مرحبا حبايبي شلونكم
وصلنه البارت ال9 من القصه
اتمنى مستمتعين بالاحدث
كتبولي رئيكم بالتعليقات وعلقو على الفقرات
مُتعِبٌ هذا الليل، بعد ما كُنت ترافقني في معارك الليل، تبقيني بجانبك، خوفًا من الأساطير التي كُنتُ أنسجها لكي أخاف، وتَبُثُ فيَّ الأمان. أصبحت أمشي طريق الليل، لوحدي، خائفًا بحق.، مُتعِبٌ هذا الليل، لا الشعِرُ يدثرُني، ولا الاغاني تهوّن عليّ مشقة الطريق، لقد حكمت علي أن امشي ليلي كُلُه في خوف، وأن يستمر الطريق، مظلمًا، حتى يأتي سراب الصباح
تشعر انها سعيده بشكل مكتئب ومنعزله بشكل اجتماعي وغامضه بشكل واضح وذكيه بشكل متغابي ومعقده بشكل مفهوم كانت مليئه بالتناقضات
اليوم مرت حيدر جانت كاعده ويانه لاول مره طبعآ وشافتني ضايجه ضلت تسولف انتي متبطره هاي العيشه مشايفتهه بيت اهلج احمدي الله واشكري كلهم زينين وياج شايفه انتي عيشه الفصليات
ضليت صافنه عليه شريد اجاوبهه يعني معقوله الي جاي يصير بيه ترضه بي اي بنيه خلتني اشك بروحي اني مبالغه بالموضوع هاي حياة كل البناتراي بنيه تقبل تترك دوامهه واحلامهه واهلهه وتنجبر تجي تشتغل من الصبح لليل وكأنما خدامه وتطبخ وهيه بهذا العمر وتترزل على اقل شغله وتنضرب بلا سبب هاي بنسبه الهه حياه عاديه هيج حجي يقهر كلش صح اغلب الي بالبيت زينين وياي وصح عمي مامقصر ابد ولانور بس مومعناتهه اني مرتاحه اريد حياه القديمه مفتقدتهه بكل تفاصيلهه الحب الحنان الامان بين اهلي واخوتي الدلال اريد اهلي اريد دوامي كافي والله تعبت اريد اعيش ...
الي اعرفه هاي الفتره من عمر البنيه تكون حساسه تريد تطلع تضحك تسولف اني مو هم بنيه وحالي من حال كل البنات ليش جاي اعيش العكس بهاي الفتره اهلي شبهه نكطعت اخبارهم يتصلون عله محمد وهوه بدوام ومن يرجع ينسه يكلي لو بليل يكلي بعد ما اكدر اخابرهم كمت كل جمعه اتصل عليهم لان محمد يكون بالبيت واسولف وياهم حسن على كم مره راد يجيني بس اني ماقبلت لان متأكده اذا يجي لو يطردو لو يسمعو كلام صح مشتاقتلهم مامتعلمه هلكد مااشوفهم بالذات حسن كلش قريب مني جنت اتمنه اشوفهه واحضنه واسولفله شجاي يصير بأخته حسين من يوم الي طلع لحد الان حجيت وياه مره وحده كل ما اكول انطوني حسين يكلولي طالع او بالشغل او نايم الف عذر يطلعولي لو مرت احجي ويه امي اسمعه يكلله افتحي سبيكر اريد اسمع صوتهه كلش مشتاقتله وتمنيت يحجي وياي اريد اسمع صوتهه اريد اكلهه والله مامحملتك مسؤليه الي صار بيه لتسوي هيج وتحرمني من صوتك جاي تأذيني فوك اذيتي هاي صوتكم وكلامكم الي بهاي الفتره اكثر شي مصبرني الي صار قدر اني اختكم لازم اتحمل بس لتحرمني من صوتك
توسلت بحسن يخليني احجي وياه يكول والله ولاء حالته حاله وبيم الي تحجين وياي يتأذى كلش الليل مينامه ويصعد ضغطه كتله لعد من يكعد وياكم عوف الخط مفتوح بس اسمع صوته والله مشتاقتله ما اكدر اتحمل اكثر ضلينه نسولف اني وحسن واخر شي سلم عليه وعود راح يسد الخط اني هم سلمت عليه خله التليفون على الميز وسمعت صوت حسين يكله
_شلونهه
_زينه
_انت تعرف صوتهه صدك زينه لو بيه شي
_لا زينه
_حسن مشتاقله اريد اشوفهه تفتر بالبيت اريد اسمع صوتهه اريدهه تتعارك وياي اذا ماقبل اضفرلهه شعرهه كافي والله راح اموت
اسمع حجيه ودموعي تنزل
اليوم كعدت الصبح نزلت شفت سناء يمنه سلمت عليهه ورحت للمطبخ غسلت وكعدت اتريك كلعاده من تجي سناء لازم البيت ينخبص بس مشاكل وحجي اني اشتغل وساكته بالي مو يمهه ولا جاوبتهه اصلآ نضفت وسويت غده وهيه تفتر وراي وتذب حجي خلص اليوم وهلكت انضف منا جهال سناء يخبصون منا صارت ب1 صعدت فوك اخذ ملابس وانزل اسبح هلكانه حيل تعبت اليوم محمد ماكو طالع صار كم يوم مشايفته ميرجع من وكت انام وهوه بعده مجاي اول ماطبيت هوسه الغرفه انصدمت من المنضر الا شويه ردت ابجي لان حرفيآ هلكانه كوه واكفه الغرفه خابصهه خبص قبل ليطلع
الهدوم مشمره على كبر الغرفه العطورات كله مفتحه على الميز اللحاف بالكاع المنشفه مشموره اباوع على هل مهرجان مين ابلش والله ضهري اموتني من الالم وره كل هاي الهوسه اذا اجه ولكه شي مو بمكانه ينكلب البيت على راسي كعدت بالكاع وخاه ايدي على راسي
شويه وكمت الم الملابس ورتبت الميز وعدلت الجربايه نزلت الملابس الوصخه وصعدت امسح كعدت بلكاع كلت بس ارتاح شويه واكوم طب محمد اخذ نضره على الغرفه بدون سلام كبل
_ حضريلي ملابس
_محمد ليش هيج كالب الغرفه اليوم
_كلي لنفسج ليش مامنضفتهه
_محمد تره مو بنكلادش اني من الصبح لليل اشتغل مو قبل لتطع جانت الغرفه تلمع وهسه كوه كملتهه ارحموني شويه
_ولاء بدون لغوه زايده تعبان اطب اسبح واطلع العشه جاهز
صحت
_محمد تره ميصير هيج والله حرام عليك ساعه ب2 بليل وروحي طالعه من التعب
مو جنت بره ماتعشيت
_شنو يعني جاي تحاسبيني
_منو كال جاي احاسبك والله مو عيشه هاي اكلك تعبانه تكلي تحاسبيني احجي وياك كلمه تكلي تجاوبين شلون يعني اني مو بشر حالي حالكم لو تردون بس انضف واطبخ وما احجي وياكم غير بس حاضر ونعم
اجه جرني من شعري وصفكني راشدي
_هذا اللسان الطويل والصوت العالي اذا اسمعه مره ثانيه ادفنج بمكانج
_ والله تسوي فضل اذا تدفني وتخلصني من العيشه هاي
بعدني مامخلصه كلامي دفعني بالكاع وكام يضرب برجليه احس روحي طلعت اصيح وماكو مستمر يغلط ويضرب كسر الغراض الي على الميز هوه تعب هلكد ما ضرب وصيح كعد بالكاع سمعت صوت نور تدك بالباب تصيح محمد ابويه يريدك هوه صاح
_ماكو شي نور روحي هسه انزل وشعل جكاره ويحجي
_حتى تعرفين تجاوبين مره ثانيه احترام ماكو طلع بس كدامي تنضفين وتفترين وبابا وهاي السوالف ومن اطلع لاعبه لعب اني الج احترمتج زياده هيج بشر مو مال احترام
عيوني غوشت واحس جسمي تكطع من الالم اسمع حجيه ومالي خلك اجاوب والي عرفته ومتأكده منه سناء حاجيه عليه لان تعودت كل ما تجي لازم تسويلي مشكله عافني ونزل وركع الباب
كمت اون من ضهري عبالك بي سجاجين
تدنيت للميز اريد امسح ايدي صار بيهه كزاز
صارت كبالي لمرايه اباوع شعري مكطع وجهي كله ازرك وخشمي طاك دم
نزلن دموعي احسهن جمر على خدي
ليش الي جاي بيه والله تعبت ومليت كل الي اريده اعيش حالي حال باقي البنات والله مو صعبه امنيتي ياربي خلصني
لهنا وينتهي البارت اتمنى ستمتعتو بالاحداث
كتبولي ارائكم وتوقعاتكم بالتعليقات
شر الانتقام
#للحكايه بقيه
