكي لي وتوريني اي حاجة شايفة انو مافي زول معاك اها اعتبريني زي الورقة البتفضفضي فيها..
اول سكته بس تاني بديت احكي ليها قلت ليها كل الحصل.. ووقت كنت بسكت وببكي كانت بتمسك يدي وتشجعني اتابع.. لقيتها هي الغريبة وقفت معاي لا بعرفها لا بتعرفني..
يومين مشو علي زي العامين وانا في المستشفي لا في زول جا علي لا في زول سأل عني..
حكيت ليها كل تفاصيل حياتي،،هي البكت معاي وهي الصبرتني وهي القوتني اني لازم ارفع قضية عليه واتشجع وما اخاف وانها ممكن تعمل لي الفحص وتديني الاثبات عليه ،، هي الادتني امل وعلمتني اصلي وادعي واسبح واستغفر واتقرب من ربي،، ادتني هدية سبحة صغيرة قالت لي قدر ما تحسي بي خنقة وضيق سبحي وازكري ربك وهو ما بنساك لو الدنيا دي كلها نستك..
قلت ليها ممكن اطلب منك طلب
قالت لي اتفضلي طوالي
قلت ليها اهلي بجو يسألو مني؟
قالت لي اي ومنتظرنك تطلعي بس انتي واعية يا مريم لو ما بتأمني علي روحك انا بنصحك ما تمشي..
يعني حا يعملو لي شنو اكتر من كدا يا دكتورة وانا امشي وين وما عندي غيرهم،، ايام وبتعدي
ان شاءالله،، قل لن يصيبنا الا ما كتب الله لنا...
تابعوني🌷
فاطمة قسم الله✏
