حكاية اليوم

اخلاق الغابة 2

مكنتش عاوزة اكتب المقال دة...بالعكس دة انا كمان كنت ناوية امسح اللى قابليه بس اللى حصل ميتسكتش عليه.

يمكن المرة دى مش هتكلم بهدوء اعصاب خالص...ربنا وحدة العالم انا ازاى بولع من جواي.

كنت بذاكر ولقيت الخبر...الخبر كمان معاه فديو شوفت الفديو...يا سلام على الصدمة اللى كانت على وشي يسلام عليا لما فضلت فوق العشر دقايق حاطه ايدى على وشى ومش مصدقه اللى حصل...يسلام كمان وانا بقفل الكتب وبرزعها وبقول بلا مذاكرة بلاقرف.

اية اللى حصل بقي....الحادثة دى فى المنصور ( المنزلة)...اتنين بيتخانقوا مع بعض وواحد اتعور فى ايدة..اتعمل جلسة صلح عشان الولدين يتصافوا( اصلهم مكملوش 20 سنه عيال لسة بشنابات اعدادى).

الولد اللى اتعور رفض...وفى يوم كان الطرف التانى اللى عور قاعد فى سيبر بيلعب وراح جه توكتوك ونزل منه شاب معاه سلاح ودخل على المكان كان كل هدفه يضرب  بالرصاص فى الولد اللى عور فى رجله عشان يعجزة يعنى وبعد ما ضرب جه بقي الولد اللى اتعور ومعاه سيف ودخل عليه كان بيضربة بالسن.

والانيل ان اللى ضرب بالرصاص داخل يحوشوا....بتحوش مييين ما انت السبب كان ممكن يجري ويلحق نفسه ...وبعد ما مشي والناس فاقت من صدمتها وابتدوا يشيلوه وكان منظرة يصعب على الكافر.

طب والاهل فين بقي؟ الاهل عرضوا على اهل الولد اللى اتعور 5 مليون.

يا عمى يا ستي طلاما معاكى 5 مليون مهتمتيش بأبنك لية وخلتيه حاجة تنفع الزفته البلد اللى هو عايش فيها ..بدل ما انتى خلتيه قتال قتله.

وحادثة القطر قبلها وحادثة البنا قبلها وحادثة الولد اللى اتغز عشان بنت وحادثة الولد اللى اتخنق عشان بنت .

فى شهر حصل جرايم تقهر وتوجع القلب.
هو اللى بيقتل دة...مش المفروض انه اخ وفى يوم هيكون زوج واب لما تبقي البذرة فاسدة يبقي لازم تكون النبته فاسدة.

اللى بيتقتل ياخد فلوس....اللى يتعور ياخد تعويض.
مليون للبنا وخمسه مليون للولد بتاع المنصورة و100 الف للولد بتاع القطر .

طب ما تيجوا نعكس الموقف كدة.
هندى لٱم راجح مليون جنيه ونخليها تشوف ابنها وهو سايح فى دمة ونخليها تشوف اللى قتله الدنيا فله معاه.

تعالوا ندى للكمسري دة 100 الف ونرمية هو تحت عجله القطر ونقول معلش اصل مكانش معاه فلوس.

تعالوا ندى ال 5 مليون لام البغل اللى ضرب الولد ونخليها تشوف الفديوهات وابنها بيتقطع ونشوف رد فعلها.

فى ناس اكيد هتقولى وانتى مالك محروقة ليه كدة؟
محروقة عشان عندى قلب حس بأخت اللى مات او اتعور.
محروقة عشان هكون ام فى يوم من الايام واحس قلبى ييولع لما ابنى يكون عنده شوية سخونية....مش سايح فى دمة قدامى.

انا عاوزة اقولكم انا عندى اخويا الصغير يعتبر زى ابنى بالظبط....تخيلوا لما يكون عنده دور انفلونزا بحس انى انا اللى تعبانه .

يجي بقي شخص يموت شخص مرة واحدة كدة بقلب راضي....دة يا شيخ لما الكلبه بتاعتى تتعور فى رجليها انا بيبقي برج من عقلى بيطير من القلق انت بقي جاى بكل بجاحه تضرب فيه .

وطبعا حكومتنا عسل عسل عسل عسل عسل خمسه عسل.

عاوزة اقولكم من مدة بعيدة كنت بتكلم مع ماما وبقولها انا اول ما اكبر هسيب البلد دى...مع اول فرصة هجره هتجيلى هسافر.

ومن فترة قريبة كدة كان حد اقنعنى ان البلد احسن من غيرها .

دلوقتى انا لو جالى فرصة بعد الثانوية انى اسافر واشتغل لو حتى عامله نضافه فى بلد متقدمة انا موافقه جدا.

الكلام اللى كتبته هتحسوه متلغبط بس صدقونى انا حتى الا محروق دمى ومعرفش اصلا اذا كان الكلام لايق على بعضه ولا لا.

Donia .