بعد طلعنا من العرس اسامة قال لينا الا اعزمكم بره وقت انتو قاشرين كدا الليلة.. انا اترددته وخفته والوقت متأخر عشرة جات.. قلت ليه لالا يوم تاني انت ما شايف الوقت كم هسي وناس البيت بقلقو.. زوبة نطت ياخ انتي علي طول خوافة كدا وخاربة لينا المواضيع اصلك من زمان..
اسامة قال لي يعني انتي قلقانة من ناس البيت طلع تلفونو واتصل شوية كدا الوو عمي انا سقته مريم وصاحبتها زينب عازمهم بره عشان ما تقلقو معانا..
اها شفتي بس الحكاية بسيطة واظن تاني مافي اي اعتراض.. طبعا ما رضيت لكن اقتنعت في الاخير وبديت احس زاتي انو امي وابوي عايزين اسامة لي من تصرفاتهم البقت واضحة في البيت .. زينب بدت تتبسط قامت قالت لي اسامة ياخ شغل لينا اغنية شنو الكائبة دي.. ضحك وشغل ليها المسجل والصوت بقي عالي وهي تتراقص زي تقول دا اخوها.. تاني سألتو انت وين صاحبك التاني ما تعزمو خليه يجي..
اي والله ياخ انتي عسل عديل زكرتيني ليه..
كلمة عسل دي وجعتني وقت قالا ليها اتلفت عليها نظام تحميرة مني..
شفته الانتصار في عيونا..
شوية كدا واسامة طلع ليه سجارة وولعها ونزل القزاز اضايقته لاني ما بحب السجائر.. قال لينا تشربو معاي؟
طبعا رديت ليه فوري شنو نشرب انت جادي..
ضحك وقال لي وين المشكلة البنات عادي بقو بشربو انا نفسي شفتهم.. رفع عيونو في المراية وقال لي زوبة ولا شنو يا زوبة؟
ضحكت وقالت ليه عادي حرية شخصية بس حاليا برستيجي وريحة السجار..
فتح الدرج وطلع عطر كدا من شكلو غالي مكتوب عليه روز وردي كدا مداه ليها مع علبة السجائر..
انا ساعتها كنت مصدومة وقلبي بقول لي اقول ليه يوديني بيتنا..
صاح انا عارفة انو زينب بتشرب سجائر بس بالدس لكن وهو كيف عرفها واتعامل معاها بالبساطة دي كأنو بعرفها من زمان..
بقينا ساكتين لما خلاص وصلنا.. نزل قبلنا ووقف جمب العربية.. زوبة صلحت مكياجها واتعطرت واكلت ليها لبانة.. شلت منها الريحة لاني اتمليت من ريحة السجائر..
نزلنا لقينا صاحبو منتظرنا ودخلنا جوه.. مكان كان راقي وباين غالي.. يعني ما تخاطر تجيه وانت ما مرطب.. من شكل الفيه زاتهم..
عاينت لي زوبة اتبدلت نهائي كأني ما بعرفها ومثلت ليك شخصية البت الهاي ديك،، غيرت مشيتها ورفعت ليك راسها وعملت ليك البت كيوت.. قعدنا وبدينا نتونس.. زينب استلمت ليك اسامة لانها قعدت جمبو وهو بقي مايل عليها ما عارفة بتقول ليه في شنو..
مرحبا انا مازن متزكراني..
اهلين ايواا متزكراك.،،شكلك انتي رايقة ما زي صاحبتك مشاغبة..
ايوااا ايوااا ياسيدي انت بتين عرفتني تقول كدا وقعدنا نضحك عليها لانها فجأة رجعت زوبة..
بقيت مراقبة زينب كل مرة حتي ما حاسة بي مازن البتكلم معاي.. وعرفته انها قدرت تشيل رقمو من طلعت تلفونها وبقت تضغط فيه..
الوقت عدي سريع وكنت ساكتة في العربية طول الطريق غير صوت زينب البقي لي مزعج وهي تتونس وتضحك مع اسامة..
وصلناها ووقت وصلنا كنت سارحة ما انتبهت الا بي يد مسكت يدي وضغتت عليها شديد مريم نحن وصلنا البيت.. جريت يدي وبقيت بعاين لي اسامة وساكتة..
قال لي في شنو مسكت اليد كمان زي السجائر برضو..
نزلته وزعلت ما رديت عليه دخلته علي طول.. قعدت شوية وطلعته بجامتي اغير حسيت بي حركة حد.. منو امي دي انتي انا جيت دقيقة افتح اللمبة ما شايفاك.. طق فتحتها ما لقيت زول طلعت عاينت بره ماف حد.. امكن بتخيل لي قفلت باب الغرفة ورقدته انوم..
امي امي الحقيني امي امي ااااه اااه حرام عليك حرام عليك خليني عليك الله خليني..
اتنفضه من السرير قمته ومليانة عرق الجو سخن.. بسم الله الرحمن الرحيم.. الكهربا قطعت بتين.. بسم الله الرحمن الرحيم.. بقيت بهبش افتش تلفوني افتح الكشاف اوووف نسيت اشحنو قطع.. يارب شنو الكوابيس دي.. جيت المطبخ بقيت بهبش عايزة اشرب موية.. مع رجعتي لي ورا حسيت بي حاجة وراي كش وقت الكباية من يدي مع صوت السراميك وصنة البيت والكهربا قاطعة والقزاز اتطاير عملت صوت وصرخت معاها شديد و اتجمدت في مكاني ما عرفت اعمل شنو غير اني برجف...
تابعوني🌷
فاطمة قسم الله ✏
