حكاية اليوم

تتابع الحياة

هو انا المرادى الى حدا ما مش هتكلم بهزار زى كل مرة...بس برضو مش هنكون جد اوى.
كتاكيتى أموراتى الحلوين...
بتيجي فترة كدة تحس نفسك خدت قلم يفوقك...سواء أثرت فى عمل حاجة او نسيت اصلا تعمله او أساءت فى شخص.

مش بتكلم عن قلم من شخص....لا بتكلم على قلم كنت تتمنى انك تاخده عشان يفوقك قبل فوات الاوان.
ـ زى مثلا بعد الشر عننا كلنا....واحدة خدت سنين دراستها فى الثانوى لعب وهزار لغاية ما لقت التنسيق موديها معهد خاص وبالعافية كمان وهى اخواتها دكاترة وبشمهندسين...ساعتها بتبص لنفسها بحسرة اوى وعاوزة تضرب نفسها مية قلم و انها لو كانت ذاكرت بجد كان زمانها على الاقل فى كلية مش معهد.

ـ وزى مثلا انك كنت بتعامل شخص بطريقة وحشة اوى وتلاقي تانى يوم بيقلولك دة مات.....بتبقي متحسر وهاين عليك تروحلة تبوس التراب اللى ادفن تحته عشام بس يسامحك.

تعالوا نروح لموضوع انهردا بقي...
البنات اللى فى المدارس....من ابتدائي لغااااية تالتة ثانوي.
اول حاجة لازم اقول قاعدة عامة.
اللى لازم نتفق علية ان عقلنا بيكبر....يعنى مينفعش اخد طفل فى اول ابتدأئي اديلة علوم تالتة اعدادى....ولا ينفع اخد حد فى ثانوي واديلة الارقام واحد اتنين تلاتة...وحط خمسة فى مخك واتنين على ايدك.

خلينا مقتنعين ان عشان عقلنا بيكبر بنحس بتعب اكتر.
يعنى الحضانة دى بتبقي اول حاجة تعلم الاطفال ازاى يبعدوا عن اللعب الى حدا ما...اصلهم هيكونوا من ساعة ما اتولدوا وكل اللى بيعملوة لعب وبس.

بعدها فى ابتدائي بيبتدى يعلمه جزء صغير اوى ويخلية يبعد عن الكرتون بشكل عام مثلا او يخلية بدل ما كان ممكن ياكل بأيدة يتعلم ياكل يأداب الطعام...وتلاحظوا من كدة ان الدروس اللى بتكون فى العربى عبارة عن قيم فى شكل موضوع.

وكذلك اعدادى وثانوى.
انهردا انا بتكلم بشكل عام اللى فى اعدادى وثانوى وبشكل خاص اللى رايحين تالتة اعدادى واولى ثانوى بما انى عشت الفترات دى يعنى.

الجماعة اللى رايحين تالتة اعدادى.....هوب يحصل دربكة فى البيت هوب الفون يتسحب هوب النت باى اللعب بح والمذاكرة اوبح.
وعلى فكرة انا على اقتناع تاااام اننا السبب فى انهم يسحبوا الفون والنت.

مظنش انهم هيشوفوك قاعد طول اليوم بتلعب ويسكتوا يعنى.
وطبعا كلمات البابات والمامات الشهيرة( دى سنة شهادة، لو مجبتليش مجموع مش هدخلك ثانوى، لو ماذكرتيش وخدتى شهادة هتشتغلى خدامة...وبلا بلا بلا)

كل دة ملكوش دعوة بيه ولا تحطوه فى دماغكوا اصلا...كل اللى يكون فى دماغك تحدى مع نفسك عشان تكسبى نفسك.
يعنى النفس آمارة بالسوء..طب ما انا هبقي ضدها وهكسب ودة وتحدى.

على فكرة تالتة اعدادى من اسهل ما يكون لو نظمتى جزء صغنن كدة من حياتك ويبقي ليها بس.

طب والحلوين اللى رايحين اولى ثانوى.
هوبااااا..صويت وصريخ ورعب وتاب وهلاوس وكوابيس.....كل دة بيحصل ليكوا ميكس كدة.
طب لية بقي كل دة يحصل....ما هى زيها زى اى سنه مفهاش اى حاجة جديدة غير ان المواد بتوسع.
يعنى بدل علوم بقوا تلاتة وبدل راسات بقوا تلاتة.
انتوا بس هتاخدوا قلم محترم اول السنه كدة لما تبدأى دروس المواد كلها.....اصل كنتى متعودة على 5 دروس بس لكن بقيتى مرة واحدة تسع دروس.

بس خليكى فاكرة انهم فى الاخر دروس...وبلاش تاخدوا دروس فى كل المواد اسمعوا منى.....والترتيب والتنظيم حاجة مهمة لازم تحصل.

وعلى فكرة انا كانت صعبة عليا اوى لانى كنت فى مدرسة خاصة من حضانة ولما رحت ثانوى دخلت حكومة وكنت بعيد عن كل صحابى لانى رحت مدرسة بعيدة عن بيتنا....يعنى كنت وحيدة ووسط بنات بيعملوا حاجات انا مكنتش اسمع عنها...ما انا كنت فى خاصة ودلع بقي.

مسافة ما تدخلى اولى ثانوى دماغك هتتغير وتفكيرها هيتغير وهتلاقى البنات من حواليكى بتتحول .
ملحوظة مهمة بغباء بقي : ملكيش دعوة بالبنات،ملكيش دعوة بالبنات،ملكيش دعوة بالبنات.

يعنى هتكلمى الكل تمام بس محدش يعرف سرك لانك برضو لسة متعرفيهومش....حافظى على شخصيتك الحلوة عشان متتحولش لوحشة.

المرادى المقال كبر اوى ولسة عندى كلام.
بس انا هكتفى بكدة.....كل اللى عاوز يسئلنى على حاجة يسئل سواء هنا او الخاص تمام انا هرد على الكل.....اللى عاوزين يسئلوا على مواد على كتب على اى حاجة اى حاجة مهما كانت انا موجودة وكلنا اخوات ❤❤.

اه فى عرض خاص لليوم وكل يوم😂😂 الناس اللى فى حاجة مضيقاها وحابة تحكيها تتكلم فى الخاص هااا فى الخاص وهنتكلم مع بعض ونفكر ونحل كل حاجة...وعلى فكرة انا الحمد لله بعرف اقنع واهدى اللى قدامى.

مستنياكم ومستنية الفوت والكومنت.

Donia.