قدر ما تحاولي تكوني في حالك لازم تلقي ناس تفتش بي وراك ودايرة تعرف عنك كل شي ما عارفة دا بفيدها في شنو،، المهم اتلحتني ليك واحدة شكل الداخلية كلها بتخاف منها شكالة وقليلة ادب وماف بت بتقدر عليها من شكلها دا،، ياخ دي كل يوم عاملة شكلة ومزعمطة البنات،، انا زاتي خفت منها،، يوم راقدة كدا جات علي زي القدر هي انتي هي ها شنو وهي زي الهبلة كدا سمينة وكلامها متخلف متخلف،، قلت ليها مالك..
قالت لي انتي اسمك منو؟
مريم
بتقري وين؟
في ام درمان الاسلامية
وانتي مالك ما بتتكلمي مع زول ما عاجبنك نحن ولا شنو...
قلت والله انا ما بحب الكلام الكتير جيت اقعد فترة وماشة..
بس كييف اقول ليها كدا البت متحايلة براها وظاهر عايزة ليها مشكلة وختتني في راسها..
قعدت تقل لي ادبها وتنبز فيني،، انا ما رضيت ليها وكلمة بالكلمة والشكلة قامت الصراحة ما قدرت عليها مع سمنها دا والله ضربتني في ضهري قلت اتشليت 😂 لكن زعمطها من شعرها القرمادة دا ما سكت ليها.. اها كان ما البنات ادخلو حجزونا كانت قتلتني..
جات المشرفة وساقتنا الاتنين وادتنا انزار لو حصل كدا تاني حا تطردنا من الداخلية،، من اليوم داك وبقيت هي لا بتطيقني لا بطيقا كل واحدة حادرة للتانية..
الايام مرت وعدي شهر عديل وبي مشاغل الحياة الدخلته فيها ما عرفت اعمل شنو تاني لا عرفت اصل لي اهلي كيف ولا عرفت اصل لي اسامة التلفونو مقفول بقي وعرفت براي انو غشاني بي كلامو وسايرني وغير رقمو ما اقدر اصل ليه،، بقيت مقطوعة من شجرة ومعلقة وما قدامي حل الا ارفع قضية خلع عليه بس مشكلتي بقت في التكاليف بتاعتها واجيب محامي كويس من وين،، الامور كلها جاطط واتقفلت في وشي لما ظهر علي بقيت نحييفة ووشي تعبان من الهموم الشايلاها..
مرة قاعدة مع البت الشغالة معاها قامت سألتني انتي يا مريم شكلك ما شبه الشغل دا الجابك ليه شنو،، قمت حكيت ليها اني متزوجة وراجلي كان بضربني وشردته منو وابا يطلقني وهسي شرد خلاني ما عارفة ليه درب،، قامت قالت لي والله راجل جيرانا دا محامي خلي لما راجلي يجي كدي بكلمو يتكلم ليك معاه،، قلت ليها خير بس من جواي انا اجيب تكاليف القصة دي من وين الله يسهل بس..
بقيت متابعة مع نن في موضوع الوظيفة بس ما ظبطط معاي لكن صبرتني انها تلقي لي،،
تاني يوم وقت جيتها قالت لي قال ليك جيبي ورقو وتعالي ليه في المكتب الفلاني،، قلت ليها لكن انا هسي ما معاي حق القضية دي،، قالت لي انتي بس امشي ليه،، وفعلا زي خمسة كدا مشيت علي المكان القالتو لي لقيت السكرتيرة قلت ليها اسمي وانو عندي مواعيد مع المحامي،، دخلت ليه وشوية دخلتني،،
دخلت معاه في التفاصيل والكلام والحمدلله ربنا سهلا لي وطلع راجل كويس وزكرني بي ابوي كلامو رااايق كدا ووعدني ان شاءالله يخلعو لي واداني الامل،، اتفقت معاه علي القروش وخفض لي كتير،، طلعته وبقيت شايلة هم من وين اجيبها ماف زول تاني قدامي الا نن المهم اتصلت بيها ولا ناقشتني كتير جات للمحامي كمان وبقت متابعة معاي القضية،،
8 شهور وانا معلقة حاجات كتيرة حصلت غيرت مكان سكني كم مرة واتمرمطه في البيوت بالشغل والجري والتعب الم قروش نفسيتي تعبت وفقدت الامل كلو كلو من كترت الجرجرة وكل يوم تطلع حاجة جديدة في موضوع قضيتي بس الله كريم ما بنسي عبادو بقيت كل يوم من صلاة الصبح بمسك مصحفي وسبحتي وببكي وبدعي وبستغفر،، الوصلت ليه انو مافي زول بقدر يحل مشكلتك غير ربك هو البقول ليها كوني ف بتكون دا البقيت متأكدة منو وعندي ثقة في ربي ما عادية بقت،، نمته وشالتني نومة صحيت مخلوعة بالتلفون قلبي قرب يقيف،،
لقيتها الساعة واحدة وااااي بتين جات دا كلو نومة من صلاة الصبح،،، الووو نن
جررررر جاتني صرخة قوية وكوراك خلاص حيلي اتهدا قلت في شي مية مية..
مبرووووك يا ميمي مبرووووك وكانت بتبكي خلاص انتي بقيتي حرة والحفلة علي،،
قمته من مكاني لا عرفت ابكي ولا اصرخ بس خاته يدي علي خشمي وببكي وحاجة كدا من جواي ما بتتوصف وبقول الحمدلله الحمدلله...
تابعوني🌷
فاطمة قسم الله✏
