صليت ركعتين شكر،، ولبسته سريع جري،، المهم عدي اليوم تعبته فيه شديد بس بي فايدة،،
اتصلت بالمكتبة الشغالة فيها اعتزرت لي الراجل اني ما جيت الليلة،، وكدا كدا كان حا يخصم حق اليوم،،
تعب الفترة الفاتت دي كلها والمشاكل نسيتها في يوم اول مرة اضحك واكون مبسوووطة وارجع مريم زي اول،، عدت الايام والشغل معاي كان كويس طباعة وتصوير احسن من شغل البيوت،، قدرت الم لي قروش ارجع منهم لي نن الدفعتهم لي للمحامي،، مشيت ليها بالعصر كدا طلعتهم قلت ليها
والله يا نن معليش مفروض اجيبهم ليك كاملات بس شوية كدا وبتم ليك الباقي هسي ديل جزو وكتر خيرك انتي وقفتي معاي اكتر من اخت ما قصرتي وعمري ما بقدر اجازيك علي العملتيه معاي..
اشوفا ليك قامت وزعلت
دا شنو يا ميمي انا زعلت منك واللهي كيف يعني تعملي كدا وترچعي القروش ونحن ما بينا حاچة زي دي..
قلت ليها لالا يا نن ما بينا اي لكن والله لو ما شلتيهم انا البزعل جد وتاني ما بجيك ولا بطلب حاجة لو عايزة تعملي حركاتك دي،، حتي بعد تعب شالتهم مني،،
قالت لي تيب خلاص خلاص انا كنت عايزاكي في مودوع كدا ووقت انتي چيتي اقولو ليكي..
اتفضلي عايزاني في شنو يا مزة وقعدنا نضحك..
واللهي يا ميمي انا عندي خالي عايز ليه عروس وهو مطلق وعندو تفلين (طفلين) وانا چبت ليه سيرتك كان ومعليش يعني ما تزعلي مني انا وريتو صورة ليكي وهو هسي منتزر ردك،، هوا مغترب وتوالي لو وافقتي حا يسوقك معاهو لانو مستقر بره يلا انتي قلتي شنو،، واللهي واللهي يا ميمي انا ما بلقي ليه احسن منك عليك الله وافقي امكن تكون ليكي بداية چديدة...
سكته لاني ما عرفت ارد ليها بي شنو وجاني رعب من حاجة اسمها زواج دي زي اتعقدت منها،، قلت ليها اديني وقت افكر وارد عليك،،
ورتني تفاصيل عنو كتير وحكت لي امور بتخصو وسبب طلاقو شنو..
رجعت الداخلية وبقي كلامها بلف وبدور في راسي،،
هو قال عايز ليه واحدة ملتزمة واهم شي ترضي تتنقب لانو النوع المتدين شوية،، دا سبب انفصالو عن زوجتو الكانت بتمشي موضة وما محجبة،، مع انو ما سبب قوي يخليهم ينفصلو بس انا مالي،، مش امكن يا مريم دي تكون طاقة القدر اتفتحت ليك وزول مغترب ومرتاح،، احسن حاجة انا اصلي الاستخارة والفيه الخير ربنا بعملو،، تاني يوم طوالي مشيت لي شيخ الجامع الجمبنا وسألتو عن موقفي وحكيت ليه فقال لي عليك حيضة واحدة للتأكد من انك ما حامل وطالما انتي خلعتي زوجك يعني ما عليك عدة،، وعادي ممكن تتزوجي،، في سري حمدت الله وطلعت مبسوطة وانا ما كنت جايبة خبر للموضوع دا بس اتزكرت كلام نن وقت قالت لي ياالله بس الا تخلص عدتك اول ( شوفو نحن جاهلين بي امور دينا كيف) وبعدها مشيت استفسرت من الموضوع حتي انا زاتي نسيت العلي شنو،، اها يومين واتصلت بي نن قلت ليها موافقة طبعا كوركت وصرخت زي تقول وقع ليها كنز،، وهسي دي انا بچي اسوقك يا ميمي معاي البيت،،،
لملمت حاجاتي وبين كنت فرحانة وخايفة بس مجبورة انا تعبت من الشلهتة وبقيت مطلقة منو البرضي بي والشارع بقي كعب لا عندي سند لا عندي مأوي،، جيت لي نن الكانت مبسوطة شديد،، اتصلت لي بيه اسكايب شفتو واتكلمت معاه شوية،،
مشي اسبوع وحددو العقد وطوالي اسافر ليه والناس الغريبين بقو لي اكتر من اهل جهزوني ولبسوني،، اي شي مشي بطريقة سريعة،، بقيت افكر اني احكي ليه حكاية اغتصابي ولا لا بس ما بقدر معليش اني حا ابدا حياتي ادس سر زي دا لاني مجبورة،، صليت صلاتي ودعيت والليلة الجمعة عقدي شلتو بكي لاني براي لا ام لا اب لا اخت ما عارفة عنهم شي،،، كنت قاعدة مستنية في الغرفة وفجأة سمعت زغرودة مضحكة كدا لما ضحكته ونسيت همي تراها نن جات داخلة والبت عاملة روحها خلاص اتقطعت..
قلت ليها دا شنو دا احسن ما تزغردي دا كوراك دا..
قعدت تضحك وجات امها قالو لي مبرووووك عقدو في الجامع لما قلبي عمل شح الساعة ديك... قعدنا نبكي و امهااعتزرت لي قالت لي معليش يابتي قسمتك كدا اخوانو ما موافقين ،، ماف زول جا بارك ليك ونحن عملناه بالسريع وعقد بس وربنا يسعدكم....
من جواي ما كنت رضيانة لكن مجبورة،، تاني يوم بديت اجراءات الجواز وتلاتة ايام استلمتو وجات اللحظات الصعبة...
تابعوني🌷
فاطمة قسم الله✏
